2 Tesalonicenses
Kayqa Tesalonica llaqtapi iñiqkunaman iskay kaq cartam.
1 Ñuqa Pablom, Silvanowan* hinaspa Timoteowan,+ Tesalonica llaqtapi huñunakuq iñiqkunaman qillqamuykiku. Qamkunaqa Dios taytanchikwan hinaspa señor Jesucristowanmi huklla kachkankichik:
2 Qamkunapaqyá kachun taytanchik Diospa hinaspa señorninchik Jesucristopa ancha kuyakuynin* chaynataq hawkayaynin.
3 Wawqi-panillaykuna, qamkunamantam Diosta tukuy tiempo agradecekuniku. Chayqa allinmi, chaynataqa ruwanayku qamkunapa Diospi iñisqaykichik anchata yapakusqanraykum chaynataq sapakamapa hinaspa llapallaykichikpa kuyanakuynikichik yapakusqanraykum.+ 4 Chaymi ñuqaykuqa Diospi iñiqkunapa qayllanpi qamkunamanta alabakuniku,+ alabakunikuqa ñakarichisqa kachkaspaykichikpas hinaspa sasachakuykunapi kachkaspaykichikpas allinta takyasqaykichikmantam hinaspa Diospi anchata iñisqaykichikmantam.+ 5 Tukuy chaykunam qawachin Diospa juzgasqanqa allin kasqanta, chaymantapas chaykunawanmi qamkunaqa Dios kamachiptin* chaypi kanaykichikpaq hina kachkankichik, chayraykutaqmi ñakarichkankichikpas.+
6 Yachasqaykichikpi hinapas allinmi ñakarichisuqnikichik runakunata ruwasusqaykichikman hina Diospa ruwayninqa.+ 7 Kunan ñakariqkunamanqa hawkayaytam qusunkichik ñuqaykumanwan kuskata, chaynaqa kanqa señor Jesus+ hanaq pachamanta atiyniyuq angelninkunawan rupachkaq ninapi rikurimuptinmi.+ 8 Chay tiempopim payqa vengakunqa Dios mana riqsiqkunatawan señorninchik Jesusmanta sumaq willakuyta mana kasukuqkunata.+ 9 Chay runakunaqa wiñaypaq chinkachisqa+ kaspankum señorninchikpa qayllanpipas manaña kanqakuñachu, manañataqmi suma-sumaq atiyninwanpas yanapachikunqakuñachu, 10 chayqa kanqa hatunchasqa kananpaq chuya runankunawan kuska señorninchik hamuptinmi chaynataq chay punchawpi paypi llapa iñiqkunapa admirasqan kananpaq hamuptinmi, qamkunaqa ñuqaykupa willakusqaykutam chiqap kasqanpaq hapirqankichik.
11 Chayraykum qamkunapaq tukuy tiempo Diosta mañapuykiku. Diosninchikyá qayasusqaykichikman hina+ allinpaq hapisunkichik, hinaspanyá atiyninwan tukuy ruway munasqanta cumplichun, cumplichuntaqyá mana iskayrayaspa tukuy ima ruwasqaykichiktapas. 12 Chaynapi señor Jesuspa sutin qamkunawan hatunchasqa kananpaq, qamkunapas paywan huklla kasqaykichikrayku hatunchasqa kanaykichikpaq, chaynaqa kanqa Dios taytanchik chaynataq señorninchik Jesucristo anchata kuyasusqaykichikraykum*.