1 Corintios
15 Wawqi-panillaykuna, sumaq willakuymanta qamkunaman willasqaytam yuyarichikichik,+ chaytam chaskirqankichik, hinaspam chaypi hinalla iñichkankichik. 2 Willasqay sumaq willakuypi qamkuna allinta hapipakuspaykichikqa salvasqam kankichik, manachayqa yanqapaqchiki iñikurqankichik.
3 Qamkunaman punta willasqaykunaqa karqa ñuqapapas chaskisqay willakuymi, chayqa kaymi: Diospa qillqanpa nisqanman hinam huchanchikrayku Cristoqa* wañukurqa.+ 4 Chaymantam payqa pampasqa karqa,+ hinaspam kimsa punchawmanta+ Diospa qillqanpa nisqanman hina+ kawsarichisqa karqa,+ 5 hinaspam Pedroman*+ rikuriykurqa chaymantañataq 12 apostolkunaman.+ 6 Chaymantam huk kutipi 500 masnin huñunasqa wawqi-panikunaman rikuriykurqa.+ Paykunamanta yaqa llapankum ñuqanchikwanraq kachkanku, wakinmi ichaqa wañukunkuña. 7 Chaymantapas Santiagomanmi+ rikuriykurqa, chaymantañataq llapallan apostolkunaman.+ 8 Llapanmanta qipallatañam ñuqamanpas rikuriykuwarqa,+ ñuqaqa kani manaraqpas tiemponpi naceq wawa hinam.
9 Ñuqaqa lliw apostolkunamantapas menosmi kani, chaymantapas ñuqaqa manam “apostol” nispa sutichasqa kanaypaq hinachu kallani Diospi iñiqkunata ñakarichisqayrayku*.+ 10 Ichaqa, mana kuyasqa kanaypaq hina kachkaptiypas Diosqa anchata kuyawasqanraykum kay ruwasqaytaqa ruwani, chayna kuyawasqanqa manam yanqapaqchu karqa, aswanqa lliw apostolkunamantapas astawanmi llamkarqani, ichaqa manam kikiypa kallpallaywanchu, aswanqa Dios anchata kuyawasqanraykum*. 11 Chaynatam ñuqapas utaq wakin apostolkunapas willakuchkaniku, chayta uyarispam qamkunapas chiqap kasqanpaq hapirqankichik.
12 Sichu wañusqakunapa kasqanmanta Cristo kawsarichisqa kasqanta+ willakuchkanchik hinaptinqa, ¿imaynamá wakiqnikichikqa ninkichik wañuqkuna mana kawsarimunantaqa? 13 Wañusqakuna manapuni kawsarimunan kaptinqa manachiki Cristopas kawsarimurqachu. 14 Chaynaqa Cristo mana kawsarichisqa kaptinqa willakusqanchikqa yanqachiki, yanqataqchiki qamkunapa Diospi hapipakusqaykichikpas. 15 Chaymantapas, wañuqkuna mana kawsarimunanku kaptinqa manachiki Diospas Cristotaqa kawsarichirqachu.+ Chayna kaptinqa, “Cristotam Dios kawsarirachirqa” nispanchikqa Diosmantachiki llullata willakuchkachwan.+ 16 Wañusqakuna mana kawsarimunanku kaptinqa manachiki Cristopas kawsarichisqachu karqa. 17 Chaymantapas Cristo mana kawsarichisqa kaptinqa Diospi iñisqaykichikqa yanqachiki, chaynaqa manaraqchiki huchaykichikmantapas pampachasqachu kachkankichik.+ 18 Chayna kaptinqa Cristopa wañukuq qatiqninkunaqa wiñaypaqchiki chinkarunku.+ 19 Sichu Cristopi suyasqanchik kay vidallapaq kaptinqa pimantapas aswan llakipayanam kachkanchik.
20 Ichaqa Cristom wañusqakunapa kasqanmanta kawsarichisqa karqa, payqa wañuqkunamanta punta kawsarimuqmi*.+ 21 Imaynam wañuy rikurirurqa huk runallawan,+ chaynam wañuqkunapas kawsarimunqa huk runallawan.+ 22 Imaynam Adanpa ruwasqanrayku lliw runakuna wañuchkanku,+ chaynallataqmi Cristopa ruwasqanrayku lliw runakuna kawsarimunqaku,+ 23 ichaqa sapakamam tupasqanman hina: Puntatam Cristo kawsarimurqa,+ chaymantañataqmi Cristo chayaramuspa kaypi kaptin* paypaq kaqkuna kawsarimunqaku.+ 24 Tukuyninpiñataqmi taytan Diosmanña saqiykunqa payña tukuy imata kamachinanpaq*, chayqa kanqa churin llapallan kamachiqkunata hinaspa llapallan autoridadkunata pasaypaqta chinkarachiptinñam.+ 25 Jesucristoqa kamachinqa llapallan chiqniqninkunata Dios saruchinankamam.+ 26 Hinaspanmi pasaypaqta chinkachinqa qipallaña kaq enemigonchik wañuyta.+ 27 Diosqa “Jesucristopa sarupakunanpim llapa imata churarun”.+ “Sarupakunanpim llapa imata churarun” nispanqa+ manam nichkan Diospas Jesucristopa makinman churasqa kasqantachu, aswanqa Diosmi Jesucristopa makinpi tukuy imata churarun.+ 28 Ichaqa, churinpa makinpi Dios tukuy imata churaruptinmi churipas tukuy imata makinpi churaq Diosman churakuykunqa,+ chaynapim Diosña lliwta kamachinqa.+
29 Mana chayna kaptinqa, ¿imatataq ruwanqaku wañunankupaq bautizasqa kaqkunaqa?+ Wañuqkuna manapuni kawsarimunanku kaptinqa, ¿imanasqataq paykunaqa wañunankupaq bautizakunku? 30 Chaynaqa, yanqapaqchiki ñuqanchikpas tukuy tiempo peligropi kachkanchik ¿aw?+ 31 Wawqi-panillaykuna, imaynam sapa punchaw wañuypa patanpi tarikusqaypas chiqap, chaynam señorninchik Jesucristopi iñisqaykichikrayku anchata kusikusqaypas chiqap. 32 Wañuqkuna mana kawsarimunan kaptinqa yanqapaqchiki wakin runakuna hina* Efeso llaqtapi purun animalkunawan pelearqani,+ chaynaqa wakin runakuna hinayá nisunchik: “Mikukusun, tomakusun, paqarinmi wañukusun”, nispa.+ 33 Amayá pantaychikchu, mana allin kawsakuq runakunawan hukllawakuspaykichikqa allin kaqkuna ruwasqaykichiktam saqirunkichik*.+ 34 Allin kaqta ruwaspayá yuyaynikichikman kutiriychik, amayá huchallikuychikchu, wakinqa manam Diosmanta yachankuchu. Kaytaqa nichkaykichik pinqakunaykichikpaqmi.
35 Yaqapaschá pipas ninqa: “¿Imaynataq wañuqkunaqa kawsarimunqa? ¿Imayna cuerpoyuqtaq kawsarimunqa?”, nispa.+ 36 ¡Yaw mana yuyayniyuq runa! Mugu tarpusqaykiqa manam wiñanchu puntata mana ismuspanqa*. 37 Tarpunkiqa manam wiñasqa plantatachu aswanqa mugullatam, trigo kaptinpas utaq huk rikchaq mugu kaptinpas. 38 Diosmi muguta munasqanman hina wiñachin, hinaptinmi sapa mugu wiñan, ichaqa manam chaynallachu kanku. 39 Manam lliw aychachu huk rikchaqlla, runakunapa aychanqa huk rikchaqmi, huk rikchaqtaqmi uywa animalkunapa aychanpas, alton pawaqkunapa aychanpas chaynataq challwakunapa aychanpas. 40 Kanmi hanaq pachapi kawsakuqkuna,+ kantaqmi kay pachapi kawsakuqkunapas.+ Hanaq pachapi kawsakuqkunapa suma-sumaq rikchayninqa manam kay pachapi kawsakuqkunapa rikchaynin hinachu. 41 Intipa sumaq kasqanqa huk rikchaqmi, killapa sumaq kasqanpas huk rikchaqtaqmi,+ huk rikchaqtaqmi lucerokunapa sumaq kasqanpas. Arí, sapa luceropa sumaq kasqanpas manam chaynallachu.
42 Chaynataqmi wañuqkunapa kawsarimuyninpas. Ismuruqlla cuerpom pampasqa, hatarinñataqmi mana ismuq cuerpoña.+ 43 Pinqaypaqmi pampakun, hatarinñataqmi kancharichkaqña,+ mana kallpayuqmi pampakun hatarinñataqmi kallpayuqña.+ 44 Aycha cuerpom pampasqa, hatarinñataqmi mana rikuna cuerpoña. Aycha cuerpo kaptinqa mana rikuna cuerpopas kanmi. 45 Qillqasqam kachkan: “Punta kaq Adanmi kawsaq runaña* rikurirurqa”, niq.+ Qipa kaq Adanñataq* kawsay qukuq mana rikuna cuerpoña rikurirurqa.+ 46 Puntataqa kan manam mana rikuna cuerpochu, aswanqa aycha cuerporaqmi, chaymantañam mana rikuna cuerpoqa. 47 Punta kaq runaqa kay pachamantam karqa, ñutu allpamanta ruwasqa.+ Qipa kaq runañataqmi hanaq pachamanta.+ 48 Ñutu allpamanta ruwasqa chay runa hinam kanku kay pachapi runakunapas, hanaq pachamanta hamuq runa hinataqmi kanku hanaq pachapi kaqkunapas.+ 49 Imaynam ñutu allpamanta Diospa ruwasqan runaman rikchakunchik,+ chaynam hanaq pachamanta kaq runamanpas rikchakusun.+
50 Wawqi-panillaykuna, kaytam nikichik: Aychayuq hinaspa yawarniyuqqa manam Diospa gobiernonmanqa* yaykunqakuchu, manataqmi ismuruqlla kaqpas mana ismuqqa rikurirunmanchu. 51 Diospa kaq pakasqa kaqmanta willasqaykichik: Manam lliwchu wañusunchikqa, ichaqa lliwmi cambiasqa kasun+ 52 ñawi qimchiyllapi. Arí, qipallaña kaq cornetilla waqaptinmi+ huk ñawi qimchiyllapi cambiasqa kasunchik. Cornetilla waqaptinmi wañuqkuna kawsarimunqaku mana ismuq cuerpoyuqña, hinaptinmi ñuqanchikqa cambiasqa kasunchik. 53 Kay tukuruqlla cuerpoqa mana ismuq cuerpomanmi cambiasqa kanan,+ kay wañuruqlla cuerpopas mana wañuq cuerpomanmi cambiasqa kanan.+ 54 Tukuruqlla kaq mana ismuq kaqman cambiaruptinmi chaynataq wañuruqlla kaqpas mana wañuqman cambiaruptinmi, kayna qillqasqa kaq cumplikunqa: “Wañuyqa wiña-wiñaypaqmi chinkachisqa kanqa”, nisqan.+ 55 “Yaw wañuy, ¿maytaq atiyniki? ¿Maytaq wañuchinaykipaq tuksinayki?”+ 56 Wañuypa tuksinanqa hucham,+ kamachikuyñataqmi* huchaman atiyta qun.+ 57 Ichaqa, ¡Diosmanyá gracias kachun señorninchik Jesucristopa yanapakuyninwan vencesqanchikmanta!+
58 Chaynaqa kuyasqay wawqi-panillaykuna qamkunaqa mana imapa kuyurichinanyá kaychik,+ hinaspapas allintayá sayaychik, hinaspayá señorninchikpa ruwayninpi tukuy tiempo astawan llamkaychik,+ yachasqaykichikman hinaqa señorpaq llamkasqaykichikqa manam yanqapaqchu.+