Ezequiel
28 Jehova Diosqa kaqmanta rimapayawaspanmi niwarqa: 2 “Runapa churin, Tiro llaqtapi munaychakuqtayá niy:
‘Llapallan kamachiq Jehova Diosmi nisunki:
“Hatuntukuyta qallaykuspaykim+ nichkanki: ‘Dios hinam kani.
Ñuqaqa lamar quchapa patanpi kasqayraykum Diospa tiyananpi hinaña kachkani’, nispa.+
Ichaqa Diospaq hapikuspaykipas qamqa runallam kanki.
3 Qamqa Danielmantapas aswan yachayniyuqpaqmi hapikunki,+
qamqa mana yachana kaqkunata yachaqpaqmi hapikunki.
4 Yachayniyuq hinaspa yuyayniyuq kasqaykiraykum apuyarunki,
qamqa hinallam quri-qullqi waqaychanaykiman quri-qullqita huñukuchkanki.+
5 Negociopi allinta llamkasqaykiraykum astawanraq tukuy imata huñukurunki,+
chaymi tukuy imayuq kasqaykirayku hatuntukuqllaña rikurirunki”, nispa.
6 Llapallan kamachiq ñuqa Jehova Diosmi niki:
“Diospaqña hapikusqaykiraykum
7 paqway mana llakipayakuq runakunata huklaw nacionmanta contraykipi pusamusaq,+
yachaysapa kasqaykirayku sumaqllaña kasqaykitam wañuchisuqniki runakuna chinkachinqa,
kuyayllapaq kaynikim pinqaypaq kanqa.+
8 Wañuchisqam kanki,
lamar qucha patanpim llakikuypaqta wañuchisqa kanki.+
9 Chayna wañuchisqa kachkaspaykipas, ¿Diospaqraqchu hapikuwaq?
Pinqayman churasuqnikikunapa makinpi kaptikim Diospaq hapikusqaykipas yanqapaq kanqa”’, nispa.
10 Llapallan kamachiq ñuqa Jehova Diosmi niki: ‘Qari kayninpi mana señalachikuqkuna hinam
runapa llaqtanpi wañunki chaynata ñuqa nisqayrayku’”, nispa.
11 Jehova Diosqa kaqmanta rimapayawaspanmi niwarqa: 12 “Runapa churin, Tiro llaqtapi kamachiqpaqyá llaki takita takispa niy: ‘Llapallan kamachiq Jehova Diosmi nisunki:
13 Ñuqa Diospa Eden huertaypim karqanki, tukuy rikchaq alaqa rumikunawanmi kuyayllapaq qawakurqanki.
Kuyayllapaqmi qawakurqanki llipipipiq alaqa puka* rumiwan, llipipipiq alaqa qillu* rumiwan, llipipipiq alaqa pukaniraq* rumiwan, llipipipiq alaqa qamya verde* rumiwan,
llipipipiq alaqa yana* rumiwan, llipipipiq alaqa verde allqa* rumiwan, llipipipiq alaqa azul* rumiwan, llipipipiq alaqa celeste* rumiwan+ hinaspa llipipipiq alaqa verde* rumiwan.
Chay rumikunaqa sapakamam karqa qurimanta ruwasqa hapichinayuqkama.
Tukuy chaykunam rikurisqayki punchawmanta karqa.
14 Imamantapas harkaq akllasqay querubin angelniyta hinam churarqayki.
Ñuqapa sapaqchasqay urqupim karqanki,+ ratachkaq rumikunapa kasqanpim purirqanki.
15 Unanchasqa kasqayki punchawmantapacham mana huchayuq hina karqanki,
mana allin ruwayta qallaykusqaykimantam ichaqa manaña.+
16 Achkallaña negociota ruwasqaykiraykum+ mana allin ruwaykuna llumpayta rikurirurqa,
hinaspam huchallikuyta qallaykurqanki.+
Chaymi sapaqchasqay urqumanta qarqusqayki mana chaskisqay runata hina,+
hinaspam ratachkaq rumikunamanta karupi wañuchisqayki imamantapas harkaq querubin hina kachkaptikipas.
17 Kuyayllapaq kasqaykiraykum hatuntukuq rikurirurqanki.+
Ancha riqsisqa rikuriruspam mana yachayniyuq hinaña imatapas ruwayta qallaykurqanki.+
Chayraykum allpaman wischusqayki.+
Kamachiqkunapa qayllanpim pinqayman churasqayki.
18 Llumpayta huchallikuruspa hinaspa mana allin negociokunata ruwaspam yupaychanayki sitiokunata millakuypaqta rikurirachinki.
Chayraykum chawpikipi ninata ratarirachispay kañarusqayki.+
Rikusuqnikikunapa qayllanpim uchpallaña qipanki.
19 Huklaw llaqtakunapi kaq riqsisuqnikikunapas mancharisqallañam qawasunki.+
Chinkanayki punchawqa chayllam chayamunqa, manchakuypaqmi kanqa.
Wiña-wiñaypaqmi chinkanki”’”, nispa.+
20 Jehova Diosqa kaqmanta rimapayawaspanmi niwarqa: 21 “Runapa churin, Sidon+ llaqtata qawarispayá imayna kananmanta willay. 22 Niyá: ‘Llapallan kamachiq Jehova Diosmi nisunki:
“Sidon llaqta, qampa contraykipim kachkani, qanman piñakuyniyta chayachimuspaymi hatunchasqa kasaq.
Qanman piñakuyniyta chayachimuspa hatunchasqa kaptiymi runakuna yachanqa ñuqaqa Jehova Dios kasqayta.
23 Unquykunatam chayachimusqayki, callekikunapas yawarllañam kanqa.
Tukuy lawmanta chiqnisuqnikikuna hamuspam runaykikunata wañuchinqaku,
hinaptinmi chayraq yachanqaku ñuqaqa Jehova Dios kasqayta.+
24 Chaymi Israel runaykunapaqa manaña chiqniqnin runakunaqa kanqachu, chay runakunaqa kichkakuna hinam karqa.+ Hinaptinmi chayraq yachanqaku ñuqaqa llapallan kamachiq Jehova Dios kasqayta”, nispa.
25 Llapallan kamachiq Jehova Diosmi nisunki: “Huklaw llaqtakunaman chiqichisqa kasqankumantam Israel runaykunata huñumusaq,+ hinaptinmi yupaychawaqniy Jacobman qusqay+ allpapi yachanqaku*.+ Chaykunata ruwaspaymi huklaw llaqtayuq runakunapa qawasqanta runaykunapa hatunchasqan kasaq.+ 26 Chay qusqay allpapim runaykunaqa hawka kawsakunqaku,+ wasikunata ruwaspam uvas huertayuqkuna kanqaku.+ Hichpanpi kaq llaqtakunapi chiqniqnin runakunata wañuchiptiymi hawka kawsakunqaku,+ chaynapim yachanqaku ñuqaqa Jehova Dios kasqayta”’”, nispa.