Jeremias
43 Jehova Diospa tukuy ima nisqantam Jeremiasqa runakunaman willarqa, Jehova Diospa nisqankunata lliwta willayta tukuruptinmi 2 Hosayapa churin Azarias, Careapa churin Joanan,+ chaynataq hatuntukuq runakuna Jeremiasta nirqaku: “¡Yanqam qamqa rimachkanki! Jehova Diosqa manam nisurqankichu ‘Egiptopi yachaqqa* ama riychikchu’ nispaqa. 3 Qamtaqa Neriaspa churin Barucmi+ umachasuchkanki Caldea runakunapa makinman churaykuwanaykikupaq, chaynapi wañurachiwanankupaq utaq Babiloniaman apawanankupaq”, nispa.+
4 Careapa churin Joananqa, soldadokunapa kamachiqninkunaqa, chaynataq llapallan runakunaqa Jehova Diospa nisqanta mana kasukuspankum Juda allpapiqa mana qipakurqakuchu. 5 Qipakunankumantaqa Careapa churin Joananwan soldadokunapa kamachiqninkunam Juda allpaman kutimuq runakunata aparqaku. Paykunaqa huklawkunaman chiqichisqa kasqankumantam allpankupi yachanankupaq kutimurqaku.+ 6 Apakurqakuqa qarikunatam, warmikunatam, warmachakunatam, kamachiqpa warmi churinkunatam, Diosmanta willakuq* Jeremiastam, Neriaspa churin Baructam hinaspa Guedaliaspa+ nanachikusqan llapallan runakunatam. Paykunamanta nanachikunanpaqmi soldadokunapa kamachiqnin Nebuzaradan+ saqirqa. Guedaliasqa karqa Aicampa+ churin Safanpa+ willkanmi. 7 Jehova Diospa nisqanta mana kasukuspankum Egipto allpaman yaykuruspanku Tapanes+ llaqtakama chayarurqaku.
8 Tapanes llaqtapim Jehova Diosqa Jeremiasta rimapayaspan nirqa: 9 “Ladrillowan ruwasqa pampapiyá Tapanespi Faraonpa wasinman yaykunapi judiokuna qawachkaptin hatun rumikunata mituwan tapamuy, 10 hinaspam ninki: ‘Angelkunata kamachiq Jehova Diosmi nin, Israelpa Diosninmi nin: “Nabucodonosortam qayachisaq, Babiloniata kamachiq runaytam+ qayachisaq. Kay tapasqay rumipa hawanpim kamachinanpaq tiyananta churasaq, paymi carpanta sayachinqa,+ 11 paymi Egipto runakunawan peleanqa,+ unquywan wañunanpaq kaqqa unquywanyá wañuchun, huklawman apasqa kananpaq kaqqa huklawman apasqayá kachun, espadawan wañunanpaq kaqqa espadawan wañuchisqayá kachun.+ 12 Egiptopi taytacha-mamachakunapa wasintam kañaykunqa.+ Kañaykuspanmi llaqtanman apakunqa. Imaynam michiqpas mana sasachakuspalla pachakun, chaynam Egiptomanpas yaykuspa munaychakunqa. 13 Egipto allpapi Bet-semes llaqtapi* pilarkunatam ñutupanqa. Egiptopi taytacha-mamachakunapa wasintapas kañaykunqam”’”, nispa.