1 Samuel
28 Chay punchawkunapim Filistea soldadokunaqa Israel runakunawan peleanankupaq huñunakururqaku.+ Chaymi kamachiq Akisqa Davidta nirqa: “Qamqa yachankim runaykikunapiwan peleaq riysiwanaykitaqa”, nispa.+ 2 Chaymi Davidñataq nirqa: “Taytalláy, qamqa yachankim riysinaytaqa”, nispa. Hinaptinmi Akisñataq nirqa: “Qamqa wañukunaykamam waqaychawaqniy soldado kanki”, nispa.+
3 Chay punchawkunapaqqa Samuelqa wañukurqañam, chaymi Israel runakunapas llapallanku paymanta waqarqaku. Samueltaqa Rama llaqtanpim pamparurqaku.+ Saulñataqmi Israel runakunapa allpanmanta qarqururqa wañuqkunawan rimaq runakunata hinaspa qawaqkunata.+
4 Filistea runakunam huñunakuruspanku Sunem llaqtaman rirqaku,+ chaypim carpankuta sayachirqaku. Saulpas Israel soldadokunata huñuruspanmi Guilboa muqupi carpanta sayarachirqa.+ 5 Saulmi Filistea soldadokunapa carpankuta rikuruspan llumpayta mancharikurqa.+ 6 Saulqa Jehova Diostapas tapukurqam,+ ichaqa manañam Jehova Diosqa sueñoyninpipas Saultaqa rimapayaqchu. Manataqmi Urim+ nisqawanpas nitaq Diosmanta willakuqkunawanpas* imatapas willachiqchu. 7 Chaymi Saulqa runankunataña nirqa: “Wañuqkunawan rimaq warmitayá maskamuychik,+ tapukuq riytam munani”, nispa. Hinaptinmi runankunañataq nirqaku: “En-dor llaqtapim wañuqkunawan rimaq warmi kachkan”, nispa.+
8 Chaymi Saulqa mana riqsichikunanpaq huk pachawan churakururqa, hinaspam chay warmipata iskay runankunapiwan tutallan rirqa. Chayaruspanmi nirqa: “Qamqa wañuqkunawan rimaqmi kanki,+ ama hina kaspayá ñuqapa nisqay runata qayaspayki hamuq punchawmanta tapuykapuway”, nispa. 9 Chay warmiñataqmi nirqa: “Qamqa allintam yachanki, Saulqa Israel runakunapa allpanmantam qawaq runakunata hinaspa wañuqkunawan rimaq runakunata qarqururqa.+ Chaynaqa, ¿imanasqataq tuqllata hina churawaspayki wañuyman tanqawachkanki?”, nispa.+ 10 Hinaptinmi Saulqa Jehova Diospa sutinpi nirqa: “¡Manapunim pipas imanasunkichu, chaytaqa Jehova Diospa sutinpim niki!”, nispa. 11 Chay warmiñataqmi nirqa: “¿Pita qayanaytataq munanki?”, nispa. Saulñataqmi nirqa: “Samueltam”, nispa. 12 Chay warmiqa “Samuelta*”+ rikuruspanmi qaparirqa, hinaspam Saulta nirqa: “¿Imanasqataq llullakuwanki? ¡Qamqa Saulmi kasqanki!”, nispa. 13 Chaymi kamachiq Saulqa nirqa: “Ama manchakuychu. Niykuway, ¿imatataq rikuchkanki?”, nispa. Chay warmiñataqmi nirqa: “Atiyniyuq rikurimuqtam”, nispa. 14 Saulñataqmi chaylla nirqa: “¿Imaynataq kasqa?”, nispa. Chay warmiñataqmi nirqa: “Mana makituyuq pachawan pachasqa yuyaq runam”, nispa.+ Chaymi Saulqa “Samuel” kasqanta yacharuspan qunqurakuykuspan kumuykurqa.
15 “Samuelmi” Saulta nirqa: “¿Imapaqtaq qayachimuwarqanki hawka kakuqta?”, nispa. Saulñataqmi nirqa: “Sasachakuypim tarikuchkani. Filistea runakunam ñuqawan peleananpaq huñunakurunku. Diospas ñuqamantam karunchakurun, manam sueñoyniypipas nitaq paymanta willakuqwanpas rimapayawanchu.+ Chaymi qayachimurqayki imata ruwanaypaq niykuwanaykipaq”, nispa.+
16 “Samuelñataqmi” nirqa: “¿Imanasqataq tapuwanki Jehova Diospuni qipancharusuchkaptikiqa?+ 17 Ñawpaqta willachiwasqanman hinam Jehova Diosqa Davidtaña kamachiq kananpaq churanqa. Jehova Diosmi kamachiq kasqaykimanta qarqusunki.+ 18 Jehova Diosta piñachiq llapallan Amalec runakunata wañuchinaykipaq kamachisuptikim mana kasukurqankichu.+ Chaymi Jehova Diosqa qipanchasuchkanki. 19 Chaymantapas, Jehova Diosqa qamta hinaspa Israel runakunatam Filistea runakunapa makinman churaykusunkichik.+ Paqarinmi+ churikikunawan+ kuska ñuqawan kanki. Jehova Diosqa Israel soldadokunatamá Filistea runakunapa makinman churaykunqa”, nispa.+
20 Chaynata niykuptinmi Saulqa pampaman wichiykurqa. Payqa “Samuelpa” nisqanwanmi llumpayta mancharikurqa. Mana kallpayuqmi tarikurqa tukuy punchaw hinaspa tukuy tuta mana mikusqanrayku. 21 Chay warmim Saulman asuykuspan hukmanyasqata qawaykurqa, hinaspam nirqa: “Taytáy, wañuytapas mana manchakuspaymi+ imam niwasqaykita kasukurqani. 22 Kunanñataqyá taytáy, ñuqapa nisqayta uyariykuway. Parten tantallatapas mikuykuyá kallpata hapispa kutinaykipaq”, nispa. 23 Saulñataqmi mana munaspan nirqa: “Manam imatapas mikusaqchu”, nispa. Ichaqa Saulpa runankunawan chay warmi hikutaptinmi pampamanta hatarispan camapi tiyaykurqa. 24 Chay warmipam wasinpi karqa puqusqa malta toron, chay torotam utqayman nakaspan yanururqa. Chaymantapas harinata chapuspanmi mana levadurayuq tantata ruwarurqa. 25 Chaykunata Saulman hinaspa runankunaman quykuptinmi mikurqaku. Chaymantam chay tutalla pasakurqaku.+