1 Cronicas
10 Filistea runakunam Israel runakunawan peleachkarqaku. Israel runakuna ayqikuptinkum Guilboa muqupi achkallay-achkata wañurachirqaku.+ 2 Saultawan churinkunata Filistea runakuna qatispankum Jonatanta, Abinadabta hinaspa Malkisuata+ wañurachirqaku. 3 Saulta wañurachiyta munaspankum qatirqaku. Flechaqkunaqa Saulta rikuruspankum flecharurqaku, chaymi yaqalla wañururqa.+ 4 Hinaptinmi Saulqa yanapaqninta* nirqa: “Espadaykita hurquspayki tuksiruway. Manam munanichu Diosta mana yupaychaq* runakuna hamuspanku ñakarichiwanantaqa”, nispa.+ Yanapaqninqa manam wañuchiyta munarqachu llumpayta manchakusqanrayku. Chaymi Saulqa espadata hapiykuspan kikinña tuksikururqa.+ 5 Saul wañuruptinmi yanapaqninpas espadanwan tuksikuruspan wañururqa. 6 Chaynapimá Saulpas, kimsan churinkunapas chaynataq paywan kaqkunapas wañururqaku.+ 7 Israel tropakunapa ayqikusqantam rikururqaku pampapi yachaq* Israel runakuna, yacharurqakutaqmi Saulwan churinkuna wañurusqankutapas. Chaymi llaqtankuta saqispanku ayqikurqaku. Chaymantam Filistea runakunaña hamuruspanku chaypi yachakurqaku.
8 Paqarintintam Filistea runakunaqa wañuqkunapa tukuy imanta huqarikuq rirqaku. Hinaspam Guilboa muqupi tarirurqaku Saulpa chaynataq churinkunapa ayanta.+ 9 Saulpa pachanta llatanaruspankum umanta qururuspanku tukuy imanta* apakurqaku. Hinaspankum willakuqkunata kacharqaku Filistea runakunapa yachasqan lliw llaqtakunapi willakamunankupaq hinaspa taytacha-mamachankupa kasqanpi willakamunankupaq.+ 10 Taytachankuta yupaychananku wasipim Saulpa tukuy imantaqa churarqaku, Saulpa umantañataqmi taytachanku Dagonpa wasinpi churarqaku.+
11 Filistea runakunam Saulpa ayanta tukuyta ruwarqaku.+ Chaytam Galaad lawpi Jabes llaqtayuqkuna+ yacharurqaku. 12 Hinaptinmi chay llaqtayuq llapallan soldadokunaqa Saulpa chaynataq churinkunapa ayanta Jabes llaqtaman aparqaku. Hinaspankum Jabes llaqtapi+ hatun sachapa sikinpi pamparurqaku, hinaspam qanchis punchaw ayunarqaku.
13 Chaynapimá Saulqa wañururqa Jehova Diosta qipanchasqanrayku+ hinaspa wañuqkunawan rimaq warmita tapukusqanrayku.+ Saulqa Jehova Diospa nisqankunatam mana kasukurqachu. 14 Jehova Diosta tapukunanmantaqa huktam tapukurqa. Chayraykum Diosqa wañurachispan Jeseypa churin Davidtaña kamachiq kananpaq churarurqa.+