1 Corintios
Kayqa Corinto llaqtapi iñiqkunaman punta kaq cartam.
1 Diospa munayninpi Jesucristopa* apostolnin*+ kanaypaq akllasqa ñuqa Pablom Sostenes sutiyuq iñiqmasinchikpiwan 2 kay cartata qillqamuykichik Corinto llaqtapi+ huñunakuq Diospa runankunaman, qamkunataqa Diosmi sapaqchasurqankichik Jesucristopa+ qatiqnin kanaykichikpaq. Qamkunaqa chuya kanaykichikpaqmi akllasqa karqankichik. Qillqamunitaqmi señor Jesucristopa sutinmanta tukuy hinastinpi willakuqkunamanpas. Señor Jesucristoqa+ paykunapapas hinaspa ñuqanchikpapas señorninchikmi.
3 Qamkunapaqyá kachun taytanchik Diospa hinaspa señor Jesucristopa ancha kuyakuynin* chaynataq hawkayaynin.
4 Qamkunamantam sapa kuti Diosta agradecekuni Jesucristorayku anchata kuyasusqaykichikmanta. 5 Qamkunaqa Jesuswan huklla kasqaykichikraykum tukuy imata achkanpi chaskirqankichik, chayraykum Diospa palabranmanta allintapuni willakunkichik hinaspa tukuy imamanta allinta yachankichik.+ 6 Diosmi Cristomanta*+ ñuqapa willasqayta allintapuni yachanaykichikpaq yanapasurqankichik. 7 Chayraykum qamkunapaqqa kachkan tukuy ima necesitasqaykichik, qamkunaqa señorninchik Jesucristopa+ rikurimunantam kusikuyllawanña suyachkankichik. 8 Diosmi allinta yanapasunkichik tukupaykama payman sunqu kanaykichikpaq, chaynapi señorninchik Jesucristopa+ kutimunan punchawpi mana imamantapas huchayuq kanaykichikpaq. 9 Diosqa rimasqanman hinam ruwan,+ paymi qayasurqankichik churin Jesucristowan kuska kanaykichikpaq*.
10 Kunanmi wawqi-panillaykuna ruegakamuykichik señorninchik Jesucristopa sutinpi llapallaykichikpa rimaynikichik huklla kananpaq hinaspa mana rakinasqa kanaykichikpaq,+ aswanqa huk sunqulla hinaspa huk umalla kanaykichikpaq.+ 11 Wawqi-panillaykuna, Cloepa ayllunmanta wakinmi willawan mana huk sunqulla kasqaykichikta. 12 Qamkunam nichkankichik: “Ñuqaqa kani Pablopam”, “ñuqaqa kani Apolospam”,+ “ñuqaqa kani Pedropam*”, “ñuqañataqmi Cristopa”, nispa. 13 Hinaptinqa, ¿rakinasqachu Cristoqa kachkan? ¿Pablochu qirupi* qamkunarayku wañuchisqa karqa? Icha, ¿Pablopa sutinpichu bautizasqa karqankichik? Manam. 14 Diostam agradecekuni qamkunamanta mayqinnikichiktapas mana bautizasqaymanta, bautizarqaniqa Crispotawan+ Gayollatam.+ 15 Chaynaqa manam pipas ninmanchu: “Ñuqaqa Pablopa sutinpim bautizakurqani”, nispaqa. 16 Arí, bautizarqanitaqmi Estefanospa+ wasinpi kaqkunatapas, hukkuna bautizasqaytam ichaqa mana yuyanichu. 17 Cristoqa manam bautizanaypaqchu kachamuwarqa, aswanqa sumaq willakuymanta willakunaypaqmi.+ Chaytaqa willakurqani manam yachaysapa runakuna hinachu, chaynapi ñakarichikuq qirupi* Cristopa wañukusqan mana yanqapaq kananpaq.
18 Wañuyman riq runakunaqa manam kaqpaqpas hapinkuchu ñakarichikuq qirupi Jesus wañukusqanmanta willakuytaqa,+ ñuqanchikmi ichaqa chay willakuywan yachanchik Diosqa atiyniyuq kasqanta, chayraykumá salvasqa kasun.+ 19 Qillqasqam kachkan: “Yachaysapa runakunapa yachaynintam tukuchisaq, yuyaysapa runakunapa yachaynintapas chinkachisaqmi”, niq.+ 20 ¿Maytaq yachayniyuq runaqa? ¿Maytaq escribaqa*? ¿Maytaq kay tiempopi* atipanakuq runaqa? ¿Manachu Diosqa yachayniyuq runakunata pinqayman churarun? 21 Runakunaqa yachayninkuman hapipakuspam+ Dios riqsiytaqa mana munankuchu,+ paykunapaqqa yanqapaqmi willakusqanchikpas,+ Diosmi ichaqa yachayniyuq kasqanrayku chay willakusqanchik uyariqkunata salvananpaq tantiarun.
22 Judiokunaqa milagrokunatam mañakunku,+ griego rimayniyuq runakunañataqmi yachaysapa kayta munanku, 23 ñuqanchikmi ichaqa qirupi wañukuq Cristomanta willakunchik, chayqa judiokunapaqmi urmachikuq rumi hina, huklaw nacionniyuq runakunapaqñataqmi yanqalla.+ 24 Akllasqa* kaqkunapaqmi ichaqa mana chaynachu judio kaptinkupas utaq mana judio* kaptinkupas, Cristoraykum yachanchik Diosqa atiyniyuq hinaspa yachayniyuq kasqanta.+ 25 Diospa kaqtam runakunaqa qawanku mana valeqta hinaspa mana kallpayuqta hina, chayna qawasqankum ichaqa paykunamantaqa aswan yachayniyuq hinaspa aswan kallpayuq.+
26 Wawqi-panillaykuna, amayá qunqaychikchu imaynanpi Dios akllasusqaykichiktaqa. Runakunapaqqa manam lliwchu yachayniyuqqa kankichik,+ manataqmi lliwchu riqsisqa kankichik nitaqmi riqsisqa ayllumantachu kankichik*.+ 27 Chayna kaptinpas Diosqa akllarqa runakunapa qawasqanman hina mana yachayniyuqkunatam chaynapi yachayniyuqkunata pinqachinanpaq, Diosqa akllarqataqmi runakunapa mana kallpayuqpaq hapisqankunatapas chaynapi kallpasapakunata pinqachinanpaq,+ 28 runakunapa allinpaq qawasqan kaqkunata chinkachinanpaqtaqmi Diosqa akllarqa runakunapa mana kaqpaqpas hapisqan kaqkunata, chiqnisqan kaqkunata hinaspa mana serviqpaq qawasqan kaqkunata,+ 29 chaynapi pipas Diospa qayllanpi mana hatuntukunanpaq. 30 Ichaqa Diosraykum qamkunaqa Jesucristowan huklla kachkankichik, Jesucristowanmi yachanchik Diosqa yachayniyuq kasqanta, payraykum runakunaqa Diospa chaskisqan kayta* atinchik,+ chuya kayta atinchik,+ paytaqmi huchamanta librasqa kananchikpaqpas wañukurqa,+ 31 chaynapi “alabakuqqa Jehova* Diosmantayá alabakuchun” nispa qillqasqa kasqanman hina kananpaq.+