Jeremias

32 Nabucodonosor 18 wataña kamachichkaptinmi+ hinaspa Sedequias Juda nacionta chunka wataña kamachichkaptinmi Jeremiasta Jehova Diosqa rimapayarqa. 2 Chay watakunapim Babiloniata kamachiqpa soldadonkuna Jerusalenta muyurirurqaku, Diosmanta willakuq* Jeremiasñataqmi Guardia sutiyuq patiopi wichqarayachkarqa,+ chayqa karqa Judata kamachiqpa wasinpim. 3 Jeremiastaqa Judata kamachiq Sedequiasmi wichqarurqa+ kaynata nispan: “¿Imaynanpitaq kaykunata willakunki? Qanmi nichkanki: ‘Jehova Diosmi nin: “Kay llaqtataqa Babiloniata kamachiqpa makinmanmi churasaq, paymi kay llaqtataqa munaychakunqa.+ 4 Juda llaqtata kamachiq Sedequiasqa Caldea soldadokunamantaqa manam ayqinqachu, Babiloniata kamachiqpa makinmanmi wichinqa. Ñawpaqninpi sayaykuspam Sedequiasqa Babiloniata kamachiqwan rimanqa”’, nispa.+ 5 Jehova Diosmi nin: ‘Nabucodonosormi Sedequiastaqa Babiloniaman apanqa, chaypim kanqa payta yanapanay punchawkama. Caldea runakunawan peleaspapas yanqam peleankichik manam atinkichikchu’”, nispa.+

6 Jeremiasmi nirqa: “Jehova Diosmi rimapayawaspan niwarqa: 7 ‘Tioyki* Salumpa churin Hanamelmi hamuspan nisunki: “Anatot lawpi chakraytayá rantiway,+ aylluyku kasqaykiraykum qanman tupasunki, chaymi rantiwanayki”’”, nispa.+

8 Jehova Diospa niwasqanman hinam tioypa churin Hanamelqa Guardia sutiyuq patioman hamuspa niwarqa: “Ama hina kaspayá Benjamin allpapi Anatotpi chakrayta rantiway, aylluyku kasqaykiraykum qanman tupasunki chaymi rantiwanayki, qampaña kananpaqyá rantiway”, nispa. Chaynata niwaptinmi cuentata qukururqani Jehova Diospa niwasqanman hina kasqanta.

9 Chaymi tioypa churin Hanamelmanta Anatotpi chakranta rantirurqani. Yaqa 80 gramo* qullqitawan* chunka qullqitam chay chakranmanta pagarqani.+ 10 Papelta ruwaspaymi+ anilloywan sellaykurqani. Testigokunatam qayachirqani,+ paykunapa qayllanpim qullqita balanzapi pesarqani. 11 Ruwasqaykuman hina chaynataq kamachikuyman hinam chay papelta hapiykuspay anilloywan mana sellasqay papeltawan 12 quykurqani Neriaspa churin Barucman,+ Neriasqa+ karqa Maseyapa churinmi. Chay papeltaqa qurqani tioypa churin Hanamelpa qayllanpim, qayachisqay testigokunapa qayllanpim chaynataq judiokunapa qayllanpim. Paykunaqa Guardia sutiyuq patiopim tiyachkarqaku.+

13 Paykunapa qayllanpim Baructa nirqani: 14 “Angelkunata kamachiq Jehova Diosmi nin, Israelpa Diosninmi nin: ‘Ruwachisqayki papelkunata, anillowan sellasqa kaqtawan anillowan mana sellasqa kaq papelta puyñuman churay, chaynapi mana mawkayananpaq’, nispa. 15 Angelkunata kamachiq Jehova Diosmi nin, Israelpa Diosninmi nin: ‘Kay allpapiqa kaqmantam rantinqaku wasikunata, chakrakunata hinaspa uvas huertakunata’”, nispa.+

16 Neriaspa churin Barucman chay papelkunata quykuspaymi Jehova Diosta mañakuspay nirqani: 17 “¡Llapallan kamachiq Jehova Dioslláy! Atiynikiwanmi+ hinaspa atiyniyuq makikiwanmi hanaq pachatawan kay pachata unancharqanki. Qampaqqa manam imapas llumpay sasachu. 18 Qamqa waranqantin runakunatam imaña kaptinpas kuyanki, ichaqa taytankupa huchankumantam churinkupas ñakarinku.+ Qamllam kanki Diosqa, qamllam kanki hatu-hatun Diosqa, qamllam kanki atiyniyuq Diosqa, qampa sutikiqa angelkunata kamachiq Jehova Diosmi. 19 Tantiasqaykikunatam suma-sumaqta ruwanki, tukuy imatam atiynikiwan ruwanki.+ Llapallan runakunapa ruwasqantam qamqa qawachkanki,+ qawachkankiqa imayna kawsasqankuman hina kutichipunaykipaqmi hinaspa ruwasqankuman hina kutichipunaykipaqmi.+ 20 Egipto allpapim tukuy imatawan milagrokunata ruwarqanki, chaytam kunankama yuyanku, chayraykum Israelpi ancha riqsisqa karqanki, llapa runakunapa ancha riqsisqanmi karqanki,+ kunankamapas hinallaraqmi riqsisqa kachkanki. 21 Egipto allpamantam Israel runaykikunata hurqumurqanki, atiynikiwan milagrokunata ruwaspam hurqumurqanki. Atiynikiwanmi, atiyniyuq makikiwanmi hinaspa manchakuypaq kaqkunata ruwaspaykim hurqumurqanki.+

22 Punchawkuna risqanman hinam ñawpaq abuelonkuman qunayki allpata paykunaman qurqanki,+ chay allpaqa tukuy imapa kanan allpam*.+ 23 Paykunaqa chay allpaman chayaspankum chaypi yacharqaku*. Ichaqa nisqaykitawan kamachikuynikitaqa manam kasukurqakuchu, imapas kamachisqaykitaqa manam kasukurqakuchu, chayraykum ñakariykunata kacharirqanki.+ 24 Runakunam kay llaqtaman yaykunankupaq pirqapa waqtanman allpata munturunku.+ Espadawanmi,+ yarqaywanmi hinaspa unquywanmi+ kay llaqtaqa Caldea runakunapa makinman wichinqa. Qaway, nisqaykiman hinam tukuy ima karun. 25 Llapallan kamachiq Jehova Dioslláy, qanmi niwarqanki: ‘Testigokunata qayachispayá chakrata rantiy’, nispa. Chaytam niwarqanki Caldea runakunapa makinman kay llaqta wichinan kachkaptinpas”, nispa.

26 Chaymantam Jehova Diosqa Jeremiasta rimapayaspan nirqa: 27 “Ñuqaqa kani llapallan runakunapa Jehova Diosninmi. ¿Yaqachu ñuqapaq imapas llumpay sasa kanman? 28 Ñuqa Jehova Diosmi nini: ‘Kay llaqtatam Caldea runakunapa makinman churasaq, Babiloniata kamachiq Nabucodonosorpa makinmanmi churasaq, paymi munaychakunqa.+ 29 Caldea runakunaqa kay llaqtaman yaykuspankum llaqtata kañaykunqaku,+ kañaykunqakutaqmi Baal taytachankupaq imatapas quntichinanku wasikunatapas, chay wasikunapa hawanpim imatapas quntichirqaku, chaypitaqmi piñachiwanankupaq huk taytachankupaq vinokunatapas tallipurqaku’, nispa.+

30 Jehova Diosmi nin: ‘Israel runakunawan Juda runakunaqa warma kasqankumantam chiqnisqay kaqkunallata ruwanku,+ Israel runakunaqa mana allinta ruwaspam piñachiwan. 31 Kay runakunaqa kayman chayamusqankumantapacham piñachiwan hinaspa rabiachiwan,+ chaymi qayllaymanta chinkachisaq.+ 32 Israel runakunawan Juda runakuna piñachiwanankupaq tukuy mana allinkuna ruwasqankumantam chinkachisaq, chinkachisaqmi paykunata, kamachiqninkunata,+ kamachiqpa yanapaqninkunata,+ sacerdotekunata hinaspa willakuqkunata.+ Chinkachisaqtaqmi Juda runakunatawan Jerusalenpi runakunatapas. 33 Paykunaqa qipancharuwaspam manaña qawariwanchu,+ ñuqaqa achka kutikamam yachachirqani, ichaqa manam uyariyta munarqakuchu, rimapayasqaytapas manam kasukurqakuchu.+ 34 Sutiy apaq wasitam millakuypaqta ruwarunku taytacha-mamachankuta churaruspanku.+ 35 Hinon wayqupim*+ Baal taytachapaq yupaychana patakunata ruwarunku chaypi churi-wawankuta Molek+ taytachapaq kañapunankupaq, chayta ruwanankupaqqa manam ñuqaqa kamachirqanichu,+ manam piensayllapas-piensarqanichu. Millakuypaq kaqkunata ruwanankupaqqa manam Juda runakunataqa kamachirqanichu’, nispa.

36 Kay llaqtamantam nichkankichik: “Espadawanmi, yarqaywanmi hinaspa unquywanmi Babiloniata kamachiqpa makinman wichichisaq”, nispa. Israelpa yupaychasqan ñuqa Jehova Diosmi nini: 37 ‘Piñakuyniypi, llumpa-llumpay piñakuyniypi tukuy hinastinman chiqichisqaymantam kutichimusaq,+ kayman kutichimuptiymi hawkaña kawsakunqaku.+ 38 Paykunam runaykuna kanqa, ñuqañataqmi Diosninku kasaq.+ 39 Paykunatam yanapasaq sunqunkupiwan imayna kayninkupi,+ chaynapi wiñaypaq manchakuwanankupaq, chayqa allinninkupaqmi kanqa churi-wawankupaqpas.+ 40 Paykunawan contrato* ruwasqayqa wiñaypaqmi kanqa,+ paykunapaqqa haykapipas allin kaqtam ruwasaq.+ Sunqunkupim ñuqata manchakuwanqaku, hinaspam ñuqamantaqa mana karunchakunqakuchu.+ 41 Paykunapaq allin kaqkunata ruwasqaywanmi ancha kusisqa kasaq,+ kay allpapim sumaqta takyachisaq,+ tukuy sunquywanmi takyachisaq, tukuy vidaywanmi takyachisaq’”, nispa.

42 “Jehova Diosmi nin: ‘Imaynam kay runakunaman sasachakuyta kacharimurqani, chaynam allin kaqkunatapas nisqayman hina kacharimusaq.+ 43 “Kay allpaqa chunnichkanmi, kay allpaqa kachkan mana runayuqmi, mana animalniyuqmi, Caldea runakunapa makinpim” nispaykichikpas kay allpapiqa kaqmantam chakrakunata rantinkichik’, nispa.+

44 Jehova Diosmi nin: ‘Runakunam chakrata qullqiwan rantinqaku, papeltam ruwachinqaku, rantisqankumanta papeltam anillowan sellanqaku hinaspam testigokunata qayanqaku. Qayanqakuqa Benjamin allpapi,+ Jerusalenpa muyuriqninkunapi, Juda nacionpa llaqtankunapi,+ urqukunapi kaq llaqtakunapi, wayqukunapi kaq llaqtakunapi chaynataq sur lawpi kaq llaqtakunapim.+ Huklawman apasqa kaqkunatam kutichimusaq’”, nispa.+