Jeremias
18 Jehova Diosmi Jeremiasta rimapayaspan nirqa: 2 “Allpa mankakunata ruwaq runapa wasinman riy,+ chaypim ima niy munasqayta nisqayki”, nispa.
3 Ñuqaqa chaynata niwaptinmi allpa mankakunata ruwaq runapa wasinman rirqani, chay runañataqmi mankata ruwachkasqa. 4 Ruwasqan mankañataqmi mana munasqanman hinachu lluqsirqa. Hinaptinmi chay allpa mankata ruwaq runaqa chay mituwan kaqmanta munasqanman hinaña huk allpa mankata ruwarqa.
5 Jehova Diosñataqmi niwarqa: 6 “Ñuqa Jehova Diosmi nini: ‘Israelpa mirayninkuna, ¿manachu ñuqaqa kay allpa mankata ruwaq runa hina qamkunawanpas ruwayman? Israelpa mirayninkuna, ñuqapa makiypiqa qamkunaqa allpa mankata ruwaq runapa makinpi mitu hinam kankichik.+ 7 “Qurata sapinmanta pilachkaq hinam chinkachisaq, taqmasaqmi, tuñichisaqmi” nispa huk nacionmanta nichkaptiy,+ 8 chay nacionpi runakuna mana allin ruwasqankuta saqispa allin kaqtaña ruwaptinkuqa, ñuqapas chay nacionpi runakunata imam ruwanaypaq tantiasqaytaqa manañam ruwasaqchu.+ 9 “Hatarichisaqmi, allintam takyachisaq” nispa huk nacionmanta nichkaptiy 10 chay nacionpi runakuna chiqnisqay kaqkunata ruwaptinqa chaynataq nisqaykunata mana uyarikuptinkuqa, ñuqapas chay nacionpi runakunapaq allin kaqkuna tantiasqaytaqa manam ruwasaqchu’, nispa.
11 Ama hina kaspayá Jerusalen runakunamanwan Juda runakunaman nimuy: ‘Jehova Diosmi nin: “Qamkunaman ñakariyta kacharimunaypaqmi tantiachkani, qamkunata castiganaypaqmi tantiachkani. Ama hina kaspayá mana allin ñannikichikta saqiychik, mana allin kawsasqaykichiktayá saqiychik, mana allin ruwasqaykichiktayá saqiychik”’”, nispa.+
12 Paykunam ichaqa nirqaku: “¡Yanqam chayqa!+ Ñuqaykuqa hinallam kikiykupa munasqaykuta ruwasaqku, llapallaykum munasqaykuta ruwakusaqku”, nispa.+
13 Jehova Diosñataqmi nin:
“Ama hina kaspayá huklaw nacionkunata niychik:
‘¿Yaqachu pipas kayta uyarirqa?’, nispa.
Israelpa wawanmi* pasaypaq mana allin kaqta ruwarun...+
14 ¿Yaqachu Libano qatapi kaq rumikunapi riti chullunman?
¿Yaqachu karu-karumanta hamuq chiri-chiri yaku chakinman?
Ñawpaqmantaraq kaq ñanninkupim runakunata urmachinku.+
Chaynapi chay runakunapas mana allichasqa* ñanninta rinankupaq,
16 allpankuta millakuypaqta ruwanankupaq+ hinaspa allpankuta runakunapa asikunanta* ruwanankupaq.+
Chayninta puriqkunapas chayta qawaykuspam mancharikunqaku,
umankuta aywispam asikunqaku.+
17 Intipa qispimunan lawmanta wayra hinam chiqniqninkunapa ñawpaqninpi kayman-chayman chiqichisaq.
Ñakarisqanku punchawpi yanapanaymantaqa qipanchasaqmi”, nispa.+
18 Paykunañataqmi nirqaku: “Hakuchik tantiamusun Jeremiasta imatapas ruwanapaq,+ sacerdotenchikkunapa kamachikuyninqa, yachayniyuq runakunapa nisqankunaqa, willakuqkunapa* nisqankunaqa manam chinkanqachu. Jeremiasmanta tukuyta nimusunchik, hinaspapas amayá nisqantaqa uyarisunchu”, nispa.
19 Jehova Dioslláy, uyariykuwayá,
chiqniqniykunam tukuyta nichkanku.
20 ¿Yaqachu pipas allin kaqta ruwachkaptin mana allinwan kutichinmanku?
Paykunaqa ñuqapaqmi uchkuta uchkurunku.+
Yuyariyá paykunaman piñakuynikita mana kacharinaykipaq
paykunamanta allin rimasqayta.
21 Paykunapa churinqa yarqaymantayá kachun,
espadawanyá wañuchun.+
Warmikunapapas wawankuwan qusankuyá wañuchun.+
Qarikunapas unquywanyá wañuchunku,
musukunapas peleasqankupiyá wañuchunku.+
22 Kachamusqayki runakuna tukuy imankuta apakuptinkuyá
wasinkumanta qaparisqankupas karukama uyarikuchun.
Paykunaqa hapiruwanankupaqmi uchkuta uchkurunku,
sarunaypaqmi tuqllakunata churarunku.+
23 Jehova Dioslláy,
qanmi yachanki wañuchiwanankupaq ima tantiasqankutaqa.+
Amayá paykunapa mana allin ruwasqantaqa pampachaychu,
amayá huchankutaqa pampachaychu.
Paykunataqa saqiyá piñakuyniki punchawpi ñawpaqnikipi wichinankupaq.+