Jeremias
8 Jehova Diosmi nin: “Chay punchawkunapiqa pampakusqanku uchkumantam hurqumunqaku Juda nacionta kamachiqkunapa tullunta, kamachiqpa yanapaqninkunapa tullunta, sacerdotekunapa tullunta, willakuqkunapa* tullunta chaynataq Jerusalen runakunapa tullunta. 2 Hurquramuptinkum inti qawanqa, killa qawanqa hinaspa lucerokuna qawanqa, tukuy chaykunatam paykunaqa kuyarqaku, chaykunapa ñawpaqninpim qunqurakurqaku, chaykunatam yupaycharqaku, qatirqaku hinaspa maskarqaku.+ Paykunataqa manam pipas qawarinqachu, manam pipas pampanqachu. Animalpa wanun hinam pampapi wischurayanqaku”, nispa.+
3 Angelkunata kamachiq Jehova Diosmi nin: “Kay mana allin runakunamanta puchuqkunata chiqichiptiymi kawsakuyta munanankumantaqa wañuyta maskanqaku”, nispa.
4 “Qamqa ninaykim: ‘Jehova Diosmi nin:
“¿Wichiykuspankuqa manañachu hatarinqaku?
Huknin qipaman kutiptinqa, ¿manachu hukninpas kutinqa?
5 ¿Imaynanpitaq Jerusalen runakunaqa mana kasukuwankuchu?
Paykunaqa qipancharuwanmi,
manam munankuchu ñuqaman kutirikamuytaqa.+
6 Rimasqankutam sumaqta uyarirqani, imayna rimasqankum ichaqa manam allinchu kasqa.
Manam pipas wanakurqachu, manataqmi nirqakuchu: ‘¿Imatataq kaytaqa ruwaruni?’, nispaqa.+
Wañuchinakuyman kallpaq caballo hinam achkaqpa risqan lawninta rinankupaq hikutakunku.
7 Cigüeñapas yachanmi imay tiempopi huklawman pawayta,
kullkupas chaynataq wakin pichinkukunapas yachanmi imay tiempopi maymi kanankuman kutiyta.
Runaykunam ichaqa mana yachankuchu imay punchaw paykunaman ñuqa Jehova Diospa piñakuyniy chayamunantaqa”’, nispa.+
8 ‘¿Imaynamá niwaqchikqa: “Ñuqaykuqa yachayniyuqmi kaniku”, nispaqa? ¿Imaynamá niwaqchikqa: “Jehova Diospa kamachikuyninmi makiykupi”, nispaqa?
Qillqaqkunaqa llullallatam qillqanku.+
9 Yachaysapa runakunaqa pinqaypim kachkanku.+
Manchakuymantam kachkanku, hapirachikunqakum.
Paykunaqa Jehova Diospa nisqankunatam mana uyariyta munankuchu,
paykunaqa mana yachayniyuqkunam kanku.
10 Warminkutapas chayraykum huk runakunamanña qusaq,
allpankutapas chayraykum huk runakunamanña qusaq,+
paykunaqa hatunpas uchuypas kikillankupaq munaqmi kanku,+
willakuqkunapas chaynataq sacerdotekunapas llapallankum suwakunku.+
11 Llaqtaypa wawan unquchkaptinmi yanqa hampiqtukuchkanku,
mana hawkayay kachkaptinmi
“¡hawkam kachkanchik! ¡Allinmi kachkanchik!” nichkanku.+
12 ¿Yaqachu paykunaqa millay ruwasqankumanta pinqakunku?
¡Manam pinqakunkuchu!
¡Pinqakuytapas manam yachankuchu!+
Chayraykum wakinkuna hina wichinqaku.
Castigaptiymi urmanqaku’,+ Jehova Diosmi chaynata nin.
13 Jehova Diosmi nin: ‘Huñuspaymi paykunata chinkachisaq’, nispa.
‘Manam uvaspas puchunqachu, manam higospas puchunqachu, llaqinkunapas* chakinqam.
Paykunaman qusqay kaqkunapas hukpa makinpiñam kanqa’”.
14 “¿Imaynanpitaq kaypi tiyarayachkanchik?
Huñunakusunyá, hinaspayá mana pipa yaykuy atinan llaqtakunaman yaykusun+ chaypi wañunapaq.
Jehova Diosninchikqa chinkachiwasunmi,
payqa wañunanchikpaqmi venenoyuq yakuta quwachkanchik,+
ñuqanchikqa Jehova Diospa contranpim huchallikurunchik.
15 Hawkayaytam suyarqanchik, ichaqa sasachakuyllam chayaramun.
Allinña kaytam munarqanchik, ichaqa manchakuyllam kachkan.+
16 Dan allpapi caballonkupa samatyasqanmi uyarikuchkan.
Caballonku wiqiqiqiptinqa kay allpa pachapas katkatatanmi.
Paykuna llaqtaman yaykuruspankuqa llapallantam chinkachinku,
chinkachinkum llaqtatapas
chaynataq runankunatapas”.
17 Jehova Diosmi nin: “Culebrakunatam kachamuchkaykichik,
mana pipa hapiy atinan wañuchikuq culebrakunatam kachamuchkaykichik,
chay culebrakunaqa kachusunkichikpunim”, nispa.
18 Kay llakiqa wañurachiwanqach,
sunquypas hukmanyasqam kachkan.
19 Karu-karu llaqtapim runaykunapa qayaykachakusqan uyarikuchkan:
“¿Manachu Jehova Diosqa Sionpi kachkan?
¿Manachu kamachiqqa chaypi kachkan?”, niq.
“¿Imapaqtaq piñachiwarqankichik llaqllasqa taytacha-mamachakunata
hinaspa huklaw runakunapa taytacha-mamachanta yupaychaspaykichik?”
20 “Cosecha tiempopas tukurunñam, usyay tiempopas tukurunñam,
ñuqanchikmanmi ichaqa yanapakuyqa manaraq chayamuwanchikchu”.
21 Qalaypaq hukmanyasqam kachkani llaqtaypa wawan unqusqanrayku,+
llumpa-llumpay llakisqam kachkani.
Mancharisqallañam kachkani.
22 ¿Manachu Galaadpi miski asnaq aceite kan?+
¿Manachu chaypiqa pipas hampiq* kan?+
¿Imaynanpitaq runaykunaqa mana allinyanchu?+