2 Cronicas
14 Abias wañukuptinmi pamparurqaku ñawpaq abuelonkupa pampakusqan Davidpa llaqtan sutiyuq llaqtapi.+ Hinaptinmi churin Asaña kamachirqa, pay kamachiptinmi hawka kawsakurqaku chunka wata.
2 Asaqa Jehova Diospa munasqanman hina kawsakuspam allin kaqkunata ruwarqa. 3 Paymi taytacha-mamachakunapa altarninkunatawan yupaychana patakunata chinkachirqa.+ Ñutuparurqataqmi yupaychana suytu rumikunatapas,+ kuchururqataqmi yupaychana kullukunatapas.+ 4 Chaymantapas Asaqa Juda nacionniyuq runakunatam nirqa Jehova Diosta maskanankupaq, lliw kamachikuyninkunata kasukunankupaq. 5 Chaynatam Juda nacionpi llapallan llaqtakunamanta chinkarachirqa yupaychana patakunatawan taytacha-mamachakunapaq incienso* kañana altarkunata.+ Asapa kamachisqan watakunapim hawka kawsakurqaku. 6 Chayna kawsakusqankuraykum Juda nacionpi llaqtakunata ruwachirqa murallayuqta.+ Jehova Dios yanapaptinmi mana pipa imanasqan kawsakurqaku.+ 7 Juda runakunatam Asa nirqa: “Kay llaqtakunata ruwasunchik murallayuqta, torreyuqkunata+ hinaspa punkunkunatapas trankayuqtakama. Jehova Diosta maskasqanchikraykum kay nacionqa makinchikpiraq kachkan. Diosta maskasqanchikraykumá hawkallata kawsachiwachkanchik”, nispa. Llaqtakuna hatarichisqantaqa sumaqtam qispirachirqa.+
8 Asapam karqa Juda ayllumanta 300.000 soldadonkuna. Paykunapam karqa hatun harkachikunankuwan lanzanku. Benjamin ayllumantañataqmi karqa 280.000 kallpasapa soldadonkuna, paykunapam karqa taksa harkachikunankuwan* flechanku.+
9 Chaymanta qipatam, Etiopia nacionniyuq Zeraqa Maresa llaqtaman+ hamurqa Asawan peleaq, hamurqaqa 1.000.000 soldadonkunawanmi hinaspa 300 carretankunawanmi.+ 10 Asapas Maresa llaqtapi Zefata pampamanmi rirqa Zerawan peleaq. 11 Manaraq peleachkaspanmi Asaqa Jehova Diosta mañakuspan+ nirqa: “Jehova Dioslláy, qamqa pitapas yanapaykunkim.+ Qampim hapipakullaniku Jehova Diosllayku,+ chayraykuyá yanapaykullawayku. Qampa sutikipim paykunawan peleaq hamurqaniku,+ paykunaqa ñutu allpa hinallam kanku qampaqqa. Jehova Diosnilláy, qanmi Diosniyku kanki”, nispa.+
12 Jehova Diospa yanapakuyninwanmi Asawan Juda runakunaqa Etiopia nacionniyuq runakunata wañuchiyta qallaykurqaku, hinaptinmi wakinñataq ayqikurqaku.+ 13 Asawan soldadonkunañataqmi Guerar llaqtakama qatirqaku,+ qatispankum Jehova Diospa yanapakuyninwan Etiopia nacionniyuq runakunataqa lliwta wañurachirqaku, hinaspam tukuy imankutapas apakurqaku. 14 Chayta qawaspankum Guerar llaqtapa hichpanpi yachaqkunaqa* Jehova Diosmanta mancharisqallaña karqaku, chaymi paykunapa tukuy imantapas qichururqaku. Paykunaqa kapuqniyuqmi karqaku. 15 Qichururqakutaqmi ovejankutapas chaynataq camellonkutapas. Chaymantam Jerusalen llaqtaman kutikurqaku.