Jeremias
25 Nabucodonosor Babilonia nacionta kamachiyta qallaykuptinqa, Josiaspa churin Jeoyakimqa+ Juda naciontam tawa wataña kamachichkarqa. Hinaptinmi Diosqa Jeremiasta rimapayarqa Juda nacionta ima pasananmanta. 2 Diosmanta willakuq* Jeremiasmi Juda llaqtamantawan Jerusalenpi runakunamanta nirqa:
3 “Jehova Diospa rimapayawasqantam 23 watapuni qamkunamanqa kuti-kutirispa willarqaykichik, ichaqa manam uyariwarqankichikchu. Amonpa churin Josias+ Juda nacionta 13 wataña kamachisqanmanta kunankamam qamkunataqa kuti-kutirispa rimapayarqaykichik, ichaqa manam uyariwarqankichikchu.+ 4 Jehova Diosqa paymanta willakuqkunatam achka kutikama kachamurqa, qamkunam ichaqa mana kasukurqankichikchu, manataqmi kaqpaqpas hapirqankichikchu.+ 5 Paykunam nisurqankichik: ‘Ama hina kaspa, sapakamayá mana allin kawsasqaykichikta saqiychik, mana allin ruwasqaykichiktayá saqiychik,+ chaynapi qamkunamanwan ñawpaq abueloykichikkunaman Jehova Diospa qususqaykichik allpapi unay kawsakunaykichikpaq. 6 Amayá taytacha-mamachakunataqa yupaychaychikchu, amayá paykunapa ñawpaqninpiqa qunqurakuychikchu, amayá piñachiwaychikchu taytacha-mamachakunata ruwaspaykichikqa, manachayqa ñakariytam kacharimusqaykichik’, nispa.
7 Jehova Diosmi nin: ‘Qamkunam ichaqa mana uyarikuspaykichik kikikichikpa mana allinllaykichikpaq ruwakusqaykichik taytacha-mamachakunata yupaychaspaykichik piñachiwarqankichik’, nispa.+
8 Angelkunata kamachiq Jehova Diosqa chayraykum nichkan: ‘“Nisqayta mana kasukuwasqaykichikraykum 9 ñuqa Jehova Diosqa norte law+ allpapi runakunata qayachisaq, Babiloniata kamachiq serviqniy Nabucodonosortam qayachisaq,+ kay allpatawan+ runakunata hinaspa hichpanpi llaqtakunatawan chinkachinanpaqmi pusamusaq.+ Llapallantam chinkachisaq, manchakuypaqtam ruwasaq. Asikunankuñam kanqa, qalaypaq raqayllanñam kanqa. 10 Qaparispa kusikuyninkupas tukunqam, asi-asillaña kayninkupas tukunqam,+ noviopawan noviapa rimasqanpas tukunqam,+ kutanankupipas manañam kutanqakuchu, mecheronkupas wañunqam. 11 Kay allpaqa qalaypaqmi chunninqa, manchakuypaqñam kanqa, kay nacionkunaqa Babiloniata kamachiqpa makinpim 70 wata kanqa”’, nispa.+
12 Jehova Diosmi nin: ‘70 wata tukuytam+ ichaqa Babiloniata kamachiqta hinaspa nacionninta mana allin ruwasqankumanta castigasaq,+ Caldea runakunapa allpantaqa wiñaypaqmi chunnichisaq, pasaypaq mana imayuqtam saqisaq.+ 13 Nisqayman hinam kay allpamanqa sasachakuyta chayachimusaq, kay libropi llapallan qillqasqa kaqkunatam chayachimusaq, Jeremiaspa willakusqanman hinam llapallan nacionman sasachakuyta chayachimusaq. 14 Paykunataqa achka nacionkunam munaychakunqa, atiyniyuq kamachiqkunam munaychakunqa,+ imam ruwasqankuman hinam ruwasaq, taytacha-mamachakunata ruwakurusqankuraykum chayta ruwasaq’”, nispa.+
15 Israelpa Jehova Diosninmi niwarqa: “Kay hapisqay vasopi piñakuy vinota apaspayki llapallan nacionkunaman qumuy. 16 Qusqayki vinota tomaspankum tampi-tampi purinqaku, paykunaman wañuchinakuyta kachariptiymi muspaypi hina kanqaku”, nispa.+
17 Jehova Diospa hapisqan vasopi vinota mañaykuspaymi Jehova Diospa kachawasqan nacionkunaman tomachirqani.+ 18 Puntatam tomachirqani Jerusalenpi runakunaman, Judapi runakunaman,+ kamachiqkunaman hinaspa kamachiqta yanapaqkunaman, chaynapi kunan qawasqaykichikman hina llaqtanku raqayllaña kananpaq, manchakuypaq kananpaq, asikunanku kananpaq hinaspa ñakasqa kananpaq.+ 19 Chaymantañataqmi tomachirqani Egiptota kamachiqman*, runankunaman, kamachiqta yanapaqkunaman, llaqtapi runakunaman,+ 20 chay allpapi tukuy hinastinmanta yachaq* runakunaman, Uz allpapi llapallan kamachiqkunaman, Filistea allpapi+ llapallan kamachiqkunaman, Asquelonpi+ kamachiqman, Gazapi kamachiqman, Ecronpi kamachiqman, Asdodpi puchuqkunata kamachiqman, 21 Edom+ runakunaman, Moab+ runakunaman, Ammon+ runakunaman, 22 Tiro allpapi llapallan kamachiqkunaman, Sidon allpapi llapallan kamachiqkunaman,+ islapi kamachiqkunaman, 23 Dedan+ runakunaman, Teman runakunaman, Buz runakunaman, umankupa waqtanta rutukuq llapallan runakunaman,+ 24 Arabia+ allpapi llapallan kamachiqkunaman, tukuy hinastinmanta chunniqpi yachaq runakunata kamachiqkunaman, 25 Zimri allpapi llapallan kamachiqkunaman, Elam+ allpapi llapallan kamachiqkunaman, Media+ Elam allpapi llapallan kamachiqkunaman, 26 karupi kaqkunaman, hichpapi kaqkunaman, norte law allpapi llapallan kamachiqkunaman chaynataq kay allpapi llapallan kamachiqkunaman qatinasninpi. Tukuy chaykunamanta qipamanmi tomanqa Sesac*+ llaqtata kamachiq.
27 “Kaynatam ninayki: ‘Angelkunata kamachiq Jehova Diosmi nin, Israelpa Diosninmi nin: “Vomitanaykichikkama tomakuychik, manaña hatariyta atinaykichikkama sinkakuychik, espadawan wañuchisuqnikichikkunatam kachamusqaykichik, qamkunaqa manañam hatarinkichikñachu”’, nispa.+ 28 Chay vasopi vinota mana munaptinkuqa ninkim: ‘Angelkunata kamachiq Jehova Diosmi nin: “¡Tomanaykichikmi! 29 ¿Sutiy apaq llaqtaman+ ñakariyta kacharimunaypaq tantiachkaspaychu, qamkunatañataq mana castigaykichikman?”’, nispa.+
Angelkunata kamachiq Jehova Diosmi nin: ‘Castigoymantaqa manam ayqinkichikchu, kay allpapi runakunamanmi wañuchinakuyta kacharimusaq’, nispa.
30 Kay nisqaykunata willakuspaykim ninki:
‘Alto-altomantam Jehova Dios qaparimunqa,
chuya sitiopi kasqanmantam qaparisqan uyarikunqa.
Maymi kasqanmantam qaparisqan uyarikunqa, yachasqan sitiomanmi qaparinqa.
Vinopaq uvas saruq runakuna hinam qaparinqa,
kay allpa pachapi runakunata ima pasananmantam takinqa’, nispa.
31 Jehova Diosmi nin: ‘Kay allpa pachapa cantonkamam qapariy uyarikunqa,
Jehova Diosmi nacionkunawan juiciopi hapinakuchkan.
Payqa kikinpunim runakunapa imam ruwasqanta qawachinqa.+
Mana allin runakunatam ichaqa wañunankupaq akllanqa’, nispa.
32 Angelkunata kamachiq Jehova Diosmi nin:
‘Ñakariymi llapallan nacionkunaman chayachkan,+
kay allpa pachapa cantonmantaraqmi sasachakuy hamunqa.+
33 Chay punchawqa Jehova Diospa wañuchisqan runakunam kay allpa pachapa cantonmanta huknin cantonkama wischurayanqaku. Paykunamantaqa manam pipas waqanqachu, paykunataqa manataqmi pipas pampanqachu, animalpa wanun hinam pampapi kanqaku’, nispa.
34 ¡Michiqkuna, waqaychikyá, qaparkachaychikyá!
¡Aswan riqsisqa michiqkuna, pampapiyá chutaykachakuychik,
wañunaykichik punchawmi chayaramun, kayman-chayman chiqinaykichik punchawmi chayaramun,
achka qullqiwan rantisqa puyñu hinam wichinkichik!
35 Michiqkunaqa manam maymanpas ayqiyta atinkuchu,
ancha riqsisqa michiqkunaqa manam lluptinqakuchu.
36 ¡Uyariychik! Chayqa michiqkunapa qaparkachasqanmi,
ancha riqsisqa michiqkunapa waqasqanmi,
Jehova Diosmi pastonkuta chinkachichkan.
37 Hawka kananku sitiokunapas
Jehova Diospa piñakuyninraykum qalaypaq qiparun.
38 Payqa malta leon hinam maymi kananta saqiramun,+
Diospa espadanraykum
hinaspa paypa piñakuyninraykum
paykunapa allpanqa manchakuypaq rikurirun”, nispa.