Proverbios
17 Chaki tantallatapas mikuspa hawka kawsakuymi aswan allinqa+
tukuy imata mikuspa piñanakuyllapiña kawsakuymantaqa.+
2 Pinqaypaq kaqkunata ruwaq churiqa serviqninpa kamachisqanmi kanqa,
serviqninqa chay churipa wawqinkunawan kuskam imakunatapas chaskinqa.
3 Qullqitaqa allpa mankachapi* chulluchispam chuyanchanku, quritapas hornopi chulluchispam chuyanchanku,+
Jehova Diosmi ichaqa sapa runapa sunqunta qawachkan.+
4 Mana allin ruwaq runaqa mana allin runapa rimasqantam uyarin,
llulla runañataqmi llullamasinpa rimasqanta uyarin.+
5 Wakcha runamanta asikuq runaqa unanchaqnin Diostam piñachichkan,+
ñakariq runamanta kusikuq runaqa castigasqam kanqa.+
6 Yuyaqkunapa willkanqa umankupi sumaq corona hinam,
churi-wawankunapa tayta-mamanqa kusikuyninmi.
7 ¿Yaqachu mana allin runa allin kaqta* rimanman?+
¿Yaqachu llaqta runakuna munanman kamachiqninku llullakunanta?+
9 Pampachaq runaqa kuyanakuytam maskan,+
mana pampachaykuspan pantasqankuta yuyarayaq runam ichaqa kuyanakuqkunata chiqninachin.+
10 Yachayniyuq runaqa huk kutilla qaqchaykusqam yuyayta hapin,+
mana yuyayniyuq runam ichaqa pachak kutikama azotesqapas mana uyarikunchu.+
11 Mana allin runaqa mana kasukuqllañam,
chayraykum castigasqa kananpaq mana llakipayakuq runata kachanqaku.+
12 Wawankunata qichurachikuq osowan tuparuymi aswan allinqa
mana yuyayniyuq piña runawan tuparuymantaqa.+
13 Pipas allin ruwaqninta mana allinwan kutichipuptinqa
wasinmantam ima sasachakuypas mana chinkanqachu.+
14 Piñanakuyta rikurichiyqa qucharayaq achka yakuta kachaykuy hinam,
chaymi manaraq imapas kachkaptin chaymanta ayqikunayki.+
15 Mana allin ruwaq runata mana huchayuqpaq hapiq runaqa Jehova Diospa llumpay chiqnisqanmi,
allin ruwaq runata huchayuqpaq hapiq runaqa Diospa llumpay chiqnisqanmi.+
16 Mana yuyayniyuq runa sunqumanta yachayniyuq kayta mana munaptinqa
yanqapaqmi tukuy ima kapuqninwan yachayniyuq kayta haypay munasqanqa.+
17 Ancha kuyakuq amistadqa imaña-haykaña kaptinpas hinallam kuyasunki,+
payqa llumpay sasachakuypi tarikuptikipas kuyasqa aylluyki hinam* yanapaykusunki.+
20 Mana allinllataña ruwaq runaqa manam kusisqachu kanqa,+
llullakuq runapas llumpay sasachakuypim kanqa.
21 Mana kasukuq rumi sunqu churiqa taytantam llumpayta llakichinqa,
mana yuyayniyuq churiqa taytantam mana kusichinchu.+
22 Kusisqa sunquyuq kayqa allin hampi hinam,+
llumpay llakisqa kaymi ichaqa tullupi unquy hina llumpayta hukmanyachikun.+
23 Mana allin ruwaq runaqa pakallapim imatapas chaskikuykun
allin kaqta manaña ruwananpaq.+
24 Allin yuyayniyuq runaqa yachayniyuq kaytam anchata munan,
mana yuyayniyuq runam ichaqa yanqapas-yanqa maypiñapas purin.+
25 Mana yuyayniyuq churiqa taytantam llumpayta llakichin,
wachakuqnin mamantapas llumpaytam waqachin.+
26 Manam allinchu allin ruwaq runata yanqapas-yanqa multayqa,
manam allinchu riqsisqa allin runata maqayqa.
27 Allin yachayniyuq runaqa manam chayllachu imatapas rimarun,+
28 Ruqru uma runapas upallalla kaspanqa yachayniyuq hinam,
upallakuq runapas yuyayniyuq hinam.