1 Samuel

27 Davidmi sunqunpi nirqa: “Saulqa qunqaytachá wañurachiwanqa kay Israel runakunapa allpanpi tariruwaspanqa. Chaynaqa, manaña maskawananpaqyá Filistea runakunapa allpanman ripukusaq”, nispa.+ 2 Chaynapim Davidqa 600 runankunapiwan+ Gat llaqtata kamachiq Akispa+ kasqanman pasakurqa. Akisqa karqa Maocpa churinmi. 3 Davidqa runankunapiwanmi sapakama aylluntin Akispa kasqan Gat llaqtapi yacharqaku*. Davidwantaqmi karqaku Jezreel llaqtayuq warmin Ainoampas+ chaynataq Carmelo llaqtayuq warmin Abigailpas.+ Abigailqa karqa Nabalpa viudanmi. 4 Gat llaqtaman David ripukusqanmanta Saulman willaykuptinkum Davidtaqa manaña maskarqachu.+

5 Davidmi kamachiq Akista nirqa: “Allinpaq hapillawaspaykiqa hukkaqnin llaqtachapiyá allpata quykullaway chaypi yachanaypaq. ¿Pimá ñuqaqa kallani llaqtata kamachiqwan kuska yachanaypaqqa?”, nispa. 6 Hinaptinmi kamachiq Akisqa Ziclag llaqtata+ Davidman quykurqa. Chaymi Ziclag llaqtaqa kunankama Juda ayllumanta kamachiqkunapa allpan.

7 Davidqa huk wata tawa killanmi Filistea runakunapa allpanpi yacharqa.+ 8 Davidqa runankunawanmi riq Guesur runakunapa+ allpanman, Guezer runakunapa allpanman hinaspa Amalec runakunapa+ allpanman. Davidqa chay runakunapa tukuy imantam peleaspan qichumuq. Chay runakunaqa yacharqaku Telam lawmanta qallaykuspa Sur+ sutiyuq lawkamam chaynataq Egipto runakunapa allpankamam. 9 Chay allpapi yachaq runakunatam llaqtantinta Davidqa wañurachiq qaritapas warmitapas.+ Hinaspam apakuq ovejankuta, vacankuta, asnonkuta hinaspa camellonkuta. Apakuqtaqmi pachankutapas. Hinaspanmi kutiq kamachiq Akispa kasqanman. 10 Akisñataqmi tapuq: “¿Kunanqa mayqan llaqtakunatataq rirqankichik imankutapas qichumuq?”, nispa. Hinaptinmi Davidqa hukpi niq: “Kunanqa rirqaniku Juda ayllukunapa allpanpa urayninpi* llaqtakunatam”,+ hukpiñataq niq “kunanqa rirqaniku Jeramelpa mirayninkunapa allpanpa urayninpi llaqtakunatam”,+ hukpiñataqmi niq “kunanqa rirqaniku Ken runakunapa allpanpa urayninpi llaqtakunatam”, nispa.+ 11 Davidqa qaritapas warmitapas wañuchiqmi. Manam Gat llaqtamanqa pusaqchu, chaynapi ama willakunanpaq. Davidmi niq: “Yanqañataq mayqanninpas pimanpas willaykunman: ‘Davidmi kayta-wakta ruwarun’”, nispan. Chaynatam ruwaq Filistea runakunapa allpanpi yachasqan punchawkunapi. 12 Kamachiq Akisqa Davidpa nisqankunamantaqa manam iskayrayaqchu. Akisqa sunqunpim nikuq: “Llaqtamasin Israel runakunachá Davidtaqa chiqnirunku. Chaynaqa wañukunankamam yanapaqniy kanqa”, nispa.