Apocalipsis

10 Rikurqanitaqmi hanaq pachamanta uraykamuq kallpasapa huk angeltapas, payqa kasqa puyuwan pachasqa hinaspa umanpi chirapayuqmi, uyanpas kasqa inti hinam,+ chakinkunañataqmi kasqa ratachkaq pilarkuna hina, 2 makinpiñataqmi kasqa kichasqa wankukuq uchuy papelcha. Alliq* chakinwanmi sarupakurqa lamar quchaman, ichuq* chakinwanñataqmi sarupakurqa allpaman, 3 hinaspam leon hina qaparispan kallpawan qayakurqa.+ Qayakuptinmi qanchis kutikama rayopa tuqyasqan uyarikurqa.+

4 Qanchis kutikama parapa tunrururuyninkuna uyarikuruptinmi ñuqaqa qillqanaypaqña kachkarqani, ichaqa hanaq pachamanta+ rimamuqtam uyarirqani, kaynatam nimurqa: “Chay qanchis kutikama rayopa tuqyasqanmantaqa amam willakunkichu, amataqmi qillqankichu”, nispa. 5 Lamar quchata hinaspa allpata saruq rikusqay angelmi hanaq pacha lawman alliq makinta huqarirqa 6 hinaspam hanaq pachata, kay pachata, lamar quchata chaynataq chaykunapi tukuy ima kaqkunata+ unanchaq wiña-wiñaypaq kawsakuq Diospa sutinpi nirqa:+ “Manam payqa unamunqachu. 7 Diospa kaq pakasqa kaqkunaqa+ cumplikunqam qanchis kaq angel+ cornetillanta tocananpaqña kasqan punchawpi,+ chay sumaq willakuykunataqa Diosmi willarqa paymanta willakuq serviqninkunaman*”, nispa.+

8 Kaqmantam hanaq pachamanta+ rimapayamuwaqniyta uyarirqani, kaynatam nimurqa: “Rispaykiyá lamar quchapi hinaspa allpapi sayaq chay angelpa makinmanta chaskimuy kichasqa wankukuq uchuy papelchata”, nispa.+ 9 Angelman asuykuspaymi chay papelchata quwananpaq nirqani, hinaptinmi payqa niwarqa: “Hapiy hinaspa mikuy,+ simikipim kanqa miel hina miskillaña, wiksaykipiñataqmi kanqa qatqillaña”, nispa. 10 Angelpa makinmanta chay uchuy papelchata chaskiykuspaymi mikururqani,+ hinaptinmi simiypiqa miel hinaraq miskillaña karqa,+ millpuruptiyñataqmi wiksayta qatqirurqa. 11 Niwarqataqmi: “Yapamantam willakunayki llaqtakunata, nacionkunata, tukuy rimayniyuqkunata hinaspa achka kamachiqkunata ima pasananmanta”, nispa.