Salmos
ISKAY KAQ
(Salmos 42-72)
Takiqkunata yachachiqpaq. Maskil*. Coreypa mirayninkunapa takisqan.+
42 Imaynam luwichupas yakunayachikuspan yakuta maskan,
chaynam ñuqapas Diosnilláy qamta maskallayki.
2 Diosniymantam yakunayachikuchkaq hina kallachkani.+
¿Haykapiraq Diosniypa qayllanpi kallasaq?+
3 Tuta-punchawmi wiqillayta millpuchkani.
Chisyaymi asikuwaspanku ninku: “¿Maytaq chay Diosnikiqa?”, nispanku.+
4 Yuyarinim achkallaña runakunawan purisqayta,
paykunapa ñawpaqnintam
kusikuyllawanña takistin Diospa wasinman riq kani.
Diosta hatunchastinmá riq kani.
Chaykunata yuyarispaymi hukmanyasqa tarikullani.+
5 ¿Imanasqataq hukmanyasqa kallachkani?+
¿Imanasqataq mana hawkachu tarikullani?
Diosnillaytam suyallasaq.+
Paytaqa waqaychaykuwaqniy kasqanraykum kaqmanta hatunchasaq.+
Qamtam yuyariki Jordanpi kaspay, Hermon urqupi kaspay,
Mizar urqupi kaspay.
7 Kallpachkaq yakutam uyarini.
Chayqa paqchaykikunapa qapariyninmi.
Yakupas urquchakuruspam hawaytaraq pasarun.+
8 Punchawmi Jehova Diosqa imaña kaptinpas hinalla kuyawanqa.
Tutankunam Diosniypaq takisaq. Kawsachiwaqniy Diosniytam mañakusaq.+
9 Harkawaqniy qaqa hina Diosniytam tapusaq:
“¿Imanasqataq qunqarullawanki?+
¿Imanasqataq chiqniwaqniykuna ñakarichiwaptin kayman-chayman llakisqa purillachkani?”, nispay.+
10 Wañurachiwayta munaspankum* chiqniwaqniykunaqa tukuyta niwan.
Chisyaymi asikuwaspanku ninku: “¿Maytaq chay Diosnikiqa?”, nispanku.+
11 ¿Imanasqataq hukmanyasqa kachkani?
¿Imanasqataq mana hawkachu tarikullani?
Diosnillaytam suyallasaq.+
Libraykullawaqniy Diosniy kasqanraykum paytaqa kaqmanta hatunchasaq.+