Isaias
38 Chay punchawkunapim Ezequiasqa unquruspan wañuy patanpiña tarikurqa.+ Hinaptinmi Amozpa churin Isaias*+ watukuspan nirqa: “Jehova Diosmi nin: ‘Manam allinyankiñachu, wañukunkiñam. Chayraykuyá aylluykikunaman yachachiy imam ruwanankuta’”, nispa.+ 2 Ezequiasqa chayta uyariykuspanmi pirqaman muyurispan Jehova Diosta mañakurqa kaynata: 3 “Jehova Dioslláy, amayá qunqarullawaychu,+ ñuqaqa ñannikikunapim purirqani, tukuy sunquwanmi kasukurqayki,+ munasqaykiman hinam kawsakurqani”, nispa. Hinaspam Ezequiasqa hikchuy-hikchuyta waqarqa.
4 Jehova Diosmi Isaiasta nirqa: 5 “Kutispayki Ezequiasman nimuy:+ ‘Ñawpaq abueloyki Davidpa yupaychasqan Jehova Diosmi nin: “Waqaspa mañakusqaykitam uyariykamuyki,+ qawamurqanitaqmi waqasqaykitapas.+ 15 wataraqmi kawsakunki.+ 6 Asiriata kamachiqmantam qamtawan kay llaqtapi runakunata librasqaykichik, kay llaqtataqa waqaychasaqmi.+ 7 Ñuqa Jehova Diosqa nisqayman hinapunim cumplisaq, ñuqa Jehova Dios nisqaykunata cumplinaymanta yachanaykipaqmi kay kanqa:+ 8 Acazpa gradasninpi llantuymi chunka gradasta* qipaman kutinqa”’”,+ nispa. Chayna nisqanman hinam llantuyqa chunka gradasta qipaman kutirurqa.
9 Unqusqanmanta allinyaruspan Judata kamachiq Ezequiaspa qillqasqan.
10 Ñuqam nirqani: “Kallpallaypiraqchiki
wañusqakunapa kasqanmanqa* uraykusaq.
Manaraq allinta kawsakuchkaspaychiki wañukusaq”, nispa.
11 Ñuqam nirqani: “Manañachiki Jehova* Diostaqa rikusaqñachu, manañachiki kawsaqkunapa kasqan allpapiqa+ Jehova Diostaqa rikusaqñachu.
Manañachiki runakunataqa rikusaqñachu,
imapas qalaypaq tukunan lawpi kaspayqa manañachiki rikusaqñachu.
12 Michiqpa carpanta hinam wasiytapas
paskaruspanku apakunku.+
Awata wankuchkaq hinam wankuruwanku.
Allwisqa qaytuta hinam payqa tipiwan.
Achikyaqmanta tutaykuqkamam tukuyta ruwawan.+
13 Achikyaqkama hawkalla kanaypaq kallpanchakuptiypas
leon hinam payqa tulluykunatapas chamchan,
achikyaqmanta tutaykuqkamam tukuyta ruwawan.+
Altota qawasqaypim ñawillaykunapas utirunña:+
‘Jehova Dioslláy, hukmanyasqam kallachkani.
¡Yanapaykullawayá!’+
15 ¿Imatataq niyman?
Payqa niwasqanman hinam ruwarqa.
Tukuy llakiykunaraykum wañukunaykama
mana hatuntukuspay purisaq.
16 ‘Jehova Dioslláy, kaykuna* kaptillanmi runaqa kawsan,
kaykuna kasqanraykutaqmi ñuqapas kawsani.
Qamqa allinyaykachiwankipunim, manam wañunaytaqa saqiwankichu.+
17 Hawka kanaymantaqa sasachakuyllapim karqani,
ichaqa kuyawasqaykiraykum
wañuymanta libraykuwarqanki.+
Huchaykunatapas qipaykimanmi wikapaykurqanki.+
Allpapa sunqunman uraykuqkunaqa manañam rikunqakuñachu nisqaykiman hina ruwasqaykikunataqa.+
19 Kawsaqkunallam qamtaqa hatunchasunkiman,
kunan hatunchasqayman hinaqa kawsaqkunallam hatunchasunkiman.
Nisqaykiman hina ruwasqaykikunatam taytaqa churinkunaman yachachin.+
20 Jehova Dioslláy, yanapaykullaway,
yanapaykuwaptikiqa arpata tocaspam takipusqaykiku,+
wañukunaykukamam puncha-punchaw wasikipi takipusqaykiku Jehova Dioslláy’”, nispay.+
21 Isaiasñataqmi nirqa: “Allinyananpaqyá kutasqa chaki higosta Ezequiaspa chupunman laqaychik”, nispa.+ 22 Ezequiasñataqmi nirqa: “¿Imaynatataq yachasaq Jehova Diospa wasinman rinaymantaqa?”, nispa.+