Jeremias
11 Jehova Diosmi Jeremiasta rimapayarqa: 2 “¡Runallaykuna! ¡Kasukuychikyá kay contrato* ruwasqanchikpi nisqanchikta!
Juda runakunamanyá willamuy*, Jerusalenpi yachaqkunamanyá willamuy, 3 nimuyá: ‘Israelpa Jehova Diosninmi nin: “Kay contrato ruwasqanchikpi nisqanchikkunata mana kasukuq runaqa ñakasqam kanqa,+ 4 contratotaqa ruwarqaniku ñawpaq abueloykichikkunata Egipto allpamanta hurqumusqay punchawpim+ hinaspa fierrota chulluchinapaq hornomanta hurqumusqay punchawpim,+ chay punchawpim nirqani: ‘Contrato ruwasqaymanta nisqaykunatayá uyarikuychik, kamachisqaykunatayá llapallanta kasukuychik, hinaspaykichikqa runaykunam kankichik, ñuqañataqmi Diosnikichik kasaq,+ 5 ñuqaqa chaynapim ñawpaq abueloykichikkunaman qusqay allpata qusqaykichik, kunan qawasqaykichikman hinam tukuy imapa kanan allpata* qurqaykichik’”’”, nispa.+
Ñuqañataqmi nirqani: “Jehova Dioslláy, chaynayá kachun*”, nispa.
6 Jehova Diosñataqmi niwarqa: “Juda nacionpi kaq llaqtakunapiyá willakamuy, Jerusalenpiyá kay nisqaykunata lliwta willakamuy: ‘Contrato ruwasqayman hinayá ruwaychik. 7 Egipto allpamanta ñawpaq abueloykichikkunata hurqumusqay punchawmantam ñuqaqa kuti-kutirispa nirqani: “Nisqaykunata kasukuychik”, nispa.+ 8 Paykunam ichaqa mana uyarikurqakuchu, manam kaqpaqpas hapirqakuchu, kasukunankumantaqa llapallankum munasqankuta ruwarqaku.+ Contratopi nisqaykuta mana kasukusqankuraykum, chayman hina mana cumplisqankuraykum paykunamanqa sasachakuyta apamurqani’”, nispa.
9 Jehova Diosmi kaqmanta niwarqa: “Juda runakunawan Jerusalenpi yachaqkunam* hatarinankupaq rimanakurunku. 10 Qipaman kutiruspankum ñawpaq abuelonkupa ruwasqanta ruwachkanku, ñawpaq abuelonkuqa nisqaykunataqa manam kasukurqakuchu.+ Paykunaqa taytacha-mamachakunatam yupaycharqaku.+ Israelpa mirayninkunawan Judapa mirayninkunam ñawpaq abuelonkuwan contrato ruwasqayta yanqacharun.+ 11 Jehova Diosqa chayraykum nichkan: ‘Ñakariytam kacharimusaq,+ chaymantaqa manam lluptinkichikchu. Yanapaykunaypaq qayakamuwaptikichikpas manam uyarisqaykichikchu.+ 12 Mana uyariptiymi Juda runakunawan Jerusalen runakunaqa taytacha-mamachakunataña* qayakunqaku,+ chaywanpas chay taytacha-mamachakunaqa ñakariymantaqa manam libranqachu. 13 Juda runakuna, llaqtaykichikkunata hinañam taytacha-mamachakunata achkata ruwakurunkichik, altarkunatapas* millakuypaq taytacha-mamachaykichikpaqmi Jerusalenpi callekunata hinaña achkata ruwarunkichik, chay altarkunataqa Baal taytachapaqmi ruwarapunkichik’, nispa.+
14 Qamqa* amayá mañakamuwaychu kay runakunapaqqa. Paykunapaqqa amayá qayakamuwaychu, amayá mañakuwaychu,+ ñuqaqa manam uyarisaqchu ñakariypi kaspa qayakamuwaptinkuqa.
15 ¿Imaynanpitaq wasiypi kachkanku kuyasqay runaykunaqa?
¿Imaynanpitaq wasiypi* kachkanku llapallanku mana allinta ruwachkaspankuqa?
¿Yaqachu paykunaqa animalkunata nakaspanku* ñakariymanta librasunkiman?
¿Yaqachu chaywan kusisqa kanki?
16 Jehova Diosmi ñawpaqta sutichasurqanki ‘kallmasapa aceitunas sacha’ nispa,
‘suma-sumaq sacha’ nispa, ‘allin ruruq sacha’ nispa.
Qapariyllawanñam kañaykurqa,
hinaptinmi kallmankunata pakiparurqa.
17 Angelkunata kamachiq Jehova Diosmi nirun, plantasuqnikim+ nirun Israelpa mirayninkunawan Judapa mirayninkuna mana allinta ruwasqankurayku ñakariy chayamusunaykimanta, paykunaqa Baal taytachapaq kañapuspankum piñachiwarqa”, nispa.+
18 Jehova Dioslláy, qanmi yachanaypaq willawarqanki,
qanmi imam ruwasqankuta qawachiwarqanki.
19 Nakanankupaq apasqanku manso carnero hinam ñuqaqa karqani.
Manam yacharqanichu contraypi paykunapa kayna tantianakusqankutaqa:+
“Kay sachata kuchuspayá ruruntapas chinkachisun,
sutinta qunqanankupaqyá chinkachisun”, nispa.
20 Angelkunata kamachiq Jehova Diosmi ichaqa allin ruwayman hina juzgan,
payqa yachanmi ima piensasqanchiktaqa, yachanmi sunqunchikpi ima kasqantaqa.+
Dioslláy, qawaykachiwayá paykunata imam ruwasqaykita,
ñuqaqa manam iskayrayanichu allin ruwaq juez kasqaykimantaqa.
21 Wañuchiyta munasuqniki Anatot+ llaqtayuq runakunam nichkanku: “Amayá willakuychu Jehova Diospa sutinpiqa,+ manachayqa wañurachisqaykikum”, nispa. Paykunamantam Jehova Dios nin, 22 arí, angelkunata kamachiq Jehova Diosmi nin: “Paykunamanmi ñakariyta kacharisaq. Musukunatam wañuchinqaku.+ Churi-wawankupas yarqaymantam wañunqa.+ 23 Paykunamantaqa manam pipas puchunqachu, ñuqaqa imam ruwasqankuta qawasqay watapim Anatot+ llaqtayuq runakunaman ñakariyta kacharisaq”, nispa.