1 Samuel
23 Chaymanta qipatam Davidman willaykurqaku: “Filistea runakunam Keila llaqtayuqkunawan peleaspanku+ irakunapi kawsayninkuta suwakuchkanku”, nispa. 2 Davidñataqmi Jehova Diosta nirqa:+ “¿Riymanchu chay Filistea runakunawan peleaq?”, nispa. Hinaptinmi Jehova Diosqa nirqa: “Arí, rispaykiyá peleamuy, chaynapi Keila llaqtayuqkunata mana wañurachinankupaq”, nispa. 3 Runankunañataqmi Davidta nirqaku: “Juda ayllukunapa allpanpi kachkaspanchikpas manchakuywanmi kachkanchik.+ ¡Astawanraqchiki Keila llaqtaman rispa Filistea soldadokunawan peleaspanchikqa!”, nispa.+ 4 Chaymi Davidqa kaqmanta Jehova Diosta tapurqa.+ Jehova Diosñataqmi nirqa: “Keila llaqtamanqa rinaykim, Filistea runakunataqa makikimanmi churasaq”, nispa.+ 5 Chaynapim Davidqa runankunapiwan Keila llaqtaman rirqa Filistea runakunawan peleaq. Paykunaqa achka-achkata wañurachispankum animalninkutañataq apakurqaku. Chaynatamá Davidqa Keila llaqtayuqkunata wañuymanta libraykurqa.+
6 Aimelecpa churin Abiatarqa+ mandilta* aparikuspanmi lluptikusqan punchawqa rirqa. Payqa Keila llaqtapi David kachkaptinmi chayarurqa. 7 Chaymantam Saulman willaykurqaku: “Davidqa Keila llaqtapim kachkan”, nispa. Chaymi Saul nirqa: “Diosmi Davidtaqa makiyman churaykun,+ kikillanmi punkuyuq hinaspa trankasqa llaqtaman yaykurun, Davidqa manam lluptiyta atinqachu”, nispa. 8 Chaynata nispanmi Saulqa huñururqa soldadonkunata Keila llaqtaman rinankupaq, chaynapi Davidtawan runankunata chawpicharunankupaq. 9 Saulpa chayna tantiasqanta yacharuspanmi Davidqa sacerdote Abiatarta nirqa: “Apamuy mandilta”, nispa.+ 10 Chaymantam Davidqa Diosta nirqa: “Israelpa yupaychasqan Jehova Dioslláy, ñuqarayku Keila llaqtata chinkachinanpaq Saul hamuyta munasqanmantam yacharuni.+ 11 ¿Saulpa makinmanchu Keila llaqtapi kamachiqkunaqa* churaykuwanqaku? ¿Uyarisqayman hinachu Saulqa hamunqa Keila llaqtaman? Israelpa yupaychasqan Jehova Dioslláy, ama hina kaspayá willaykullaway”, nispa. Hinaptinmi Jehova Diosñataq nirqa: “Arí, Saulqa hamunqam”, nispa. 12 Davidñataqmi nirqa: “¿Keila llaqtayuq kamachiqkunaqa Saulpa makinmanchu churaykuwanqa ñuqatapas chaynataq runaykunatapas?”, nispa. Jehova Diosñataqmi nirqa: “Arí, quykusunkichikmi”, nispa.
13 Chaymi Davidqa Keila llaqtamanta lluqsispan yaqa 600 runankunapiwan+ kaypi-chaypi purirqaku. Keila llaqtamanta Davidpa lluptikusqanta Saul yacharuspanmi manaña rirqachu. 14 Davidqa Zif llaqtapa+ chunniq urqunkunapim mana yaykuy atinakunapi pakakurqa. Maynataña Davidta Saul maskaptinpas+ Jehova Diosqa manam tarichirqachu. 15 Davidqa Hores lawpi kachkaspanmi yacharurqa* wañuchinanpaq Saulpa hamusqanta, Horesqa karqa Zif llaqtapa chunniq lawninpim.
16 Saulpa churin Jonatanmi Hores lawpi David kachkaptin qawaq rirqa. Hinaspanmi Davidta kallpancharqa Jehova Diospi hinalla hapipakunanpaq.+ 17 Jonatanmi nirqa: “Ama manchakuychu, taytay Saulqa manam tarisunkichu. Israel runakunapa kamachiqninmi kanki,+ ñuqañataqmi yanapaqniki kasaq. Chaytaqa taytay Saulpas allintam yachan”, nispa.+ 18 Chaypaqmi Jehova Diospa sutinpi iskayninku rimarqaku*.+ Chaymantam Jonatanqa wasinman kutikurqa, Davidñataqmi hina Horespi qipakurqa.
19 Chaymanta qipatam Zif llaqtayuq runakuna Saulpa kasqan Guibea llaqtaman+ rispanku nirqaku: “Davidqa llaqtaykupa hichpan Hores lawpim+ mana yaykuy atinapi pakakuchkan.+ Chayqa kachkan Jesimon chunniqpa alliqnin*+ Havila muqu lawpim.+ 20 Chaynaqa kamachiqllayku, llaqtaykuman hamuptikiqa ñuqaykum Davidtaqa qusqaykiku”, nispa.+ 21 Saulñataqmi nirqa: “Qamkunaqa llakipayaykuwankichikmi, Jehova Diosyá bendecisunkichik. 22 Chaynaqa, kutispayá sumaqta yachaykamuychik David maypi kasqanta hinaspa pi rikusqantapas. Willawasqankuman hinaqa Davidqa sakrillañas. 23 Maypi pakakusqanta sumaqta yachaykuspam kutimuspa willawankichik. Hinaptinmi qamkunawan rispay Juda ayllukunapa kasqanpiña kaptinpas maskaramusaq”, nispa.
24 Hinaptinmi Zif+ runakunaqa llaqtankuman kutikurqaku. Davidñataqmi runankunapiwan karqaku Maon llaqtapa+ chunniqninpi, chayqa karqa Araba lawpim+ Jesimon chunniqpa alliq lawninpi. 25 Chaymantam Saulqa runankunapiwan Davidta maskaq rirqa.+ Chayta yacharuspanmi Davidqa Maon llaqtapi chunniq qaqaman rirqa.+ Saulñataqmi chaypi David kasqanta yacharuspan maskaq rirqa. 26 Davidqa runankunapiwanmi urqupa waqtanpi kachkarqa, Saulñataqmi runankunapiwan urqupa huklawninman chayarurqa. Davidqa Saulmanta karunchakunanpaqmi apurawman rirqa,+ chaywanpas Saulqa runankunapiwanmi hapirunankupaqña kachkarqa.+ 27 Hinaptinmi huk runa chayaramuspan Saulman willaykurqa: “¡Apurawman kutiy, Filistea runakunam llaqtata yaykuchkanku!”, nispa. 28 Chaymi Saulqa Davidta manaña qatispan+ kutirqa Filistea runakunawan peleaq. Chayraykum chay sitiota suticharqaku “Rakinaq qaqa” nispa.
29 Chaymanta pasakuspanmi Davidqa En-guedi lawpi mana yaykuy atinakunapi pakakurqa.+