1 Samuel
10 Chaymantam Samuelqa Saulpa umanman aceiteta tallirqa,+ hinaspam muchaykuspan nirqa: “Jehova Diosmi akllaykusunki runankunata kamachinaykipaq”, nispa.+ 2 Hinaspapas nirqaraqmi: “Kaymanta rispaykim Benjamin ayllupa allpan ukupi Raquelpa pampakusqan+ Zelza lawninta rinki, chaypim iskay runakunawan tupanki. Hinaptinmi paykuna nisunki: ‘Maskasqayki asnokunataqa tarirunkuñam. Chay asnokunamantaqa manañam taytaykiqa llakikunñachu,+ aswanqa qamkunamanta llakikuspanmi nichkan: “Churiymi mana kutiykamunchu, ¿imatataq ruwasaq?”’, nispa. 3 Chaymanta rispaykim Tabor lawpi hatun sachapa kasqanman chayarunki. Chaypiñataqmi tupanki Diosta yupaychanankupaq Betelman riq kimsa runakunawan.+ Hukninmi rinqa kimsa chivochayuq, hukninñataqmi kimsa tantayuq, hukninñataqmi puyñupi vinoyuq. 4 Paykunam imayna tarikusqaykimanta tapusunki, hinaspam iskay tantata qusunki. Chaytaqa chaskikunkim. 5 Chaymanta rispaykim chayanki Diosta yupaychana muquman, chaypim kachkan achkallaña Filistea soldadokuna. Llaqtaman chayaruspaykiñataqmi rikunki Diosmanta willakuq achka runakunata* muqumanta uraykamuchkaqta. Paykunaqa Diosmanta willakustinmi pasanqaku, ñawpaqninkutam runakuna rinqaku tinyata, quenata, arpata hinaspa cuerdayuq kaqta tocastin. 6 Chaypim qamtapas Jehova Diospa atiynin huntaykusunki,+ hinaptinmi qampas Diosmanta willakustinña paykunawan rinki. Huk runa hinañam rikurirunki.+ 7 Chay nisqayman hina pasasuptikiqa atisqaykiman hinam imatapas ruwanki, Diosmi qanwan kachkan. 8 Chaymantam Guilgal llaqtaman rinki,+ hinaspam qanchis punchaw suyawanki. Chaymanmi hamusaq animalkunata Diospaq kañanaypaq, nakapusaqtaqmi Dioswan hawkalla kasqanchikraykupas. Chay llaqtapiñam imata ruwanaykipaq nisqayki”, nispa.
9 Samuelpa kasqanmanta Saul pasakuptinmi Diosqa Saulpa piensayninta huk runapata hinaña rikurirachirqa. Chay punchawllam Samuelpa lliw nisqankuna cumplikurqa. 10 Chaymantam Saulqa sirvientenpiwan muquman chayarurqaku, chaypim tuparurqaku Diosmanta willakuqkunawan. Chayllam Diospa atiyninqa Saulman huntaykurqa,+ hinaptinmi Saulpas paykunaman hukllawakuykuspa Diosmanta willakurqa.+ 11 Diosmanta willakuqkunawan kuskata hinaspa paykuna hina rimaqtaña qawaspankum Saulta riqsiqkunaqa ninakurqaku: “¿Imataq pasarun Quispa churin Saultaqa? ¿Saulpas Diosmanta willakuqñachu?”, nispa. 12 Hinaptinmi huk runa nirqa: “¿Pitaq paykunapa taytanqa?”, nispa. Chaymantapacham “¿Saulpas Diosmanta willakuqñachu?” niq rimay rikurirqa.+
13 Diosmanta willakuq hina rimayta tukuruspanmi Saulqa Diosta yupaychana muquman rirqa. 14 Chaymantañataqmi Saultawan sirviententa taytanpa wawqin nirqa: “¿Maytataq rirqankichik?”, nispa. Saulñataqmi nirqa: “Asnokuna maskaqmi,+ ichaqa mana tarispaykum Samuelta tapukuq rirqaniku”, nispa. 15 Chaymi Saulpa tion nirqa: “¿Imatataq nimusurqankichik Samuelqa? Willaykuwaychikyá”, nispa. 16 Saulñataqmi nirqa: “‘Asnokunataqa tarirunkuñam’ nispanmi willawarqaku”, nispa. Ichaqa, Saulqa manam willarqachu Israel runakunapa kamachiqnin kananpaq akllasqa kasqanmanta Samuelpa nisqantaqa.
17 Samuelmi Jehova Diospa nisqanta uyarinankupaq Israel runakunata Mizpa llaqtaman qayarachirqa.+ 18 Hinaspam Israel runakunata nirqa: “Jehova Diosninchikmi nin: ‘Ñuqam Israelpa mirayninkunata Egipto nacionmanta hurqumurqani,+ paykunapa makinmanta hinaspa ñakarichiqnin llaqtakunamantam hurqumurqani. 19 Chaywanpas qamkunaqa, sasachakuymanta hinaspa ñakariymanta hurqusuqnikichik ñuqa Diosnikichiktam qipancharuwankichik.+ Ninkichikraqmi: “¡Manam imananchu! Kamachiwanankupaq huk runata akllapuwayku”, nispa. Chaynaqa, kunanyá ñuqa Jehova Diospa qayllayman huñunakamuychik kastapura hinaspa ayllupura’”, nispa.
20 Chaymi Samuelpa kasqanman Israel ayllukuna asuykurqaku,+ hinaptinmi Benjamin ayllu akllasqa karqa.+ 21 Chaymantam Samuelqa Benjamin ayllumanta sapa ayllu asuykunanpaq nirqa, hinaptinmi Matrita ayllu akllasqa karqa. Chay ayllumantañataqmi akllasqa karqa Quispa churin Saul.+ Chaymi Saulta maskarqaku, ichaqa manam tarirqakuchu. 22 Chaymi Jehova Diosta tapukurqaku:+ “¿Kaypichu chay maskasqayku runa tarikun?”, nispa. Hinaptinmi Jehova Diosqa nirqa: “Qipikunapa chawpinpim pakakuchkan”, nispa. 23 Chaymi kallpaylla* rispanku pusaramurqaku, hinaspam lliw runapa chawpinpi sayaykachirqaku. Hinaptinmi hatunkaray kasqanrayku llapa runakunapas hombronkamalla chayarqa.+ 24 Samuelmi runakunata nirqa: “¡Qawaychik Jehova Diospa akllasqan runata!+ Israel runakuna ukupiqa manam pipas pay hinaqa kanchu”, nispa. Chaymi runakunaqa qaparispanku nirqaku: “¡Unaytayá kawsakuchun kamachiqninchikqa!”, nispa.
25 Chaymantam Samuelqa runakunaman willarqa kamachiqninku runaman imakunata qunankumanta.+ Chaytam huk libropi qillqarqa, hinaspam Jehova Diospa carpanman aparqa. Chaymantañataqmi lliw runata nirqa wasinkuman kutikunankupaq. 26 Saulpas Guibea llaqtapi wasinmanmi kutikurqa soldadokunawan kuska, chay soldadokunatam Saulwan rinanpaq Jehova Dios kallpanchaykurqa. 27 Ichaqa, mana allin runakunam nirqaku: “¿Imaynataqsi kay runaqa yanapawachwan?”, nispanku.+ Chaynata kamispankum Saulmanqa mana imallatapas aparqakuchu.+ Chaynata niptinkupas Saulqa manamá imatapas nirqachu.