2 Corintios
3 ¿Kaqmantachu pim kasqaykuta kikiyku riqsichikunayku? ¿Wakinkuna hinachu pim kasqaykumanta cartapiraq rimananta necesitaniku? ¿Cartataraqchu qamkunamanta mañakusqaykiku? Manam. 2 Qamkunam kankichik pim kasqaykuta riqsichiq cartaykuqa,+ sunquykupi qillqasqa, lliw runapa yachasqan hinaspa leesqan cartaqa. 3 Qamkunam ñuqaykupa qillqasqayku Cristopa* cartan kankichik, ñuqaykuqa kaniku hukkunaman willakuspa servikuqkunam.+ Qillqasqaqa kachkan manam tintawanchu, aswanqa Diospa atiyninwanmi. Manataqmi tabla rumipichu,+ aswanqa runakunapa sunqunpim.+
4 Chaynataqa niniku Cristorayku Diospi hapipakuspaykum. 5 Ñuqaykuqa manam kikillaykumantachu allin yachachisqaqa kachkaniku, chaymi mana niymankuchu kikillaykumanta imatapas ruway atisqaykutaqa, allin yachachiqqa kaniku Dios yanapawaptinkum.+ 6 Paymi allintapuni yachachiwarqaku musuq contrato* ruwasqanmanta willakuq kanaykupaq.+ Willakunchikqa manam qillqasqa kamachikuykunapa nisqanman hinachu,+ aswanqa Diospa atiyninpa yanapakuyninman hinam. Qillqasqa kamachikuyqa wañuymanmi apakun,+ Diospa atiyninmi ichaqa kawsakuyta quwanchik.+
7 Wañuymanta rimaq qillqasqa kamachikuyqa rumipim qillqasqa karqa, hinaspapas kancharispanmi rikurimurqa,+ chaymi Israel runakunaqa Moisespa uyanta mana rikuyta atirqakuchu uyan kancharisqanrayku.+ Chay kanchariyqa chinkaruqllam karqa. 8 Qillqasqa kamachikuy kanchariq kachkaptinqa, ¿manachu aswanraq kancharinman runankunaman atiyninta Diospa imayna qusqanqa?+ 9 Wañuymanta rimaq qillqasqa+ kamachikuy kanchariptinqa,+ ¡aswan kanchariqraqmi runankunata allin ruwaq kasqankupaq Diospa imayna chaskisqanqa!+ 10 Qillqasqa kamachikuypa kanchariyninqa manam imachu musuq contratopa kanchariyninwan tupachiptinchikqa.+ 11 Chinkaruqlla kamachikuyqa kanchariywanmi rikurimurqa.+ Hinaptinqa, ¡aswan kanchariyniyuqmi mana tukuq musuqmanta contratoqa!+
12 Chayna kananmanta mana iskayrayasqanchikraykum+ mana manchakuspa rimachkanchik. 13 Ñuqanchikqa manam Moises hinachu ruwachkanchik, payqa uyantam telawan tapakurqa,+ chinkaruqlla qillqasqa kamachikuyta Israel runakuna mana qawanankupaq. 14 Israel runakunapa yuyayninmi tapasqa rikurirurqa.+ Kunankamapas yuyayninkuqa hinallam telawan tapasqa hina kachkan,+ paykunaqa manam entiendenkuchu runankunawan ñawpaqta Diospa contrato ruwasqankutaqa, chay telataqa Cristollam hurqunman.+ 15 Kunankamapas paykunapa sunqunqa telawan tapasqa hinam+ kachkan, chaymi mana entiendenkuchu Moisespa qillqantaqa.+ 16 Jehova* Diosman pipas kutirikuptinmi ichaqa tapaqnin telaqa hurqusqaña.+ 17 Jehova* Diosqa espiritum,+ Jehova* Diospa atiyninwan* kaqkunaqa librem kanku.+ 18 Ñuqanchikqa tapawaqninchik telata hurqukuruspam Jehova* Diospa kanchariyninta espejo hinaña qawachinchik, Diosqa espiritum. Chayta ruwaptinchikmi Jehova* Diosqa tikrawanchik pay hina kananchikpaq, chaynapi kanchariyninta aswan-aswanraq qawachinanchikpaq.+