Apocalipsis
21 Chaymantam rikurqani musuq cielotawan musuq allpa pachata,+ ñawpaq cielowan ñawpaq allpa pachaqa manañam kasqañachu,+ manañataqmi kasqañachu lamar quchapas.+ 2 Rikurqanitaqmi chuya llaqtatapas, chayqa musuq Jerusalenwan sutichasqa llaqtam. Chay llaqtam Diospa kasqan hanaq pachamanta uraykamuchkasqa,+ uraykamuchkasqaqa qusanta chaskinanpaq sumaqllaña pachasqa novia hinam.+ 3 Chaymantam tronomanta kayna qayakuyta uyarirqani: “Diospa carpanqa runakunawanñam kachkan. Paymi runakunawan yachanqa*, paykunañataqmi runankuna kanqa, Diosqa paykunawanmi kanqa.+ 4 Diosmi llapa runakunapa wiqinta pichanqa,+ manañam kanqachu wañuypas,+ llakikuypas, waqaypas nitaq nanaypas.+ Ñawpaq kaqkunaqa pasarunñam”, nispa.
5 Tronopi tiyaqñataqmi+ nirqa: “Ñuqam tukuy imata musuqyachichkani”, nispa.+ Nirqataqmi: “Kayta qillqay, nisqaykunaqa mana iskayrayanapaqmi hinaspapas chiqapmi”, nispa. 6 Chaymantapas niwarqam: “¡Ñam ruwasqaña! Ñuqam kani Alfa hinaspa Omega*, qallariypas chaynataq tukuyninpas.+ Pipas yakunayachikuqmanqa kawsay qukuq pukyupi yakutam mana imallapaq qusaq.+ 7 Pipas venceqqa tukuy kaykunatam chaskinqa, hinaptinmi ñuqa Diosnin kasaq, payñataqmi churiy kanqa. 8 Ichaqa azufrewan hinaspa ninawan ratachkaq quchamanmi+ wischusqa kanqaku llapallan manchakuqkunaqa, mana iñiqkunaqa,+ qacha kaqkunaqa hinaspa millakuypaq kaqkunata ruwaqkunaqa, runa wañuchiqkunaqa,+ millakuypaq huchapakuy* ruwaqkunaqa,+ layqa ruwaqkunaqa, imapas yupaychaqkunaqa hinaspa llullakuqkunaqa.+ Rupachkaq quchaqa iskay kaq wañuymi”, nispa.+
9 Chaymantam asuykamuwarqa qipa kaq qanchis castigokunawan huntasqa tazonniyuq qanchis angelkunamanta huknin angel,+ paymi niwarqa: “Hamuy, ñuqam noviata qawachisqayki, payqa malta carnerowan sutichasqapa warminmi”, nispa.+ 10 Hinaspam chuya espiritupa* yanapakuyninwan pusaruwarqa hatu-hatun alto urquman, hinaspam Jerusalen chuya llaqtata qawaykachiwarqa, chay llaqtaqa Diospa kasqan hanaq pachamantam uraykamuchkasqa.+ 11 Chay llaqtaqa Diospa kanchariyninwanmi kachkasqa.+ Kanchariyninpas suma-sumaq alaqa rumi hinaraqmi kasqa. Arí, pukaniraq* llipipipiq alaqa rumipa kanchariynin hinaraqmi llipipipichkasqa.+ 12 Llaqtapa murallankunaqa alto-alto hinaspa hatu-hatunmi kasqa, punkunkunapas chunka iskayniyuqmi kasqa, sapa punkupim kasqa huk angel, sapa punkupitaqmi qillqasqa kasqa 12 Israel ayllukunapa sutin. 13 Intipa qispimunan lawpim kimsa punku kasqa, norte lawpipas kimsa punkum kasqa, sur lawpipas kimsa punkum kasqa, intipa siqaykunan lawpipas kimsa punkum kasqa.+ 14 Llaqtapa murallankunapas 12 rumiwan cimientasqam kasqa, chay rumikunapim qillqasqa kasqa malta carneropa 12 apostolninkunapa+ sutin.
15 Rimapayawaqniyqa qurimanta tupuna suqustam hapichkasqa. Chaywanmi tupurqa llaqtata, punkunkunata hinaspa pirqanta.+ 16 Llaqtaqa tawa esquinayuqmi kasqa, largonpas anchon hina hatunmi kasqa. Llaqtata suquswan tupuruptinmi kasqa yaqa 2.220 kilometro*, chay sayayllam kasqa largonpas, anchonpas chaynataq sayayninpas. 17 Pirqantapas tupuruptinmi kasqa yaqa 65 metro*, chayqa karqa runapa tupusqanman hinam, angelpas runapa tupusqanman hinallam tupurqa. 18 Chay llaqtapa murallankunaqa pukaniraq llipipipiq alaqa rumimantam kasqa,+ llaqtañataqmi kasqa chuyay-chuyay qurimanta limpioy-limpioy vidrio kaqllaña. 19 Chay llaqtapa pirqanpa cimientonkunaqa kasqa tukuy rikchaq suma-sumaq alaqa rumikunawan adornasqam: Punta cimientom kasqa pukaniraq llipipipiq alaqa rumimanta, iskay kaqñataqmi azul* llipipipiq alaqa rumimanta, kimsa kaqñataqmi calcedonia llipipipiq alaqa rumimanta, tawa kaqñataqmi verde* llipipipiq alaqa rumimanta, 20 pichqa kaqñataqmi sardonica llipipipiq alaqa rumimanta, suqta kaqñataqmi sardio llipipipiq alaqa rumimanta, qanchis kaqñataqmi qamya verde* llipipipiq alaqa rumimanta, pusaq kaqñataqmi berilo llipipipiq alaqa rumimanta, isqun kaqñataqmi qillu* llipipipiq alaqa rumimanta, chunka kaqñataqmi crisoprasa llipipipiq alaqa rumimanta, 11 kaqñataqmi jacinto llipipipiq alaqa rumimanta, 12 kaqñataqmi morado* llipipipiq alaqa rumimanta. 21 Chaymantapas 12 punkunkunaqa 12 perlaskunam kasqa, sapa punkunmi huk perlasmanta ruwasqa kasqa. Llaqtapa hatun callenñataqmi kasqa quri puromanta vidrio kaqlla.
22 Chay llaqtapiqa manam ima templotapas rikurqanichu, chay llaqtapa templonqa tukuy atiyniyuq+ Jehova* Diosmi hinaspa malta carnerom. 23 Chay llaqtaqa manam necesitanchu intipa nitaq killapa kanchaynintapas Diospa kanchaynin achkisqanrayku+ hinaspa malta carnero chay llaqtapa mecheron kasqanrayku.+ 24 Llapa nacionkunapas chay llaqtapa achkisqanwanmi purinqaku,+ kay pachata kamachiqkunapas kanchariyninkutam chay llaqtaman qunqaku. 25 Chay llaqtapa punkunkunaqa manam haykapipas wichqasqachu kanqa, chaypiqa manañam tutaqa kanqañachu aswanqa punchawllañam.+ 26 Nacionkunapa kanchayninta hinaspa hatunchasqa kaynintam chay llaqtaqa chaskinqa.+ 27 Chay llaqtamanqa manam imapas qachachasqa kaqkunaqa, millakuypaq kaqkunata ruwaqkunaqa nitaq llullakunaqa yaykunqachu.+ Chaymanqa yaykunqaku malta carneropa libronpi sutinku qillqasqa kaqkunallam, chay libropiqa kawsaqkunapa sutinmi qillqasqa kachkan.+