2 Cronicas
15 Odedpa churin Azariasmanmi Diospa atiynin huntaykurqa. 2 Chaymi Azariasqa Asata taripaspan nimurqa: “¡Kamachiq Asa, Juda runakuna hinaspa Benjamin runakuna, llapallaykichikyá uyariykuwaychik! Jehova Diosta kasukuptikichikqa paypas manam saqisunkichikchu.+ Diosta maskaspaykichikqa tarinkichikmi,+ saqiruptikichikmi ichaqa paypas saqirusunkichik.+ 3 Israel runakunaqa unaymi Diosmanta karunchakururqaku. Manam paykunapaqqa karqachu sacerdotepas, manataqmi Diospa kamachikuynintapas kasukuqkuchu.+ 4 Ichaqa sasachakuypi kaspa Jehova Diosman kutirikuptinkum yanapaykurqa.+ 5 Llapallan nacionpim sasachakuy karqa, chaymi hawkaqa mana maymanpas riqkuchu. 6 Diosmi tukuy ima sasachakuykunapi kanankuta saqirqa, chaymi nacionkunapas, llaqtakunapas wañuchinakuyllapiña karqaku.+ 7 Qamkunaqa ama manchakuspayá kallpanchakuychik,+ Dios kasukusqaykichikqa manam yanqapaqchu”, nispa.
8 Azariaspa chayna nisqantawan Diosmanta willakuq* Odedpa willakusqanta uyarispanmi Asaqa mana manchakuspan Juda nacionpi taytachakunata chinkarachirqa.+ Chinkarachirqataqmi Efrain urqukunapi munaychakusqan llaqtakunamantapas. Hinaspam allichachirqa Jehova Diospa altarninta, chayqa karqa Jehova Diospa wasin punkupim.+ 9 Chaymantam Juda ayllutawan Benjamin aylluta huñuchirqa, huñuchirqataqmi paykunapa allpanpi yachaq* Efrain, Manases hinaspa Simeon ayllukunatapas.+ Paykunaqa Israel nacionniyuq kachkaspankupas Asata Jehova Dios yanapasqanta qawaspankum Asamanña hukllawakururqaku. 10 Paykunaqa Jerusalen llaqtapim kimsa kaq killapi huñunakurqaku, chayqa karqa 15 wataña Asa kamachichkaptinmi. 11 Chay punchawmi Jehova Diospaq wañuchirqaku 700 torokunatawan 7.000 ovejakunata. Chaykunaqa peleaq rispa qichumusqankum karqa. 12 Chaymantapas ñawpaq abuelonkupa yupaychasqan Jehova Diosta tukuy sunqunkuwan hinaspa tukuy vidankuwan yupaychanankupaqmi contratota* ruwarqaku.+ 13 Pipas Jehova Diosta mana yupaychaqqa wañunanmi karqa.+ 14 Sunqumantapuni yupaychanankupaqmi Jehova Diostapas kusisqa nirqaku, nirqakuqa huk kunkallam cornetillatawan waqrata pukuspanku. 15 Chaytaqa tukuy sunqunkuwanmi nirqaku, chaymi kusisqallaña karqaku. Paykunaqa tukuy sunqunkuwanmi Jehova Diosta maskarqaku,+ hinaptinmi Diosqa hawka kawsakunankupaq yanaparqa.+
16 Asapa abuelan Maacam+ millakuypaq taytachata ruwarachirqa sayachisqa kulluta yupaychanankupaq.+ Chaymi Asaqa abuelan Maacata kamachiq kasqanmanta qarqururqa. Millakuypaq taytacha ruwachisqantapas ñutuparuspanmi Cedron wayqupi kañarurqa.+ 17 Israel runakunapa+ kasqanpi yupaychanapaq ruwasqa muqukunatam ichaqa mana chinkachirqachu.+ Chaywanpas Asaqa wañukunan punchawkamam tukuy sunqunwan Diosta yupaycharqa.+ 18 Asaqa Diospa wasinmanmi apachimurqa taytanpawan kikinpa sapaqchasqan qurita, qullqita hinaspa serviciokunata.+ 19 Asa kamachiptinmi 35 wata hawka kawsakurqaku.+