Jeremias
29 Jerusalenmantam Diosmanta willakuq* Jeremias cartata apachirqa apasqa kaqkunamanta puchuq punta apaqkunaman, sacerdotekunaman, Diosmanta willakuqkunaman hinaspa llaqta runakunaman. Paykunataqa Nabucodonosormi Jerusalenmanta Babiloniaman apakurqa. 2 Jeremiasqa chay cartataqa qillqarqa Jerusalenmanta pusasqa kasqanku qipatam. Pusarurqakum kamachiq Jeconiasta+ mamantinta,+ soldadokunapa kamachiqninkunata, Judapiwan Jerusalenpi kamachiqpa yanapaqninkunata, quri-qullqiwan tukuy ima ruway yachaqkunata chaynataq herrerokunatapas*.+ 3 Jeremiasqa chay cartatam apachirqa Safanpa+ churin Elasawan hinaspa Hilkiaspa churin Guemariaswan, paykunataqa Judata kamachiq Sedequiasmi+ Babiloniata kamachiq Nabucodonosorman kacharqa. Chay apasqanku cartapim nisqa:
4 “Jerusalenmanta Babiloniaman apasqa kaqkunamanmi, Babiloniata kamachiqpa makinman churasqan kaqkunamanmi angelkunata kamachiq Jehova Dios nin, Israelpa Diosninmi nin: 5 ‘Wasikunata ruwakuspaykichikyá chaypi yachaychik*, huertakunata ruwakuspaykichikyá chaymanta mikuychik. 6 Casarakuspaykichikyá churi-wawayuq kaychik. Churi-wawaykichiktapas casarachiychik paykunapas churi-wawayuq kanankupaq, chaypiyá astawan miraychik. 7 Chay kasqaykichik llaqta allinlla kananpaqyá tukuyta ruwaychik, Jehova Diostayá chay llaqtapaq mañakuychik. Chay llaqta allinlla kaptinqa qamkunapas allinllam kankichik.+ 8 Angelkunata kamachiq Jehova Diosmi nin, Israelpa Diosninmi nin: “Amayá qamkunapa kasqaykichikpi willakuqkunapa nisqanpiqa nitaq qawaqkunapa nisqanpiqa hapipakuychikchu,+ amataqyá sueñoyninkutapas uyariychikchu. 9 Jehova Diosmi nin: ‘Paykunaqa sutiypim llullallata willasuchkankichik, paykunataqa manam ñuqachu kachamurqani’”’”, nispa.+
10 “Jehova Diosmi nin: ‘70 watamantam Babiloniamanta hurqumusqaykichik,+ nisqayman hinam kutichimusqaykichik’, nispa.+
11 Jehova Diosmi nin: ‘Ñuqaqa sumaqtam yachani qamkunapaq imam munasqaytaqa. Hawkayaypi kanaykichiktam munani, manam sasachakuypi kanaykichiktachu.+ Hamuq punchawkunapi allinña kanaykichiktam munani.+ 12 Qamkunam qayakamuwankichik, mañakamuwankichikmi hinaptinmi uyariykamusqaykichik’, nispa.+
13 ‘Maskawaspaykichikqa tariwankichikmi.+ Tukuy sunqumanta maskawasqaykichikraykum tariwankichik.+ 14 Qamkunaqa tariwankichikmi,+ ñuqa Jehova Diosmi chaynata nini. Apasqa kaqkunatam huñumusaq, chiqichisqay kaqkunatam llapallan nacionkunamanta huñumusaq,+ allpankumanmi kutichimusaq’, ñuqa Jehova Diosmi chaynata nini.+
15 Qamkunam ichaqa nirqankichik: ‘Jehova Diosqa Babiloniapim willakuqninkunata churaykamuwanchik’, nispa.
16 Davidpa+ trononpi tiyaq kamachiqtam, kay llaqtapi yachaq llapallan runakunatam chaynataq kay llaqtamanta mana apasqa kaqkunatam Jehova Dios nin: 17 ‘Angelkunata kamachiq ñuqa Jehova Diosmi nini: “Paykunamanqa espadatam kacharimusaq, muchuytam* kacharimusaq, unquytam kacharimusaq,+ mana mikunapaq ismu* higos hinam kanqaku”’, nispa.+
18 ‘Maypiña kaspapas espadawanmi wañunqaku,+ yarqaymantam kanqaku hinaspa unquywanmi kanqaku. Kay pachapi llapallan kamachiqkunam imam pasasqankuta qawaspa manchakunqaku,+ runakunam hanllarayaspa qawanqaku, ñakasqam kanqaku, asipayasqam* kanqaku,+ chiqichisqay lawkunapim nacionkunapa kamisqan kanqaku.+ 19 Paykunaqa manam uyarirqakuchu willakuqniykunapa nisqantaqa. Willakuqniykunataqa paykunamanmi achka kutita kacharqani’,+ ñuqa Jehova Diosmi chaynata nini.
Jehova Diosmi nin: ‘Qamkunam ichaqa mana kasukurqankichikchu’, nispa.+
20 Jerusalenmanta Babiloniaman apasqa kaqkuna, Jehova Diospa nisqantayá llapallaykichik uyariychik. 21 Colayapa churin Acabmantawan Maaseyapa churin Sedequiasmantam hinaspa sutinpi llullallata willakuqkunamantam angelkunata kamachiq Jehova Dios nin,+ Israelpa Diosninmi nin: ‘Paykunataqa Babiloniata kamachiq Nabucodonosorpa makinmanmi churasaq, paymi qawachkaptikichik paykunataqa wañuchinqa. 22 Judamanta Babiloniaman apasqa kaqkunaqa paykunapa sutintam ñakanankupaqña rimanqaku, paykunam ninqaku: “¡Jehova Diosqa Sedequiastawan Acabta imam ruwasqanman hinayá qamtapas ruwasunki, paykunataqa Babiloniata kamachiqmi kañaykurqa!”, nispa. 23 Paykunaqa Israelpim millakuypaq kaqkunata ruwarqaku,+ hukwanmi pierdekurqaku*, sutiypim llullallata rimarqaku, mana nisqay kaqkunatam rimarqaku,+ Jehova Diosmi nin:
“Ñuqam chaytaqa yachani, ñuqam chaytaqa uyarirqani”’”, nispa.+
24 “Melam llaqtayuq Semayatañataqmi+ ninki: 25 ‘Angelkunata kamachiq Jehova Diosmi nin, Israelpa Diosninmi nin: “Qamqa cartakunatam apachirqanki Jerusalenpi llapallan runakunaman, Maaseyapa churin sacerdote Sofoniasman+ hinaspa wakin sacerdotekunaman. Chay cartakunapim nirqanki: 26 ‘Jehova Diosmi qamtaqa sacerdote Jeoyadapa rantinpi sacerdote kanaykipaq churasurqanki, Jehova Diospa wasinta qawanaykipaqmi churasurqanki, pipas willakuspan muspaypi hina rimaptinqa uchkuyuq tablaman hinanaykipaqmi churasurqanki.+ 27 Hinachkaptinqa ¿imanasqataq mana imatapas nirqankichu qamkuna ukupi Anatot+ llaqtayuq willakuq Jeremiastaqa?+ 28 Payqa Babiloniamanpas kay willakuytam apachirqa: “¡Chaypiqa una-unaymi kankichik! Chaynaqa wasikunata ruwakuspaykichikyá chaypi yachaychik, huertakunata ruwakuspaykichikyá chaymanta mikuychik...”’”’”, nispa.+
29 Sacerdote Sofoniasmi+ Diosmanta willakuq Jeremias uyarichkaptin chay cartata leerqa. 30 Chaymanta qipallamanmi Jehova Diosqa Jeremiasta rimapayaspan nirqa: 31 “Babiloniapi kaqkunamanyá willachimuy: ‘Nehelam llaqtayuq Semayamantam Jehova Dios nin: “Mana kachamuchkaptiy qamkunaman llullakunata willasusqaykichikraykum hinaspa llullakunapi hapipakunaykichikta munasqanraykum+ 32 ñuqa Jehova Diosqa nini: ‘Nehelam llaqtayuq Semayatawan mirayninkunatam castigasaq, ayllunmantaqa manam pipas puchunqachu, payqa manam qawanqachu runaykunapaq allin kaqkuna ruwasqaytaqa, payqa ñuqa Jehova Diosta mana kasuwanankupaqmi runakunata umacharqa’”’, ñuqa Jehova Diosmi chaynata nini”, nispa.