Job
23 Jobñataqmi nirqa:
2 “Imataña niwaptikichikpas ñuqaqa hinallam rimarisaq,+
ñakarisqayraykum kallpaypas manaña kanchu.
3 ¡Amalaya yachaykuyman maypi Diosta tariyta!+
Yachaspayqa chaymanchiki maskaq riyman.+
4 Chayna kaptinqa paymanchiki llakiykunata willakuyman,
paymanchiki suma-sumaqta willakuyman,
5 imam niwasqantachiki sumaqta yachaykuyman,
imam niwasqantachiki sumaqta uyariykuyman.
6 ¿Yaqachu payqa tukuy atiyniyuq kachkaspanpas contraypi hatarinman?
Manam, aswanqa sumaqtaraqchá uyariykuwanman.+
7 Payqa allin ruwaq runapa sasachakuyninkunatapas allichanmi,
juezniyqa sasachakuyniytam wiña-wiñaypaq allicharunman.
8 Ichaqa manam tarimunichu intipa qispimunan lawman rispaypas,
manam tarimunichu intipa siqaykunan lawman rispaypas.
9 Ichuq* lawniypi llamkaptin qawarispaypas manam rikunichu,
alliq* lawninman pay muyurimuptinpas ñuqaqa manam rikunichu.
10 Ichaqa payqa yachanmi imayna kawsakusqayta.+
Allin kawsakusqayta yachaykuptinqa quri hinam paypaqqa kasaq.+
11 Ñuqaqa paypa imapas niwasqanman hinam kawsakurqani,
mana maymanpas rispam paypa ñannillanta purirqani.+
12 Tukuy ima kamachiwasqankunatam kasukurqani,
kamachikuyninkunataqa sunquy ukupim waqaycharqani.+
13 Ima ruwayta munaptinpas, ¿pitaq harkakunman?+
Payqa imatapas ruwayta munaspanqa ruwanpunim.+
14 Payqa ñuqapaq imapas tantiasqantam lliwta ruwanqa,
ñuqapaq imapas tantiasqankunaqa achka-achkam kachkan.
15 Chayraykum paytaqa manchakuni,
paypi yuyaymanaspayqa katkatataniraqmi.
16 Paytaqa manam ima niytapas atinichu,
tukuy atiyniyuq Diostaqa manchakunim.
17 Ichaqa uyaytaña taparuspanpas
llumpa-llumpay tutayayqa manaraqmi upallachiwanraqchu”, nispa.