2 Cronicas
“Cronicas” nispaqa sutichanku imakuna pasasqanmanta ordenninpi willakusqanraykum.
1 Davidpa churin Salomontam Jehova Dios yanaparqa, hinaptinmi Salomonqa ancha riqsisqa hinaspa atiyniyuq rikurirurqa.+
2 Salomonmi huñuchimurqa 1.000 runakuna kamachiqkunata, 100 runakuna kamachiqkunata, juezkunata hinaspa Israel nacionpi llapallan kamachiqkunatawan llapallan runakunata. 3 Hinaspam paykunawan Gabaon muquman rirqa,+ chaypim karqa Jehova Diospa carpan. Chay carpataqa Moisesmi chunniqpi ruwachirqa. 4 Diospa baulninñataqmi Jerusalen llaqtapiña karqa. Baultaqa Davidmi Kiryat-jearim llaqtamanta+ aparachimurqa Jerusalenpi ruwachisqan carpaman.+ 5 Bezalelpa+ broncemanta ruwasqan altarñataqmi*+ Jehova Diospa carpanpa ñawpaqninpi churasqa karqa. Chaypa ñawpaqninpim Salomonwan Israel runakunaqa Diosta mañakuqku. Bezalelqa karqa Uriypa churinmi, Uriyñataqmi karqa Hurpa churin. 6 Diospa carpanpa ñawpaqninpi kaq chay altarpim+ Salomonqa 1.000 animalkunata Jehova Diospaq kañarqa.
7 Chay tutam sueñoyninpi rikuriykuspan Salomonta Dios nirqa: “Imapas munasqaykita mañakuway”, nispa.+ 8 Chaymi Salomonqa Diosta nirqa: “Imaña kaptinpas anchata kuyaspaykim taytay Davidtaqa yanaparqanki,+ paypa rantinpitaqmi kamachiq kanaypaqpas akllaykuwarqanki.+ 9 Ñutu allpa hina mana yupay atina runakunata kamachinaypaqmi akllaykuwarqanki.+ Chayraykuyá Jehova Dioslláy, taytay Davidman nisqaykikunaqa cumplikuchun.+ 10 ¿Pimá achkallaña runaykikunataqa kamachiyta atinman? Chayraykuyá yachaytawan yuyayta quykullaway+ runaykikunapa sasachakuyninta allichanaypaq”, nispa.+
11 Diosñataqmi Salomonta nirqa: “Runaykunata yanapanaykipaqmi tukuy sunqumanta mañakuwarqanki yachaytawan yuyayta. Qamqa manam mañakuwarqanki quri-qullqitachu, ancha riqsisqa kaytachu nitaq chiqnisuqnikikuna wañuchisqa kanantachu, nitaqmi unay wata kawsakuytachu.+ 12 Chaymi yachaytawan yuyayta qusqayki. Qusqaykitaqmi quri-qullqitapas, hinaspapas ancha riqsisqam kanki. Manam chayna kamachiqqa haykapipas karqachu, nitaqmi qipatapas kanqachu”, nispa.+
13 Chaymantam Salomonqa Gabaon muqupi Diospa carpanmanta Jerusalenman kutirqa.+ Hinaspam Israel runakunata kamachiyta qallaykurqa. 14 Salomonqa hinallam huñurqa carretakunatawan caballokunata*. Kapurqam 1.400 carretankunawan 12.000 caballonkuna.+ Chaykunam carretakuna waqaychana llaqtakunapiwan+ Jerusalenpi karqa Salomonpa hichpallanpi.+ 15 Kamachiq Salomonqa Jerusalen llaqtamanmi rumita hinaña quri-qullqita huñurachirqa.+ Cedro sachakunapas Sefela muqukunapi purun higos sachakuna hinañam kakurqa.+ 16 Salomonpaqa karqataqmi Egipto nacionmanta pusachimusqan caballonkunapas,+ runankunam rantimuqku achkanpi* hayka mañasqankuman hina.+ 17 Egiptomantam sapa carretata rantimuqku 600 qullqiwan*, sapa caballotañataqmi rantimuqku 150 qullqiwan. Paykunañataqmi Het runakunapa hinaspa Siria runakunapa kamachiqninkunaman rantikuqku*.