Salmos
Takiqkunata yachachiqpaq. Mut-labenmanta* Davidpa takisqan.
א [alef]
9 Jehova Dioslláy, tukuy sunquywanmi hatunchasqayki.
Tukuy ima unanchasqaykimantam willakusaq.+
2 Qamraykum ancha kusisqa kasaq.
Hanaq pachapi Dioslláy, takispaymi sutikita hatunchasaq.+
ב [bet]
3 Chiqniwaqniykunaqa ayqikuspankum+
qampa ñawpaqnikipi wichiykuspa wañunqaku.
4 Qamqa allin juez kaspaykim yanapawanki.
Tronoykipi tiyaykuspaykim allin kaqta ruwanki.+
ג [guimel]
5 Nacionkunatam qaqcharqanki,+ mana allin ruwaqkunatam chinkachirqanki.
Paykunapa sutintapas wiña-wiñaypaqmi chinkarachirqanki.
6 Chiqnisuqnikikunam wiñaypaq chinkachisqa karqaku.
Llaqtankutapas purmarachispaykim
qalaypaqta chinkarachirqanki.+
ה [he]
7 Jehova Diosmi ichaqa trononpi wiñaypaq tiyanqa.+
Quejakunata allichananpaqmi trononta alistarun.+
8 Payqa runakunapa allin juezninmi kanqa.+
Pimanpas mana sayapakuspam jueznin kanqa.+
ו [waw]
9 Jehova Diosqa ñakarichisqa kaqkunatam pakaykunqa.+
Payqa sasachakuy punchawkunapi pitapas pakaykuqmi.+
10 Sutikita yachaqkunaqa qampim hapipakunqaku.+
Jehova Dioslláy, maskasuqnikikunataqa manam haykapipas saqinkichu.+
ז [zayin]
11 Sion muqupi yachaq* Jehova Diospaqyá takipuychik.
Imapas ruwasqankunamantayá runakunaman willaychik.+
12 Diosqa ñakariqkunataqa manam qunqanqachu.+
Paykunata wañuchiqtaqa Diosmi wañuchinqa.+
ח [jet]
13 Jehova Dioslláy, llakipayariykullawayá.
Chiqniwaqniykunapa ñakarichiwasqantayá qawarimuy.
Wañuypa patanmantam libraykullawanki.+
14 Libraykullawankiqa tukuy imapas allinkuna ruwasqaykimanta willakunaypaqmi. Chaytaqa willakusaq Sion llaqtapim.+
Libraykuwasqaykiraykutaqmi kusikusaq.+
ט [tet]
15 Nacionkunaqa kikinkupa uchku ruwasqallankumanmi wichiykunku.
Kikinkupa tuqlla churasqallankumanmi wichiykunku.+
16 Jehova Diosqa imapas tantiasqantaqa cumplinpunim.+
Mana allin runaqa kikinpa tuqlla churasqallanmanmi wichiykun.+
(Higayon*. Samarinapaq).
י [yod]
17 Mana allin runaqa ayqisqanpim wañusqakunapa kasqanpi* tukunqa.
Chaynam pasanqa Diosta qipanchaq llapallan runakunawanpas.
18 Wakchakunam ichaqa mana wiñaypaqchu qunqasqa kanqaku.+
Llampu sunqu runakunaqa chaskinqakupunim imapas suyasqankutaqa.+
כ [kaf]
19 ¡Jehova Dioslláy, hatarimuyá! Runaqa amayá hatuntukuchunchu.
Qamyá nacionkunapa jueznin kay.+
20 Jehova Dioslláy, paykunatayá mancharichiy.+
Wañuruqlla kasqankutayá paykunaqa yachachunku. (Samarinapaq).