1 Samuel

13 Saulmi Israel runakunata kamachiyta qallaykurqa*.+ Iskay wataña kamachichkaspanmi 2 Saulqa Israel runakunamanta 3.000 qarikunata akllarqa. 2.000 qarikunam karqa Saulwan Mikmas lawpi hinaspa Betel llaqtapa urqunpi. 1.000 qarikunañataqmi karqa churin Jonatanwan,+ paykunaqa karqaku Benjamin ayllupa allpanpi kaq Guibea llaqtapim.+ Mana akllasqa kaqkunatañataqmi Saulqa nirqa wasinkuman kutikunankupaq. 3 Jonatanñataqmi Gueba llaqtapi+ kaq Filistea soldadokunata wañurachirqa.+ Chay pasakusqanmantam lliw Filistea runakuna yacharurqaku. Hinaptinmi Saul nirqa: “¡Hebreo kastakunayá yachachunku!”, nispa. Chaynata nispanmi waqrata pukuchirqa+ Israel runakuna uyarinankupaq. 4 Hinaptinmi Israel runakuna llapallanku uyarirqaku: “Saulmi Filistea soldadokunata wañurachin, chayraykum Filistea runakunaqa Israel runakunata chiqninku”, niq willakuyta. Chaymi Israel runakunaqa qayachisqa karqaku Guilgal llaqtapi Saulman hukllawakunankupaq.+

5 Filistea runakunapas Israel runakunawan peleanankupaqmi huñunakururqaku. Filistea runakunapam karqa 30.000 peleanankupaq carretankuna, 6.000 caballopi silladankuna hinaspa lamar quchapa patanpi aqu hinaña mana yupay atina soldadonkuna.+ Llapallankum Mikmas lawman qispiruspanku carpankuta sayachirqaku, chayqa karqa Bet-aven llaqtapa inti qispimunan lawpim.+ 6 Filistea runakunata qawaykuspankum Israel runakunaqa llumpayta mancharikurqaku. Hinaspankum pakakururqaku machaykunapi,+ kakllukunapi, mana yakuyuq pozokunapi hinaspa tuqusqa allpa ukukunapipas. 7 Wakin Hebreo kastakunaqa Jordan mayuta chimpaspankum Gad hinaspa Galaad allpaman ayqikurqaku.+ Saulñataqmi Guilgal llaqtallapi karqa, paywan kaqkunam manchakuymanta katkatatarqaku. 8 Chay llaqtapim Saulqa Samuelpa nisqanman hina qanchis punchaw suyarqa. Samuelmi ichaqa mana chayarikamurqachu, Saulwan kaq runakunapas ripukuytañam qallaykurqaku. 9 Hinaptinmi Saulqa runankunata nirqa: “Apamuwaychik animalta nakaspay Diospaq kañapunaypaq, apamuychiktaq Dioswan hawkalla kasqanchikmanta nakanapaq animalkunatapas”, nispa. Chaynapimá Saulqa animalkunata nakaspa Diospaq kañayta qallaykurqa.+

10 Animalta nakaspan Diospaq kañayta Saul tukuruptinñam Samuelqa chayaramurqa. Hinaptinmi Saulqa taripaykuspan rimakuykurqa. 11 Samuelñataqmi nirqa: “¿Imatataq ruwarunki?”, nispa. Hinaptinmi Saul nirqa: “Runaykunam ripukuytaña qallaykurqaku,+ qampas manataqmi chayarikamurqankichu. Filistea soldadokunapas Mikmas lawpim huñunakurunku.+ 12 Chaymi sunqullaypi nirqani: ‘Filistea soldadokunachá kay Guilgal llaqtaman hamuruspanku wañurachiwanqaku, Jehova Dios yanapawananpaqyá imallatapas ruwasaq’, nispay. Chaymi kikiyña animalkunata kañachkarqani”, nispa.

13 Hinaptinmi Samuelqa Saulta nirqa: “Mana tantiarispam kaytaqa ruwarunki. Kay ruwasqaykiwanmi Jehova Diosta mana kasukurqankichu.+ Jehova Diosta kasukuspaykiqa Israel runakunatam hinalla kamachiwaq karqa, chaynataqmi miraynikikunapas wiñaypaq kamachinmanku karqa. 14 Jehova Diosta mana kasukusqaykiraykum+ manaña kamachinkiñachu.+ Jehova Diosqa kasukuqnin runatañam akllanqa.+ Chay runatamá Jehova Diosqa churanqa runankunata kamachinanpaq”, nispa.+

15 Chaymantam Samuelqa Guilgal llaqtamanta Guibea llaqtaman rirqa, chayqa karqa Benjamin ayllupa allpanpim. Saulñataqmi paywanraq kaq runakunata yuparqa. Llapanmi karqa yaqa 600.+ 16 Saulqa churin Jonatanpiwan hinaspa paykunawanraq kaq runakunapiwanmi Benjamin ayllupi kaq Gueba llaqtaman+ rispanku chaypi karqaku. Filistea runakunañataqmi Mikmas lawllapi karqaku.+ 17 Chaypi kasqankumantam Filistea soldadokuna kimsaman rakinakuspanku lluqsirqaku. Wakinmi rirqa Ofra llaqtaman riq ñanninta Sual allpa lawman, 18 wakinñataqmi Bet-horon llaqtaman riq ñanninta,+ wakinñataqmi rirqa Zeboim wayquta qawarina ñanninta chunniq lawman.

19 Ñawpaqtaraqmi Filistea runakunaqa nirqaku: “Amayá Hebreo kastakunapiqa kachunchu espadatawan lanzata ruwaq runaqa”, nispa. Chaymi Israel runakuna ukupiqa mana pipas herreroqa karqachu. 20 Chayraykum llapallan Israel runakunaqa Filistea runakunamanraq apaqku piconkutawan rejankuta ñawchiyachinankupaq. Apaqkutaqmi hachankutawan rutunankutapas afilachimunankupaq. 21 Yapuna rejata, picota, kimsa puntayuq rastrillota, hachata hinaspa ñawchi puntayuq kaqkunata allichapusqankumantam sapakamamanta pagaqku yaqa pusaq gramo* qullqita. 22 Peleanankupaqqa Saulpawan churin Jonatanllapam espadankuwan lanzankuqa karqa.+ Paykunawan kaq runakunapaqa manam karqachu.

23 Wakin Filistea soldadokunañataqmi Mikmas lawpi kaq wayquman rirqaku.+