Jeremias
30 Jehova Diosmi Jeremiasta rimapayaspan nirqa: 2 “Israelpa Jehova Diosninmi nini: ‘Kay nisqaykunatayá qillqay. 3 Ñuqa Jehova Diosmi nini: “Hamuchkanmi punchawkuna Israel runaykunatawan Juda+ runaykunata kutichimunaypaq, ñawpaq abuelonkuman qusqay allpamanmi kutichimusaq, chay allpaqa kaqmantam paykunapa kanqa, ñuqa Jehova Diosmi chaynata nini”’”, nispa.+
4 Israel runakunatawan Juda runakunatam Jehova Dios rimapayarqa.
5 Jehova Diosmi nin:
“Manchakuymanta qapariyllatam uyarirqaniku,
manchakuyllam, manam hawka kayqa kanchu.
6 Tapukamuychikyá, yaqachu qariqa wawata wachakunman.
¿Imaynanpitaq kallpasapa qarikunata qawani wachakuchkaq warmi
hina wiksanku hapikuchkaqta?+
¿Imaynanpitaq ayay-ayay uyayuq kachkanku?
7 ¡Chay punchawqa manchakuypaqmi kanqa!+
Chay punchaw hinaqa manam huk punchawqa kanqachu.
Jacobpaqmi llakiqa.
Ichaqa manam chay sasachakuypiqa tarikunqachu”, nispa.
8 Angelkunata kamachiq Jehova Diosmi nin: “Chay punchawqa apasqayki yugutam pakisaq, matankaykimantam* hurqusaq, kuyundakunatapas iskaymanmi tipisaq, huklaw llaqtayuq runakunaqa manañam munaychakusunkichikñachu. 9 Paykunaqa Jehova Diostañam yupaychanqaku, kamachiqninku Davidpa runanñam kanqaku”, nispa.+
10 Jehova Diosmi nin: “Yupaychaqniy Jacob, qamqa amayá manchakuychu.
Israel, amayá manchakuymantaqa kaychu.+
Kay karu-karupi kasqaykimantam kutichisqayki.
Miraynikikunatapas huklawpi kasqankumantam kutichimusaq,+
Jacobqa kutimuspanmi mana pipa manchachisqan hawka kawsakunqa,
allinñam kawsakunqa”, nispa.+
11 Jehova Diosmi nin: “Ñuqaqa qanwanmi kachkani yanapanaypaq,
chiqichiptiy maymi kasqaykichik nacionkunatam ichaqa chinkachisaq,+
qamtam ichaqa mana chinkachisqaykichu.+
Chaywanpas corregisqaykim,
tukuy ima ruwasqaykimantam castigasqayki”, nispa.+
12 Jehova Diosmi nin:
“Tukuy imam pasarusunki, chaykunamanta hurquytaqa manam atikimanchu,+
heridaykiqa mana hampiy atinam.
13 Manam pipas allinnikipaqqa rimarinchu,
unquynikiqa mana hampiy atinam.
Qampaqqa manañam hampi kanchu.
14 Llapallan waynaykikunam qunqarusunki.+
Paykunaqa manañam maskasunkichu.
Chiqnisuqniki runa hinam ñakarichirqayki,+
mana allin runa hinam castigaruyki,
mana allin ruwasqaykimantawan huchaykikunamantam chaytaqa ruwaruyki.+
15 ¿Imaynanpitaq kay mana allinkuna pasasusqaykimanta rimapakunki?
¡Kay nanayqa qanmantaqa manam chinkanqachu!
Kayqa mana allinllata ruwasqaykiraykum hinaspa huchaykikunaraykum,+
chaykunaraykum kaytaqa ruwaruyki.
16 Qamta millpusuqnikikunaqa hukkunapa millpusqanmi kanqaku,+
chiqnisuqnikikunapas huklawman apasqam kanqaku.+
Tukuy imaykikunata qichusuqnikikunapas tukuy imanku qichusqam kanqaku,
tukuy imaykikuna suwasuqnikikunapas tukuy imanku suwasqam kanqaku”, nispa.+
17 Jehova Diosmi nin: “Ichaqa allinyachisqaykim, heridaykikunatam hampisqayki,+
qamtaqa mana pipa qawarisqanwanñam runakuna suticharusunki, paykunam nichkanku:
‘Siontaqa saqirunkuñam’”, nispa.+
18 Jehova Diosmi nin:
“Jacobpa carpanmanta kaqkunatam huklawmanta kutichimusaq,+
llakipayasqayraykum carpaykichikkunatapas mana imanasaqchu.
Llaqtatapas hina maymi kasqanpim ruwanqaku,+
kamachiqpa wasinpas maymi kasqanpim kanqa.
19 Kusikuymanta takisqankum uyarikunqa, asisqankum uyarikunqa.+
Achka-achka kanankupaqmi mirachisaq*,+
paykunaqa manam aschallachu kanqaku,
manam mana kaqpaq hapisqachu kanqaku.+
20 Paypa churinkunaqa ñawpaqta hinam kanqa,
paykunaqa ñawpaqniypim sunita sayanqaku.+
Ñakarichiqninkunataqa ñuqam llapallanta chinkachisaq.+
21 Paykunamanta hukninmi kamachiqninku kanqa,
Paykunamanta hukninmi kamachiqninku kanqa.
Asuykamuwananpaqmi qayasaq, hinaptinmi payñataq asuykamuwanqa”, nispa.
Jehova Diosmi nin: “¿Mana qayachkaptiyqa pitaq asuykamuwanman?”, nispa.
22 “Qamkunam runaykuna kankichik.+ Ñuqañataqmi Diosnikichik kasaq”.+
23 Jehova Diospa piñakuyninqa llumpa-llumpay wayra hinam hamunqa,+
llumpa-llumpay wayra hinam, muyuq wayra hinam mana allin runakunapa hawanman chayamunqa.
24 Imam munasqanta ruwanankamam
hinaspa tantiasqanta ruwanankamam Jehova Diospa piñakuyninqa hinalla rawranqa.+
Tukupay punchawkunapim kaymantaqa sumaqta yachankichik.+