Jeremias
5 Jerusalen llaqtapiyá puriychik.
Muyuriqnikichiktayá qawaychik, sumaqtayá qawaychik.
Llaqtapa punkunkunapiyá maskaychik,
ichapas tariwaqchik pillatapas allin ruwaqta,+
Diosman sunqu kay munaqta,
hinaptinqa llaqtapi runakunatam pampachasaq.
2 “¡Jehova Diospa sutinpim juraniku!” nispankupas
paykunaqa yanqapaqmi juranmanku.+
3 Jehova Dioslláy, ¿manachu qamqa qampi hapipakuqkunata maskanki?+
Castigaptikipas paykunaqa manam kasukurqakuchu.
Paykunapa allpanta qalaypaqta ruwaruchkaptikipas manam kasukurqakuchu.+
Rumi sunqu* rikuriruspankum+ mana wanakurqakuchu.+
4 Ñuqañataqmi nikurqani: “Kay runakunaqa mana letra riqsiqchá.
Kay runakunaqa mana yachayniyuqchá, chaychá Jehova Diospa ñannintaqa mana riqsinkuchu,
Diosninkupa kamachikuynintapas manam yachankuchu.
5 Ancha riqsisqa runakunawan parlaqmi risaq,
paykunaqa Jehova Diospa ñanninkunataqa riqsichkankuch,
kamachikuyninkunatapas yachachkankuch.+
Paykunam ichaqa yugutapas pakirusqaku
hinaspa kuyundatapas tipirusqaku”, nispay.
6 Montepi leonpas chayraykum hapisunki,
chunniq chaki pampapi atuqpas chayraykum llikipasunki,
llaqtaykichikkunapa waqtanpipas chayraykum tigre* suyasunkichik.
Llaqtamanta lluqsiqkunaqa llikchipasqam kanku.
Paykunaqa llumpa-llumpaytam huchallikurunku,
huchankuqa mana yupay atinam.+
7 ¿Imaynamá chay ruwasqaykimantaqa pampachaykiman?
Churikikunapas saqiruwanmi,
yupaychasqanku kaqkunapa sutinpiñam jurankupas.+
Paykunataqa manam imamantapas usuchirqanichu,
chaywanpas paykunaqa hinallam hukwan pierdekurqaku*,
llapallankum chuchumika* warmipa wasinman rirqaku.
8 Yeguapa qipanpi puriq potromanmi rikchakunku,
huk runapa warminraykum wiqiqiqinku.+
9 Jehova Diosmi nin: “¿Manachu chaykunamantaqa castigayman?
¿Manachu kay naciontaqa imam ruwasqankuman hina castigayman?”, nispa.+
10 “Uvasninkutayá chaqumuychik,
ichaqa amayá qalaypaqtaqa.+
Ikllinkunatayá* kallmamuychik,
ikllinkunaqa manam Jehova Diospachu.
11 Israelpa mirayninkunaqa hinaspa Judapa mirayninkunaqa saqiruwanmi”,
Jehova Diosmi chaynata nin.+
12 “Jehova Diospaq piñakuruspam nichkanku:
‘Payqa manam imatapas ruwanqachu*.+
Manam ima sasachakuypas chayamuwasunchu,
manam wañuchinakuypas nitaq muchuypas* chayamuwasunchu’, nispa.+
13 Willakuqkunaqa* yanqakunallatam willakunku, manam allintachu,
nisqankupas* paykunapiqa manam kanchu.
¡Hina chayyá paykunamanpas chayachun!”.
14 Chayraykum angelkunata kamachiq Jehova Diosqa nichkan:
“Kay runakuna chaynata nisqankuraykum
rimasqaykunaqa nina hina simikipi kanqa,+
kay runakunañataqmi yanta hina kanqa,
paykunataqa ninam rupanqa”, nispa.+
15 Jehova Diosmi nin: “Israelpa mirayninkuna, karumantaraqmi qamkunawan peleananpaq nacionta pusamusaq”, nispa.+
“Chay nacionqa ñawpaqmantaraqmi kunankama kachkan.
Chay nacionqa ñawpaq nacionraqmi,
chay nacionpa rimaynintaqa qamkunaqa manam yachankichikchu,
ima nisqantapas manam yachankichikchu.+
16 Flechankupaq wayqankupas paykunapaqa pampakunankupaq uchku hinam,
paykunaqa llapallankum soldadokuna kanku.
17 Cosechakunatawan huñusqayki mikuykunatam tukunqaku.+
Qari churikikunatawan warmi churikikunatam wañuchinqaku.
Ovejaykikunatawan vacaykikunatam wañuchinqaku.
Uvasnikikunatawan higosnikikunatam chinkachinqaku.
Mana yaykuy atina llaqtapi runaykikunatapas espadawanmi wañuchinqaku, hapipakusqayki runakunatam wañuchinqaku”.
18 Jehova Diosmi nin: “Chaywanpas chay punchawkunapiqa manam qalaypaqchu chinkachisqaykichik.+ 19 ‘¿Imaynanpitaq kaytaqa ruwaruwanchik Jehova Diosninchikqa?’ nispa paykuna niptinkuqa kaynatam ninki: ‘Imaynam qamkunapas Diosta saqiruspaykichik taytacha-mamachakunataña llaqtaykichikpi yupaycharqankichik, chaynam qamkunapas mana riqsisqaykichik allpapi huklaw runakunapa serviqninña kankichik’”, nispa.+
20 Jacobpa mirayninkunamanyá willaychik,
Juda llaqtapiyá willakuychik:
21 “Yaw ruqru uma runakuna, mana yuyayniyuq runakuna,+
ñawiyuq kachkaspa mana rikukuqkuna,+
rinriyuq kachkaspa mana uyariqkuna.+
22 Jehova Diosmi nin: ‘¿Manachu manchakuwankichik?’, nispa.
‘¿Manachu ñawpaqniypiqa katkatatanaykichik?
Lamar quchapa patanpi aqutaqa ñuqam churarqani, churarqaniqa lamar qucha mana lluqsinanpaqmi,
kamachikuyta hinam chaytaqa churarqani, chaynapi chaymanta mana lluqsinanpaq.
Lamar quchaqa llumpayta laqyamuspanpas manam lluqsiyta atimunchu,
qaparispanpas manam lluqsimunchu.+
23 Kay runakunam ichaqa qalaypaq rumi sunqu kanku, qalaypaq mana kasukuqmi kanku,
saqiruwaspanmi munasqankupi purikuchkanku.+
24 Sunqunkupipas manam ninkuchu:
“Jehova Diosninchiktayá manchakusun,
tiempollanpi parachimuqtayá manchakusun,
puquypipas usyaypipas parachimuqtayá manchakusun,
cosechanapaq punchawkunata akllaqtayá manchakusun”, nispaqa.+
25 Pantasqaykichikkunam kaykuna kanantaqa harkarun,
huchaykichikraykum qamkunapaqqa allin kaqkunaqa mana kanchu.+
26 Runaykunawanmi mana allin runakuna kachkan.
Pichinkukunata hapiqkuna hinam pakakunku qunqayllamanta pawaykunankupaq.
Wañunankupaqmi tuqllata churanku.
Runakunatam hapinku.
27 Pichinkukunawan huntay-huntay jaula hinam
wasinkupas suwakusqankuwan huntay-huntay kachkan.+
Chaywanmi paykunaqa apuyarunku hinaspa atiyniyuq rikurirunku.
28 Puquruptinmi aycha qarankupas lluchkay-lluchkay kachkan,
mana allinllatam ruwanku.
Mana taytayuqkunamantapas manam nanachikunkuchu,+
kikillankum allin kayta munanku,
wakchakunapaqpas manam allin kaqtaqa ruwankuchu’”, nispa.+
29 Jehova Diosmi nin: “¿Manachu chaykunamantaqa castigayman?”, nispa.
“¿Manachu kay naciontaqa imam ruwawasqankuman hina castigayman?
30 Haykapipas mana qawasqanku manchakuypaq kaqmi llaqtapi karun:
31 Willakuqkunapas llullallatam willakunku,+
sacerdotekunapas munayninkuman hinam hukkunata ñakarichinku.
Runaykunaqa chaywanmi kusisqa kanku.+
¿Imataraq ruwankichik tukupay punchaw chayaramuptin?”