1 Corintios
16 Diospa runankunapaq+ qullqi huñuymantaqa kaytam nikichik: Chaytaqa Galacia lawpi huñunakuq iñiqkunaman kamachisqayman hinam ruwawaqchik. 2 Sapa semanapa punta kaq punchawninpiyá* kapuqnikichikman hina imaykichiktapas sapaqchaychik, chaynapi chayamuptiyña chayraq mana huñuchkanaykichikpaq. 3 Chayaramuspaymi tukuy sunquwan qusqaykichikta Jerusalenman apachisaq cartaykichikpi+ qillqamuspa akllasqaykichik runakunawan. 4 Ñuqapas rinay kaptinqa paykunawanmi kuska risaq.
5 Qamkunataqa watukamusqaykichik Macedonia lawninta hamuspayñam, ñuqaqa chaynintam hamusaq.+ 6 Ichapas qamkunawan huk tiempo qipakuyman, chayna kaptinqa paranan hinaspa chirinan tiempo pasanankamachá qamkunawan kasaq, chaynapi maymi rinayman parte ñankama riysiwanaykichikpaq. 7 Manam qamkunata pasadalla qawaykuytaqa munanichu, Jehova* Dios munaptinqa huk tiempollapas qamkunawan kaytam munani.+ 8 Ichaqa, Efeso+ llaqtapim pentecostes fiestakama kasaq 9 hatun punku kichakuchkaq hina astawan llamkanaypaq kasqanrayku,+ ichaqa achkallañam chiqniwaqniykunaqa kachkanku.
10 Timoteo+ chayaramuptinqa allintamá atiendeykunkichik mana manchakuspan qamkunawan kananpaq,+ payqa ñuqa hinam llamkachkan Jehova* Diospa llamkayninpi. 11 Chayrayku ama pipas paytaqa mana kaqpaqta hinaqa hapichunchu, chaymantapas hawkallatayá paytaqa kachamuychik, chaynapi ñuqaman hamunanpaq, ñuqaqa wakin iñiqmasinchikkunapiwanmi suyachkaniku.
12 Iñiqmasinchik Apolostaqa+ anchatam ruegakurqani iñiqmasinchikkunawan qamkunaman hamunanpaq, ichaqa manaraqmi hamuyta munanraqchu, payqa atimusqan punchawmi chaylla hamunqa.
13 Qamkunaqa rikchan-rikchanllayá kaychik,+ Diospiyá ancha-anchata hapipakuychik,+ qarinchakuychikyá,+ hinaspapas mana manchakuqyá kaychik.+ 14 Tukuy ima ruwanaykichiktaqa kuyakuywanyá sumaqta ruwaychik.+
15 Wawqi-panillaykuna, kaytam ruegakuspa nikichik: Qamkunaqa yachankichikmi Estefanospa wasinpi kaqkuna Acaya lawpi punta iñiqkuna kasqanta, paykunaqa tukuy sunqunkuwanmi Diospa runankunata servirqaku. 16 Qamkunapas hinallayá chayna iñiqmasinchikkunata kasukuychik, kasukuychiktaqyá llapa yanapakuqkunatawan allin llamkaqkunatapas.+ 17 Kusikunim Estefanospa,+ Fortunatopa chaynataq Acaicopa hamusqanmanta, paykunam anchata yanapawarqa qamkuna mana kaptikichik. 18 Paykunaqa kallpanchawarqam, chaynallataqmi qamkunatapas kallpanchasurqankichik, paykunapaqyá riqsikuynikichik kachun.
19 Asia lawpi huñunakuq iñiqmasinchikkunam saludamusunkichik. Señorpa qatiqnin Aquilawan Priscapas chaynataq wasinpi huñunakuq iñiqkunapas+ tukuy sunqunkumantam saludamusunkichik. 20 Llapallan wawqi-panikunam saludonta apachimusunkichik. Llapaykichikyá wawqi-panintin hina muchaykanakuspa rimaykanakuychik.
21 Ñuqa Pablom makiywanpuni qamkuna kuyasqaymanta qillqamuykichik.
22 Pipas señorninchikta mana kuyaspanqa ñakasqayá kachun. ¡Hamuyá señorllayku! 23 Qamkunawanyá kachun señor Jesuspa ancha kuyakuynin*. 24 Qamkunawanyá kuyakuynin kachun, qamkunaqa kankichik Jesucristopa qatiqninkunam.