1 Corintios
4 Runakunayá ñuqaykutaqa qawawachunku Cristopa* yanapaqninkunata hina chaynataq Diospa kaq pakasqa kaqkunata qawananpaq kamachisqa runakunata hina.+ 2 Chaymantapas kamachisqa runaqa imam ruwanantam ruwanan. 3 Ñuqataqa manam imapas qukuwanchu qamkuna juzgawaptikichikpas utaq juezkuna juzgawaptinpas. Ñuqaqa manam kikiypas juzgakunichu. 4 Ñuqaqa sunquypim hawka tarikuni*. Ichaqa manam chayraykuchu allin ruwaqña kani, juzgawaqniyqa Jehova* Diosmi.+ 5 Chaynaqa, señorninchik chayamunankamayá manaraq tiemponpiqa ama pitapas juzgaychikchu.+ Paymi tutayaypi pakasqa kaqkunata achkiman hurqumunqa, hinaspam runakunapa sunqun ima munasqanta qawachinqa, hinaptinmi Diospa alabasqan sapakama kanqaku.+
6 Tukuy kaykunatam wawqi-panillaykuna ñuqapas hinaspa Apolospas+ ruwarqaniku qamkunapa allinnikichikpaq, ruwarqanikuqa “qillqasqa kasqanman hinallam ruwanayki” niq kamachikuyta ñuqaykumanta yachanaykichikpaqmi. Chaynapi ama qaritukunaykichikpaq+ chaynataq hukninman sayapakuspa hukninpa contranpi ama kanaykichikpaq. 7 ¿Imaykiwantaq qamqa hukkunamanta aswan allinpaq hapikunki? ¿Manachu tukuy imaykikunatapas Dioslla qusurqanki?+ Dios qusuchkaptikiqa, ¿imanasqataq alabakunki kikillaykimanta imaykikunatapas tarichkawaq hinaqa?
8 Qamkunapaqqa kachkanñam tukuy munasqaykichikkuna ¿aw? Apuñam rikurirunkichikpas ¿aw? Mana ñuqaykuwanmi qamkunaqa kamachiyta qallaykunkichikña+ ¿aw? Chiqaptapunipas ñuqapaqqa allinmá kanman kamachiytaña qallaykusqaykichikqa, chaynapi ñuqaykupas qamkunawan kuska kamachiq kanaykupaq.+ 9 Piensasqayman hinaqa ñuqayku apostolkunatam Diosqa achka runakunapa kasqanman yaykunaykupaq qipallapiña churaykuwanku, chayqa karqa wañuchisqa kanaykupaq akllasqa kasqaykuraykum,+ ñuqaykuqa angelkunapaqpas hinaspa runakunapaqpas qawakuwanankupaq*+ hinam rikuriruniku. 10 Ñuqaykuqa Cristoraykum mana yachayniyuq kaniku,+ qamkunam ichaqa Cristopi yachayniyuq kankichik. Ñuqaykuqa mana kallpayuqmi kaniku, qamkunañataqmi kallpasapa kankichik. Qamkunaqa runakunapa allin qawasqanmi kankichik, ñuqaykum ichaqa runakunapa chiqnisqan kaniku. 11 Kunankamam kachkaniku yarqaymanta,+ yakumanta,+ pachaykumanta ususqa, maqasqa+ hinaspa mana wasiyuq. 12 Makiykuwanmi anchallataña llamkachkaniku,+ runakuna tratapawaptinkum+ allinllata rimapayaniku, chiqniwaspanku maskawaptinkum mana muspaypi hina tarikuspalla aguantaniku,+ 13 ñuqaykuta yanqamanta tumpawaptinkum sumaqllata kutichikuniku*,+ ñuqaykuqa kunankamam runakunapa wischusqan basura* hina rikuriruniku, runakunapa wischusqan qanra hinam rikuriruniku.
14 Kaykunataqa manam pinqachinaypaqchu qillqamuchkaykichik, aswanqa kuyasqay churiykunata hina yanapanaypaqmi. 15 Cristota imayna qatikunaykichikpaq yachachiqnikichik 10.000 runaña kaptinpas, taytaykichikqa manam achkachu, ñuqaqa taytaykichikmi rikuriruni sumaq willakuyta yachachisqayrayku hinaspa Jesucristota qatinaykichikpaq yachachisqayrayku.+ 16 Chayraykum ruegakullaykichik ñuqata qatipakuwanaykichikpaq.+ 17 Chaymi qamkunaman kuyasqay churiy Timoteota kachamuchkaykichik, payqa señorninchiktam tukuy sunqunwan servichkan, paymi yuyarichisunkichik Jesucristota+ servikuspay tukuy imata imayna ruwasqayta. Arí, tukuy lawpi huñunakuq llapa iñiqkunaman imayna yachachisqaytam payqa yuyarichisunkichik.
18 Wakiqnikichikqa hatuntukuqllañam kachkankichik, yaqapas qamkunaman manaña hamunayta piensaspaykichik. 19 Jehova* Dios munaptinqa ñam hamusaqña, munachkanim chay hatuntukuqkunata qawaykuyta, ichaqa manam rimasqankuta yachanaypaqchu, aswanqa paykunata Diospa atiynin yanapasqanta utaq mana yanapasqanta yachanaypaqmi. 20 Diosña kamachiwasqanchiktaqa* qawachisun manam rimasqanchikwanchu, aswanqa ruwasqanchikwanmi, ruwasqanchikkunam qawachin Diospa atiynin ñuqanchikpi kasqanta. 21 ¿Imatataq qamkunaqa munankichik? ¿Garrotewan+ qamkunaman hamunaytachu icha kuyakuywan hinaspa llampu sunqulla hamunaytachu?