2 Cronicas

20 Jeosafatwan peleaqmi hamurqaku Moab runakuna,+ Ammon runakuna+ hinaspa Amonim* runakuna. 2 Hinaptinmi Jeosafatman willaykurqaku: “Lamar qucha* lawpi Edom allpamanta+ achka-achka runakunam qanwan peleaq hamurunku. Paykunaqa Hazazon-tamarpiñam utaq En-guedipiñam kachkanku”, nispa.+ 3 Chaynata willaykuptinkum Jeosafatqa mancharikuspan Jehova Diosta tukuy sunqunwan maskarqa.+ Hinaspam Juda nacionpi llapallan runakunata kamachirqa ayunanankupaq. 4 Chaymi Juda nacionpi kaq llapallan llaqtakunapi runakunaqa Jehova Diosta tapunankupaq huñunakamurqaku.+ Llapallankum Jehova Diospa ima nisqanta yachanankupaq huñunakamurqaku.

5 Paykunaqa Jehova Diospa wasinpa chimpan musuq patiopim kachkarqaku, chaymi Jerusalen runakunapawan lliw Juda nacionpi kaq runakunapa ñawpaqninpi sayaykuspan Jeosafatqa 6 nirqa:

“Ñawpaq abueloykupa yupaychasqan Jehova Diosllayku, qanmi hanaq pachapi Diosqa kanki.+ Qanmi llapallan kamachiqkunata munaychakunki.+ Qamllapim kan kallpapas chaynataq atiypas. Manam pipas qanwan peleaytaqa atinmanchu.+ 7 Diosllayku, qanmi kaypi yachaqkunata* qarquspa Israel runaykikunaman allpata qurqanki. Chaynapi kuyasqayki Abrahanpa mirayninkuna yachanankupaq.+ 8 Paykunam chaypi yachaspanku sutiki hatunchasqa kananpaq wasita ruwarqaku.+ Hinaspam nirqaku: 9 ‘Sichum unquywan, muchuywan* utaq imawanpas ñakarispayku wasikipi mañakuptiykuqa uyariykuspam yanapaykuwankiku.+ Kay wasikiqa sutiki hatunchasqa kananpaqmi ruwasqa karqa’, nispa.+ 10 Diosnillayku, kaypiñam kachkanku Ammon runakuna, Moab runakuna hinaspa Seir urqupi+ yachaq runakuna. Israel runaykikunata Egiptomanta pusamuspaykiqa manam saqirqankichu chay runakunapa allpanta munaychakunankutaqa.+ 11 Chaywanpas kay quwasqaykiku allpamantam qarquyta munawachkanku.+ 12 Diosllayku, ¿manachu paykunataqa castiganki?+ Kaynaña runakunawan peleaytaqa manam atiymankuchu. Manataqmi ima ruwaytapas atinikuchu.+ Qamllapimá hapipakullaniku”, nispa.+

13 Juda runakunaqa Jehova Diospa wasinpa ñawpaqninpim sayarqaku. Paykunawanmi karqa warminkupas chaynataq churinkupas.

14 Chayna kachkaptinkum Zacariaspa churin Jaazielman Jehova Diospa atiynin huntaykurqa. Zacariasqa karqa Benayapa churinmi. Benayañataqmi karqa Jeielpa churin, Jeielñataqmi karqa Mataniaspa churin. Mataniasqa karqa Leviy ayllupi Asafpa mirayninmi. 15 Jaazielmi nirqa: “¡Jerusalenpiwan lliw Juda nacionpi runakuna uyariwaychik! ¡Uyariwaytaqyá qampas kamachiq Jeosafat! Jehova Diosmi nisunkichik: ‘Achkallaña kasqankuraykuqa amayá manchakuychikchu nitaq hukmanyaychikchu. Manam qamkunachu peleankichikqa, ñuqam peleasaqqa.+ 16 Paqarinyá paykunawan tupaq riychik. Ziz sutiyuq lawnintam qispimunqaku. Paykunawanmi tupankichik Jeruel chunniqpa chimpan wayqupa patanpi. 17 Manam qamkunachu peleankichikqa, chaynaqa peleanaykichikpaq hina churakuspayá maymi kasqaykichikpi hawkalla kaychik.+ Hinaspam ñuqa Jehova Diospa imayna librasqayta qawankichik.+ Jerusalenpiwan lliw Juda nacionpi runallaykuna, amayá manchakuychikchu nitaq hukmanyaychikchu.+ Riychikyá, ñuqa Jehova Diosmi yanapasqaykichik’”, nispa.+

18 Chayllam kamachiq Jeosafatqa Jehova Diosta yupaychananpaq qunqurakuykuspa pampakama kumuykurqa. Chaynallataqmi Jerusalenpi runakunawan lliw Juda nacionpi runakunapas Jehova Diosta yupaycharqaku. 19 Koatpa mirayninkunawan+ Coreypa mirayninkunañataqmi sayarirqaku llapallan kallpankuwan Jehova Diosta hatunchanankupaq. Paykunaqa Leviy ayllumantam karqaku.+

20 Paqarintintam Tekoa sutiyuq chunniqman rirqaku.+ Lluqsichkaptinkum Jeosafatqa paykunata nirqa: “¡Jerusalenpi runakunawan lliw Juda nacionpi runakuna uyariwaychik! Jehova Diospiyá hapipakuychik ama hukmanyanaykichikpaq. Amayá iskayrayaychikchu Diosmanta willakuqkunapa* nisqanmantaqa.+ Hinaspaqa allinmi kankichik”, nispa.

21 Jeosafatqa runakunawan rimaruspanmi takiqkunata akllarqa takispanku+ Jehova Diosta hatunchanankupaq. Paykunaqa yupaychana pachayuqmi soldadokunapa ñawpaqninta rirqaku takistin: “Jehova Diostayá agradecekuychik. Payqa imaña kaptinpas wiñaypaq kuyakuqmi”, nispa.+

22 Kusikuywan takiyta qallaykuptinkum Ammon runakunata, Moab runakunata, Seir runakunata Jehova Dios pantanarachirqa. Chaymi kikinkupura wañuchinakuyta qallaykurqaku.+ 23 Ammon runakunawan Moab runakunaqa Seir runakunatam+ wañurachirqaku. Chaymantañataqmi kikinkupuraña wañuchinakuspa tukunakururqaku.+

24 Juda runakunam chunniqpi llaqtata cuidananku torreman chayarurqaku.+ Hinaspam achka-achka runakunata pampapi wañusqa chutarayachkaqta tariykurqaku.+ Manam chullapas puchusqachu. 25 Jeosafatqa runankunapiwanmi chay wañusqakunapa pachantawan imapas kapuqninkuta manaña apaypas atinankukama huñukurqaku,+ kimsa punchawpunim astarqaku. 26 Paqarintinñataqmi pampapi huñunakururqaku, chaypim Jehova Diosta hatuncharqaku. Chaymi chay pampataqa suticharqaku Beracawan*.+ Chaynam kunankamapas sutin.

27 Chaymantam Jerusalen runakunawan Juda nacionpi kaq wakin llaqtapi runakunaqa kamachiqninku Jeosafatwan kusisqallaña Jerusalenman kutimurqaku. Kusisqaqa karqaku chiqniqnin runakunamanta Jehova Dios harkaykusqanraykum.+ 28 Jerusalen llaqtamanmi chayaramurqaku arpakunata,+ cornetillakunata+ hinaspa cuerdayuq kaqkunata tocastin. Hinaspam Jehova Diospa wasinman yaykurqaku.+ 29 Israel runakunapa chiqniqninkunata Jehova Dios wañurachisqanta yacharuspankum llapallan kamachiqkuna mancharisqallaña karqaku.+ 30 Chaynapim Jeosafatpa kamachisqan watakunapiqa Diospa yanapakuyninwan hawka kawsakurqaku.+

31 Jeosafatqa hinallam Juda nacionpi kamachirqa. Payqa 35 watanpim kamachiyta qallaykurqa. Jerusalen llaqtamantam kamachirqa 25 wata. Jeosafatpa mamanmi karqa Silipa churin Azuba.+ 32 Jeosafatqa taytan Asa+ hinam allin kaqkunata Jehova Diospa qayllanpi ruwarqa.+ 33 Yupaychanapaq ruwasqa muqukunatam ichaqa mana chinkachirqachu.+ Runakunapas manam tukuy sunqunkuwanchu Diostaqa maskarqaku.+

34 Kamachiq Jeosafatpa imayna kawsakusqanmantam qillqarqa Hananipa+ churin Jehu.+ Chayqa qillqasqataqmi kachkan Israel nacionta kamachiqkunamanta willakuq libropipas. 35 Jeosafatmi Israel nacionta kamachiq Ocoziasman hukllawakururqa. Ocoziasqa Diospa chiqnisqan kaqkunatam ruwarqa.+ 36 Paykunaqa hukllawakururqaku Tarsis lawman+ riq hatun botekunata ruwanankupaqmi. Chay botekunatam ruwarqaku Ezion-gueber lawpi.+ 37 Hinaptinmi Diosmanta willakuq Eliezerqa Jeosafatta nirqa: “Ocoziasman hukllawakusqaykiraykum Jehova Diosqa botekikunata chinkachinqa”, nispa.+ Nisqanman hinam botenkunaqa pakipakuruspan chinkarurqa,+ chaymi manaña Tarsis lawmanqa rirqakuñachu. Eliezerqa karqa Maresa llaqtayuq Dodavapa churinmi.