2 Cronicas

35 Josiasmi Jerusalen llaqtapi pascua punchawta+ Jehova Diospaq ruwachirqa, hinaspam punta kaq killapa 14 punchawninpi+ animalkunata nakachirqa.+ 2 Sacerdotekunatapas imam ruwanankupim churarqa, hinaspam kallpancharqa Jehova Diospa wasinpi ruwayninkuta ruwanankupaq.+ 3 Israel runakunata yachachiqtawan+ Jehova Diospaq sapaqchasqa Leviy ayllukunatam nirqa: “Diospa baulninta Davidpa churin Salomonpa ruwachisqan wasiman churaychik.+ Chaynapi amaña hombronaykichikpaq.+ Kunanqa Jehova Diospaqwan runankunapaqyá llamkaychik. 4 Alistakuychik aylluykichikman hina hinaspa Israel nacionta kamachiq Davidpa+ chaynataq churin Salomonpa rakisqanman hina.+ 5 Israelpa mirayninkunaqa ayllunkuman hinam Diospa wasinpa kasqanpi kachkanku, sapa ayllukunata yanapanaykichikpaqyá churakuychik. 6 Pascuapaq animalkunata wañuchiychik,+ hinaspayá chuyanchakuspa Israel llaqtamasikichikkunapaq alistaychik, chaynapi Moisesman Jehova Diospa nisqanta ruwanaykichikpaq”, nispa.

7 Josiasmi pascuata ruwanankupaq chaypi kaqkunaman qurqa kikinpa animalninkunamanta 30.000 malta carnerokunatawan chivochakunata hinaspa 3.000 torokunata.+ 8 Kamachiypi yanapaqninkunapas sunqumantam qurqaku runakunapaq, sacerdotekunapaq, Leviy ayllukunapaq. Diospa wasinmanta nanachikuq Hilkiaspas,+ Zacariaspas chaynataq Jeyelpas sacerdotekunamanmi pascuapaq qurqaku 2.600 ovejakunatawan cabrakunata hinaspa 300 torokunata. 9 Leviy ayllupi kamachiqkunapas ayllunkumanmi qurqaku 5.000 ovejakunatawan cabrakunata hinaspa 500 torokunata. Paykunam karqaku Conanias, wawqin Semayawan Natanael, Hasabias, Jeiel hinaspa Jozabad.

10 Tukuy imam pascuapaq alistasqaña karqa. Josiaspa kamachisqanman hinataqmi sacerdotekunapas maymi kanankupiña karqaku,+ Leviy ayllukunapas imayna rakisqa kasqankuman hinam churasqa karqaku. 11 Chaymantam pascuapaq animalkunata nakarqaku.+ Leviy ayllumanta kaqkuna qaranta chustuptinkum+ sacerdotekunañataq paykunapa haywasqanku yawarta altarman challarqaku.+ 12 Chaymantañataqmi nakasqanku animalkunata rakinarqaku sapa ayllukunaman qunankupaq, chaynapi Moisespa qillqasqan kamachikuyman hina Jehova Diospaq kañapunankupaq. Chaynatam ruwarqaku torokunawanpas. 13 Imayna ruwanankuman hinam pascuapiqa aychata yanurqaku*.+ Diospaq sapaqchasqa kaqkunatañataqmi yanurqaku mankakunapiwan sartenkunapi. Hinaspam runakunaman utqayman aypurqaku. 14 Chaymantam Leviy ayllukunaqa kikinkupaqwan Aaronpa miraynin sacerdotekunapaq pascua mikuyta ruwarqaku. Chaynataqa ruwarqaku sacerdotekuna tutaykuqkama animalkunatawan wirakunata kañasqankuraykum.

15 Asafpa+ takiq churinkunañataqmi maymi kanankupi karqaku Davidpa,+ Asafpa,+ Hemanpa hinaspa Jedutunpa+ kamachisqanman hina. Jedutunqa karqa kamachiqpa musquypi hina* qawaq runanmi. Punku cuidaqkunapas sapa punkupim karqaku. Paykunaqa maymi kasqankupim qipakurqaku Leviy ayllumasinku paykunapaq mikuyta ruwasqanrayku.+ 16 Chaynapimá chay punchawqa Josiaspa kamachisqanman hina pascuata ruwanankupaq+ hinaspa Jehova Diospaq animalkunata kañanankupaq tukuy imata alistarqaku. Alistarqakuqa Jehova Diospa kamachisqanman hinam.+

17 Israel runakunaqa chay punchawmi pascuata ruwarqaku. Mana levadurayuq tantata ruwana punchawtañataqmi qanchis punchaw yuyarirqaku.+ 18 Israel runakunaqa Diosmanta willakuq* Samuelpa punchawninmantaraqmi chayna pascuataqa mana ruwarqakuchu. Manamá Josiaspa ruwachisqan pascuata hinaqa Israel runakunapa mayqin kamachiqninpas ruwachirqachu.+ Josiaspa ruwachisqanpim karqaku sacerdotekuna, Leviy ayllukuna, Juda runakuna, Israel runakuna hinaspa Jerusalen llaqtayuqkuna. 19 Josiasqa chay pascuataqa ruwachirqa 18 wataña kamachichkaspanmi.

20 Chaykunamanta qipatam Diospa wasinta* Josias allicharachisqanmanta qipaman Egiptota kamachiq Neko+ peleaq hamurqa Eufrates mayupa waqtan Carkemis llaqtaman. Hinaptinmi Josiasqa paywan peleananpaq lluqsirqa.+ 21 Chaymi Nekoqa Josiasman willachimurqa: “Kamachiq Josias, ¿imanachkaykitaq qamtaqa? Manam qanwan peleaqchu hamuchkaniqa, aswanqa huk nacionwan peleaqmi. Diostaqmi kamachiwan utqayman rinaypaq. Chaynaqa, amayá yanapawaqniy Diostaqa harkakuychu, yanqañataq wañurachisunkiman”, nispa. 22 Chaywanpas, Josiasqa manam Nekopa nisqantaqa kasukurqachu Dios kamachichkaptinpas. Aswanqa mana riqsichikunanpaq hina pachakuruspanmi+ Meguido pampaman+ rirqa Nekowan peleaq.

23 Hinaptinmi Josiastaqa flecharurqaku, chaymi runankunata nirqa: “Hurquwaychik kaymanta, flecharamuwankum”, nispa. 24 Hinaptinmi runankunaqa carretanmanta hurquspanku huk carretapiña Jerusalenman apamurqaku. Chaypi wañukuptinmi pamparurqaku ñawpaq abuelonkunapa pampakusqanpi.+ Josias wañukuptinmi Jerusalenpi yachaqkuna chaynataq Juda nacionpi kaq wakin llaqtakunapi yachaqkuna* anchata llakikurqaku. 25 Jeremiasmi+ Josiasmanta aya takita takirqa. Kunankamapas aya takita takiqkunaqa qaripas warmipas Josiasta yuyarispankum takinku.+ Chaymantapacham chay takikunataqa Israel runakuna takinanku karqa. Chaykunaqa qillqasqam kachkan aya takikunapa kasqanpi.

26 Josiaspa imayna kawsakusqanmantaqa, Jehova Diosta kuyaspan* kamachikuyninkunata kasukusqanmantaqa 27 chaynataq imakuna ruwasqanmantaqa Israel naciontawan Juda nacionta kamachiqkunamanta willakuq libropim qillqasqa kachkan.+