Jeremias
20 Imerpa churin Pasjurmi sacerdote karqa, hina paytaqmi Jehova Diospa wasinmanta cuentallikuqpas karqa, payqa Jeremiaspa willakusqantam uyarichkarqa. 2 Chayta uyariruspam Pasjurqa Diosmanta willakuq* Jeremiasta maqarurqa. Hinaspanmi uchkuyuq tablaman* hinarurqa makinta, chakinta hinaspa umanta.+ Chay tablaqa karqa Benjaminpa punkunwan sutichasqanku punkupim, chayqa karqa Jehova Diospa wasinpim. 3 Paqarintinmi Pasjurqa chay uchkuyuq tablamanta Jeremiasta hurqururqa, hinaptinmi Jeremiasqa nirqa:
“Manañam Pasjurñachu sutikiqa kanqa, manchakuywanñam Jehova Diosqa suticharusunki.+ 4 Jehova Diosmi nin: ‘Kikikipaqwan kuyaqnikikunapaqmi manchakuypaq kanki. Qawachkaptikim kuyaqnikikunataqa chiqniqninkuna wañuchinqa.+ Babiloniata kamachiqpa makinmanmi Juda llaqtata llapallanta churasaq, hinaptinmi Babiloniaman apaspa chaypi paykunata wañuchimunqa.+ 5 Chiqniqninkunapa makinmanmi churasaq kay llaqtapi tukuy ima kaqkunata, kapuqninkunata, kuyayllapaq kapuqninkunata hinaspa Juda llaqtata kamachiqkunapa quri-qullqinkunata.+ Tukuy imankutam apakunqaku, tukuy imam makinkupi kanqa, hinaptinmi Babiloniaman apakunqaku.+ 6 Pasjur, qamñataqmi wasikipi kaqkunawan kuska Babiloniaman apasqa kanki. Llullallata willakusqaykiraykum Babiloniapi wañunki, kuyaqnikikunawan pampasqam kanki’”, nispa.+
7 Jehova Dioslláy, qam pantarachiwaptikim munasqaykiman hina ruwarqani.
Kallpasapa kasqaykiraykum venceruwanki.+
Kunanqa tukuy punchawmi ñuqamanta asikunku,
llapallan runakunam ñuqamanta burlakunku.+
8 Ñuqaqa sapa kuti willakuspaymi kallpawan nini:
“¡Sasachakuymi hamuchkan, chinkanaykichik punchawmi chayamuchkan!”, nispay.
Jehova Diospa niwasqanta willakusqayraykum runakunaqa tukuyta niwan, ñuqamantam tukuy punchaw asikunku.+
9 Hinaptinmi ñuqaqa nirqani: “Paymantaqa manañam willakusaqñachu,
sutinpipas manañam rimasaqñachu”, nispay.+
Niwasqankunam ichaqa sunquypi nina hina rawrarqa, tulluypa ukunpim nina hina rawrarqa,
manañam upallalla kaytaqa atirqaniñachu,
willakuytañam munarqani.+
10 Ñuqaqa, ñuqamanta mana allinkunata rimasqankutam uyarirqani,
manchakuymantam karqani.+
Paykunam nirqaku: “¡Juezmanyá pusaychik,
lliwyá pusasunchik!”, nispa.
Allinlla kanayta munaqkunapas imapipas pantanaytam munarqaku,+ paykunam nirqaku:
“Imapipas pantaruptinmi chayman hina venceruspa vengakusunchik”, nispa.
11 Jehova Diosmi ichaqa ñuqawan karqa manchakuypaq soldado hina.+
Chayraykum chiqniwaqniykunaqa wichinqaku, paykunaqa manam atiwanqachu.+
Paykunaqa pinqaypim kanqaku, ima tantiasqankupas yanqam kanqa.
Wiñaypaqmi pinqaypi kanqaku, chaytaqa manam pipas qunqanqachu.+
12 Angelkunata kamachiq Jehova Dioslláy, qamqa qawachkankim allin ruwaq runataqa,
qamqa yachankim runapa imam piensasqantaqa, qamqa yachankim runapa sunqunpi ima kasqantaqa.+
Dioslláy, qawaykachiwayá paykunata vengakuspa imam ruwasqaykita,+
ñuqaqa manam iskayrayanichu allin ruwaq juez kasqaykimantaqa.+
13 ¡Jehova Diospaqyá takiychik! ¡Jehova Diostayá hatunchaychik!
Payqa mana allin ruwaqkunapa makinmantam wakchakunata libraykurqa.
14 ¡Ñakasqayá kachun mamaypa wachakuwasqan punchawqa!
¡Ñakasqayá kachun mamaypa unqukuwasqan punchawqa!+
15 Ñakasqayá kachun kusikunanpaq
“¡churikiqa qarim kasqa!” nispa taytayman niq runapas.
Chaynata niptinmi taytayqa anchata kusikurqa.
16 Chay runaqa Jehova Diospa mana llakipayarispan chinkachisqan llaqtakuna hinayá kachun.
Achikyaytayá qapariyllata uyarichun, chawpi punchawtayá peleanankupaq qayakuyllata uyarichun.
17 Amalaya mamaypa wiksallanpiraq wañurachiwanman karqa.
Mamaypa wiksanpi wañuruptiyqa mamaychá pampakunay uchku hina kanman karqa.
Hinaptinqa mamaypa wiksanpichá wiñaypaq kayman karqa.+
18 ¿Imapaqtaq mamay wachakuwarqa
ñakariytawan llakikuyta qawanaypaq?
¿Imapaqtaq mamay wachakuwarqa pinqaypi kanaypaq?+