Cantar de los Cantares
8 Sipasqa nirqataqmi: “¡Mayna allinraq kanman
mamaypa ñuñusqan turillay kaptikiqa!
Turillay kaptikiqa maypiña tupaspaypas muchaykuykimanchá,+
manach pipas pinqawanmanchu.
2 Turillay kaptikiqa
mamaypa wasinmanchá pusakuykiman,+
yachachiwaqniy mamaypa wasinmanchá yaykuchikiman.
Chaypich miskillaña vinota mallichikiman,
chaypich granadapa chayllaraq qapisqa yakunta quykiman.
4 Yaw Jerusalenpi warmikuna, kunanyá juraykuwaychik
manaraq punchawpi nitaq sunquypas manaraq munachkaptin pitapas kuyanaypaq ama hikutawanaykichikpaq”, nispa.+
5 Sipaspa turinkunañataqmi nirqaku:
“¿Pitaq wak chunniqmanta qispimuchkan yananman hapipakuykuspa?”, nispanku.
Sipasñataqmi nirqa: “Manzanapa sikinpi puñuchkaptikim rikchachirqayki.
Chay sachapa sikinpim mamaykiqa wachakusurqanki.
Chay sachapa sikinpim mamaykiqa unqukusurqanki.
6 Kunkaykipi warkurayaq collarta hinayá sunquchaykipi apakuway,
makikipi anillota hinayá apakuway. Kuyakuyqa wañuy hina atiyniyuqmi,
imaynam wañuqkunapa kasqanman* uraykunanmantaqa mana pipas lluptinmanchu,+
chaynam kuyanakuqkunapas mana kacharinakunkuchu.
Kuyanakuyqa rawrachkaq nina hinam, kuyanakuytaqa ninata ratachichkaq hinam Jehova* Dios qallarichirqa.+
7 Maynaña timpuyllaña-timpuq achka yakupas chayna kuyakuytaqa manam wañuchinmanchu,+
maynaña kallpaq mayupas chayna kuyakuytaqa manam chinkachinmanchu.+
Manam pipas tukuy ima kapuqnintaña quspapas kuyaqnintaqa tarinmanchu,
imapas qusqan mana chaskisqa kaptinchá yanqapaq kanman*”, nispa.
8 Sipaspa turinkunañataqmi nirqaku:
“Paninchikqa warmallaraqmi,+
manaraqmi ñuñunkunapas wiñanraqchu.
¿Imataraq ruwasunchik paninchikman pipas yaykupakamuptinqa?
9 Pay pirqa kaptinqa hawanpich
qullqimanta taksa torrechakunata ruwasun,
punku kaptinñataqmi
cedromanta chakanawan trankasun”, nispa.
10 Sipasñataqmi nirqa:
“Pirqa hinam ñuqaqa kani,
ñuñuykunapas torrekuna hinam.
Chaymi paypa qayllanpiqa hawkalla tarikuni.
11 Salomonqa Baal-hamonpi uvas chakrayuqmi.+
Payqariki chaypi llamkaqkunamanmi uvas chakranta quykun.
Chaymi uvas pallasqankumanta sapakama 1.000 qullqita* qunku.
12 Yaw Salomon, qamqa paykunamantam 1.000 qullqita chaskinki,
200 qullqiñataqmi uvas chakrata cuidaq runakunapaq.
Ñuqapam ichaqa kapuwanña uvas chakrayqa, chayqa ñuqallapam”, nispa.
13 Yananñataqmi* nirqa: “Huertapi kaq kuyakusqay yanalláy,+
puriqmasiykunapas* ecoyki uyariykuytam munachkanku.
Ñuqapas uyariykuytam munachkayki”, nispa.+
14 Sipasñataqmi nirqa:
“Kuyakusqay yanalláy, utqaymanyá hamuy,
luwichu hinayá utqayman pawamuy,+
miskillaña asnaq qurakunapa kasqan urquman pawaq malta taruka hinayá pawamuy”, nispa.