Jeremias
4 Jehova Diosmi nin: “Yaw Israel, kutirikamuwaspaykiqa,
ñuqaman kutirikamuwaspaykiqa
hinaspa ñawpaqniymanta millay taytacha-mamachaykikunata hurquspaykiqa
manañach ayqin-ayqinllañachu kawaq.+
2 Imam kaqta rimaspa, allin ruwayman hina hinaspa allin kaqta ruwaspa
‘Jehova Diospa sutinpim’ rimarini niptikiqa,
nacionkunatam payqa bendecinqa,
kusikuyllawanñam paymanta rimanqaku”, nispa.+
3 Juda runakunatawan Jerusalen runakunatam Jehova Diosqa nichkan:
“Allin allpatayá yapuychikqa,
amañayá kichka ukukunapiqa tarpuychikchu.+
4 Qari kayninkupi señalachikuqkunaqa ñuqa Jehova Diospaqmi sapaqchasqaña kanku,+
chaynayá qamkunapas Juda runakunawan
Jerusalen runakuna sunquykichikmanta mana allin kaqkunata hurquychik,
chaynapi mana allinkuna ruwasqaykichikmanta piñakuyniy nina hina mana rupananpaq,
pipapas mana amachay atisqan mana rawrananpaq”, nispa.+
5 Juda llaqtapiyá willakuychik, Jerusalen llaqtapiyá willakuychik.
Llaqtapiyá kuchun-kuchun qapariychik hinaspa waqrata pukuychik.+
Kallpawan qayakuspaykichikyá niychik: “Huñunakuychik,
mana pipa yaykuy atinan llaqtakunaman ayqisun.+
6 Sion lawman qawaqtayá señalta hina qiruta* sayachiychik.
Ama sayaspayá maypi pakakunaykichikta maskaychik”, nispa.
Ñuqaqa norte lawmantam ñakariyta apamusaq,+ hatu-hatun ñakariytam apamusaq.
7 Payqa leon hinam sacha ukumanta rikuriramun,+
nacionkunata chinkachiqmi maymi kasqanmanta hamuchkan.+
Maymi kasqanmantam hamuchkan allpaykita qalaypaqta ruwananpaq.
Llaqtaykikunatam raqayllataña ruwanqa, mana pipa yachananñam* kanqa.+
8 Chayraykuyá qachqa pachawan churakuychik,+
llakipiyá kaychik, nanaymantayá qaparkachaychik,
Jehova Diosqa hinallam ñuqanchikpaq piñasqa kachkan.
9 Jehova Diosmi nin: “Chay punchawqa kamachiqpas sunqunpim hukmanyasqa tarikunqa,+
kamachiqpa yanapaqninkunapas sunqunkupim hukmanyanqaku,
sacerdotekunapas manchakuymantam kanqaku, Diosmanta willakuqkunapas* manam ima ruwaytapas atinqakuchu”, nispa.+
10 Ñuqañataqmi nirqani: “Llapallan kamachiq Jehova Dioslláy, ¡imamá kayqa! Kunkaykupiñataq espadaqa kachkan, kay runakunatawan Jerusalen runakunata ‘hawkayaypiñam kankichik’ nispa niwasqaykikuqa yanqam kasqa”, nispay.+
11 Chay punchawkunapiqa kay runakunatawan Jerusalen runakunatam ninqaku:
“Llaqtaypa wawantam* chaki allpapi mana imayuq muqukunamanta rupachkaq wayra pukumunqa,
chay wayraqa chayamunqa manam wayrachinanpaqchu
nitaq pichananpaqchu.
12 Ñuqa kamachisqayraykum chaylawkunamanta wayramunqa.
Kunanqa ñuqam nisaq paykuna imayna kananmanta.
13 Chiqnisuqnikichikmi hamunqa yanay-yanay puyu hina,
carretankupas hamunqa llumpa-llumpay wayra hinam.+
Caballonkupas ankakunatapas llalliriqmi hamunqa.+
¡Imaynaraq kasun, imapiraq rikukunchik!
14 Yaw Jerusalen, yanapanayta munaspaqa sunquykipi mana allin kaqkunatayá hurquy.+
¿Haykapikamataq mana allin kaqkunalla umaykipi kanqa?
15 Dan+ llaqtamantam willakuy chayaramun,
Efrainpa urqunkunamantam ñakariymanta willakamuchkan.
16 Nacionkunamanqa niychikyá,
Jerusalenta ima pasananmantayá willaychik”, nispa.
“Llaqtata watiqaqkunam karu llaqtakunamanta hamuchkanku,
Judapi kaq llaqtakunawan peleanankupaqmi qaparinqaku.
17 Chakrata qawaq runakuna hinam muyurirunku,+
paykunaqa manam kasukuwarqakuchu”,+ Jehova Diosmi chaynata nin.
18 “Mana allin kawsasqallaykim hinaspa imapas mana allin ruwasqallaykim qanman chayamusunki.+
¡Llumpa-llumpay ñakariymi qanmanqa chayamusunki,
qamqa mana allin ruwaqllañam kanki!”
19 ¡Imaynaraq kasaq, llumpay llakisqam kachkani!
Sunquymi nanawachkan.
Sunquymi pampanyachkan.
Manam upallallaqa kaymanchu,
ñuqaqa waqrapa waqasqantam uyariruni,
20 Kaypi-chaypi ñakariymantam willakurqaku,
llapallan llaqtam chinkarun.
Qunqayllamantam carpaykunapas wichirun,
qunqayllamantam toldoykunapas chinkarun.+
21 ¿Haykapikamataq sayachisqanku wak qiruta qawasaq?
¿Haykapikamataq waqrapa waqasqanta uyarisaq?+
22 “Runaykunaqa ruqrum kanku,+
manam kasukunkuchu.
Mana yachayniyuq churikunam kanku, mana yuyayniyuq churikunam kanku.
Mana allinta ruwanankupaqqa hichu-hichum kanku,
allin kaqta ruwanankupaqmi ichaqa mana”.
23 Kay allpatam qawarirqani, hinaptinmi qalaypaq mana imayuq kachkasqa, qalaypaq chunniqmi kachkasqa.+
hanaq pachatam qawarirqani, hinaptinmi qalaypaq tutayay kachkasqa.+
24 Urqukunatam qawarirqani, hinaptinmi katkatatachkasqa,
muqukunapas aywityachkasqam.+
25 Qawarirqanim, hinaptinmi mana imapas kasqachu,
alton pawaqkunapas manam kasqachu.+
26 Qawarirqanim, hinaptinmi huertapas qalaypaq mana imayuq kachkasqa,
llapallan llaqtakunam tuñisqa kachkasqa.+
Kaytaqa Jehova Diosmi ruwarun,
llumpa-llumpay piñakuyninpim kaytaqa ruwarun.
27 Jehova Diosmi nichkan: “Kay allpaqa llapallanmi qalaypaq mana imayuq qipanqa,+
ichaqa manam qalaypaqchu chinkanqa.
28 Tukuy chaykunaraykum kay allpaqa llakipi kanqa,+ hanaq pachapas tutayanqam.+
Ñuqaqa ñam nirqaniña, ñuqaqa ñam tantiarqaniña,
tantiasqaymantaqa manañam qipamanqa kutiymanñachu.
Tantiasqaytaqa ruwasaqpunim.+
29 Silladakuna hamusqanta uyarispankum hinaspa flechaqkuna hamusqanta uyarispankum
llaqtapi runakunaqa ayqinku.+
Runakunaqa sacha ukukunapim pakakuchkanku,
rumikunamanmi qispichkanku.+
Llapallan llaqtakunam chunnirun,
manañam pipas chay llaqtakunapiqa yachanñachu”, nispa.
30 ¿Imatataq ruwanki kunan kaynaña tarikuspa?
Ñawpaqtaqa puka pachawanmi churakuq kanki,
qurimanta alaqakunawanmi churakuq kanki,
ñawikikunatapas yanay-yanaytam pintakuq kanki.
Yanqam kuyayllapaq kanaykipaq allichakuq kanki,+
ancha-anchata kuyasuqnikikunaqa saqirusunkim,
paykunaqa wañuchiytañam munasuchkanki.+
31 Qayakuytam uyariruni wachakuq warmipa* qaparisqanta hina,
piwi* wawanta wachakuspa nanaywan warmipa qaparkachasqanta hinam uyariruni,
Sionpa wawanpa qaparisqanmi chayqa, yanqachallañam kachkan.
Makinta haywarispanmi nin:+
“¡Imaynaraq kasaq! ¡Amiruniñam runa wañuchiqkunata!”, nispa.