Josuey
7 Israelpa mirayninkunaqa llaqtapi imakunapas chinkachisqa kananmanta kamachikuytaqa manam kasukurqakuchu. Asan* sutiyuq runamá chinkachisqa kananpaq kaqta apakurqa,+ chayraykum Jehova Diosqa llumpa-llumpayta Israelpa mirayninkunapaq piñakururqa.+ Asanqa karqa Juda ayllumanta kaq Zerapa mirayninmanta Zabdipa willkan hinaspa Carmipa churinmi.
2 Josueymi Jerico llaqtamanta Hai llaqtaman rinanpaq runakunata kamachirqa.+ Hai llaqtaqa karqa Bet-aven llaqtapa hichpanpim hinaspa Betel llaqtapa inti qispimunan lawpim.+ Kamachisqan runakunatam Josueyqa nirqa: “Qispispaykichikyá chay llaqtata qawaramuychik”, nispa. Chaymi runakunaqa qispispanku Hai llaqtata qawamurqaku. 3 Kutiramuspankuñataqmi Josueyta nirqaku: “Peleaqqa amañayá llapankuqa rikuchunkuchu, 2.000 utaq 3.000 runakunallapaqmi Hai llaqtaqa kachkan. Amañayá llapallankutaqa pisipachiychu, chay llaqtapi runakunaqa asllam kasqaku”, nispa.
4 Chaymi yaqa 3.000 runakunalla qispirqaku, ichaqa Hai llaqtayuq runakunamantam ayqikamurqaku.+ 5 Hinaptinmi Hai llaqtayuq runakunaqa Israelpa mirayninkunamanta 36 runakunata wañurachirqaku. Paykunaqa llaqtankupa punkunmantam Sebarimkama* qatirqaku, urayninpaman qatispankum wañuchirqaku. Chayraykum Israelpa mirayninkunaqa sunqunku hukmanyaruptin llumpayta mancharikurqaku.
6 Hinaptinmi Josueyqa pachantapas llikispan Jehova Diospa baulninpa ñawpaqninpi qunqurakuykuspan kumuykurqa. Chaynatam ruwarqaku Israelpa mirayninkunapi punta apaqkunapas. Umankuman allpata maqchikuspankum tutaykuqkama karqaku. 7 Josueymi nirqa: “Llapallan kamachiq Jehova Dioslláy, ¿imapaqtaq kay runallaykikunataqa Jordan mayutapas chimpachimuwaspaykiku pusamuwarqankiku? ¿Amorreo runakunapa makinman churaykuwaptikiku wañuchiwanankupaqchu pusamuwarqankiku? ¡Aswan allinchá kanman karqa Jordan mayupa waklaw chimpanpi* hawka qipakamuyniykuqa! 8 Pampachaykullaway Jehova Dioslláy. ¿Ima niymantaq Israelpa mirayninkuna chiqniqninkumanta kunan ayqikamuchkaptinkuqa? 9 Canaan runakunawan kay allpapi yachaqkunachiki* chayta uyariruspanku muyuriruwanqaku, hinaspachiki sutiykutapas kay allpa pachamanta chinkarachinqaku. Hinaptinqa, ¿imatataq qamqa ancha riqsisqa sutikirayku ruwanki?”, nispa.+
10 Hinaptinmi Jehova Diosñataq Josueyta nirqa: “¿Imanasqataq pampapi pakcharayachkanki? ¡Hatariy! 11 Israelpa mirayninkunaqa huchallikurunkum. Paykunaqa ñawpaqpi contrato* ruwasqaykuta mana kasukuspankum mana allinta ruwarunku.+ Chinkachisqa kananpaq kaqtam hapikuykunku,+ hinaspam kapuqninkupa kasqanpi pakarunku.+ 12 Chaymi Israelpa mirayninkunaqa chiqniqninkuta imanaytapas mana atinqakuchu, aswanqa ayqikamunqakum. Israelpa mirayninkunaqa chinkachisqa kanankupaq hinañam rikurirunku. Chinkachisqa kananpaq kaqta chinkachinaykichikkamam mana qamkunawanqa kasaqchu.+ 13 ¡Hatariy! Israelpa mirayninkunatayá listolla kanankupaq niy:+ ‘Listollam paqarinpaqqa kanaykichik. Israelpa mirayninkunapa Jehova Diosninmi nin: “Israelpa mirayninkuna, chinkachisqa kananpaq kaqmi qamkuna ukupi kachkan. Chiqnisuqnikichik runakunataqa manam imanaytapas atinkichikchu chinkachisqa kananpaq kaqta qamkuna ukumanta chinkachinaykichikkama. 14 Paqarin achikyaqtam 12 ayllukuna huñunakunkichik. Hinaptinmi Jehova Diospa akllasqan+ mirayñataq ayllun-ayllun asuykamunqa. Jehova Diospa akllasqan ayllumantañataqmi wasin-wasin asuykamunqa. Jehova Diospa akllasqan wasimantañataqmi sapa qari asuykamunqa. 15 Chinkachisqa kananpaq kaqta apakuq runañataqmi ayllunwan kuska tukuy imantin kañasqa kanqa.+ Payqa ñuqa Jehova Dioswan contrato ruwasqaykuta mana kasukuspanmi+ Israelpa mirayninkuna ukupi pinqaypaq kaqta ruwarun”’”, nispa.
16 Chaymi Josueyqa paqarintinta tuta-tuta hatariruspan 12 Israel ayllukunata qayachimurqa. Hinaptinmi Juda ayllu akllasqa karqa. 17 Juda ayllumanta kaqkuna asuykuptinñataqmi Zerapa ayllun akllasqa karqa.+ Zerapa ayllun sapakama asuykuptinñataqmi Zabdi akllasqa karqa. 18 Chaymantañataqmi Zabdipa wasinpi qarikuna sapakama asuykurqaku. Hinaptinmi Carmipa churin Asan sutiyuq runa akllasqa karqa. Carmiqa karqa Zabdipa churinmi, Zabdiñataqmi karqa Juda ayllumanta kaq Zerapa miraynin.+ 19 Chaymantam Josueyqa Asanta nirqa: “Churilláy, Israelpa yupaychasqan Jehova Diosraykuyá imam kaqta willakuy. Ama hina kaspayá Diospa qayllanpi mana pakawaspayki imam ruwasqaykita willaykuway”, nispa.
20 Asanñataqmi Josueyta nirqa: “Arí, ñuqam yupaychasqanchik Jehova Diospa qayllanpi huchallikuruni. Kaykunatam ruwaruni: 21 Llaqtapi imapas puchuqkunamantam rikururqani Sinar lawmanta+ kaq achka qullqipa chanin kuyayllapaq pachata, iskay kilo* qullqita hinaspa medio kilo* qurita. Chaykunata munapayaruspaymi apakurqani, chaykunaqa carpaypa chawpinpim pampasqa kachkan, qullqipas chaykunapa ukunpim pakasqa kachkan”, nispa.
22 Chaymi Josueyqa runakunata chaylla kamachirqa. Paykunañataqmi Asanpa carpanman kallpaylla* rispanku sumaqllaña pachata hinaspa ukunpi pakasqa quritawan qullqita tarirurqaku. 23 Tukuy chaykunata carpanmanta hurquspankum Josueyman hinaspa Israelpa lliw mirayninkunaman aparqaku, hinaspam Jehova Diospaq churarqaku. 24 Chaymantam Josueywan Israelpa lliw mirayninkunaqa Zerapa miraynin Asanta,+ churinkunatawan, toronkunatawan, asnonkunatawan hinaspa ovejankunatawan kuskata Acor sutiyuq pampaman+ pusarqaku. Aparqakutaqmi suwakusqan qullqitapas, pachatapas, quritapas+ chaynataq carpantawan tukuy ima kapuqninkunatapas. 25 Josueymi Asanta nirqa: “¿Imanasqamá kay ñakariymanqa churaruwankiku?+ Kunanmi Jehova Dios ñakarichisunki”, nispa. Hinaptinmi Israelpa mirayninkunaqa rumiwan chamqapaspa wañurachirqaku,+ chaynatam llapankuta wañurachispanku kañaykurqaku.+ Llapallantamá rumiwan chamqaparurqaku. 26 Chaymantapas Asanpa hawanmanmi rumikunata muntururqaku, chaynam kunankamapas kachkan. Chayraykum chay pampataqa Acorwan* kunankama sutichanku. Chayñam Jehova Diosqa llumpay piñakusqanmanta hawkayaykurqa.+