Filipenses
Kayqa Filipo llaqtapi iñiqkunaman cartam.
1 Jesucristota* serviq ñuqa Pablom, Timoteopiwan qillqamuykiku Filipos+ llaqtapi Jesucristopa qatiqnin Diospa llapallan runankunaman, qillqamunikutaqmi iñiqkunamanta nanachikuqkunamanpas* hinaspa iñiqkunapi punta apaqkunapa yanapaqninkunamanpas*:+
2 Qamkunapaqyá kachun taytanchik Diospa hinaspa señorninchik Jesucristopa ancha kuyakuynin* chaynataq hawkayayninpas.
3 Qamkunamanta yuyarispaymi Diosta agradecekuni 4 sapa kuti tukuy sunquymanta mañakuspay. Sapa kutim kusikuywan qamkunapaq ruegakuni,+ 5 chaytaqa ruwani qallariymantapacha kunankama sumaq willakuy willasqa kananpaq yanapakusqaykichikmantam. 6 Ñuqaqa manam iskayrayanichu allin kaqkunata ruwanaykichikpaq qallarichisuqnikichik Diosqa Jesucristopa+ juzganan punchawpi chay allin ruwayta lliwta tukunanmantaqa.+ 7 Llapallaykichikmanta chayna piensasqayqa allinpunim sunquypi kasqaykichikrayku. Qamkunaqa yanapawachkankichikmi presochasqa kaptiypas,+ yanapawachkankichiktaqmi sumaq willakuyta mana pipa harkasqan willakunapaq chaynataq autoridadkunapa leyninwan respetachinaypaqpas, chaynapim qamkunapas hinaspa ñuqapas Diospa ancha kuyakuyninwan* yanapachikunchik.+
8 Diosqa yachanmi llapallaykichikmanta llakikusqayta hinaspa Jesucristo hina tukuy sunqumanta kuyasqaytaqa. 9 Ñuqaqa hinallam mañakuchkani imam kaqta yachaspa+ hinaspa allin tantiaq+ kaspa astawan kuyakuq+ kanaykichikpaq, 10 chaynapi imakuna ruway aswan allin kasqanmanta yachanaykichikpaq+ hinaspa Cristopa* juzganan punchawkama mana faltayuq kanaykichikpaq chaynataq pitapas ama Diosmanta karunchanaykichikpaq*,+ 11 mañakuchkanitaqmi Jesucristo+ yanapasuptikichik allinkunata aswan-aswan ruwanaykichikpaqpas, chaynapi Dios hatunchasqa hinaspa alabasqa kananpaq.
12 Wawqi-panillaykuna, kayta yachanaykichiktam munani: Tukuy ima pasawasqanqa sumaq willakuy aswan willasqa kananpaqmi karqa. 13 Chaywanmi Roma nacionpi kamachiqta cuidaq soldadokuna hinaspa hukkuna yacharunku Cristorayku+ preso kasqayta.+ 14 Chaymantapas, señorta serviq yaqa llapallan wawqi-panikunam preso kasqayta qawaspanku kallpanchasqa tarikurqaku, aswan kallpanchasqataqmi kachkanku Diospa palabranmanta mana manchakuspa willakunankupaqpas.
15 Chiqaptapunim wakinkuqa envidiakuwaspa hinaspa contrapi apawayta munaspa Cristomanta willakuchkanku, wakinkum ichaqa allin sunquwan willakuchkanku. 16 Allin sunquwan Cristomanta willakuqkunaqa kuyakuq kasqankuraykum willakuchkanku, paykunaqa yachankum sumaq willakuyta autoridadkunapa qayllanpi valechinayta.+ 17 Chay envidiakuqkunam ichaqa willakuchkanku atipanakuyta munaspanku, manam allin sunquwanchu, paykunaqa munachkanku presochasqa kasqaypi sasachawaytam. 18 Ichaqa manam imananchu. Chay willakuqkuna allin sunquwan utaq mana allin sunquwan willakuptinkupas runakunaqa hinallam Cristomanta willakuyta uyarichkanku. Chaymi ñuqaqa kusikuni hinaspapas astawanraqmi kusikusaq, 19 ñuqaqa yachanim Diosta mañapuwasqaykichikwan hinaspa Jesucristopa atiyninwan salvakunayta,+ Jesucristomanqa Diosqa atiynintam qurqa.+ 20 Ñuqaqa suyachkanim hinaspapas manam iskayrayanichu imapipas mana pinqaypi kanaymantaqa, suyachkaniqa mana manchakuspa rimaq kasqaywan Cristota hatunchaytam, chaytaqa ruwasaq ñawpaqpi hatunchasqayman hinam. Kawsaspayqa ñuqaqa hatunchasaqmi*, wañukuptiypas Jesucristoqa hinallam hatunchasqa kanqa.+
21 Kawsaspayqa kawsani Cristoraykum,+ wañuspañataqmi wañusaq aswan allinniypaqraq.+ 22 Sichu kay pachapiraq* kawsasaq hinaspayqa llamkaspaymi astawanraq ruwasaq*, chaywanpas imam akllakunaytaqa manam willakunichu. 23 Chay iskayninmantaqa manam mayqintapas akllakuyta atinichu, ñuqaqa munani librasqa kaspay Cristowan kuska kaytam,+ chaymi aswan allinqa.+ 24 Chaywanpas aswan allinqa qamkunarayku kay pachapiraq kayniymi. 25 Chaykunamanta mana iskayrayaspaymi yachani kay pachapiraq kanaymanta hinaspa llapallaykichikwanraq kanaymanta, chayqa kanqa ñawparinaykichikpaq hinaspa Diospi iñisqaykichikmanta kusikunaykichikpaqmi, 26 chaynapi Jesucristopa qatiqnin kasqaykichikrayku qamkunawan kaqmanta tupaykuptiy ancha kusisqa ñuqarayku kanaykichikpaq.
27 Cristomanta sumaq willakuyman hinayá kawsakuychik,+ chaynapi qamkunaman hamuspaypas utaq mana hamuspaypas qamkunamanta allin willakuykunata uyarinaypaq, uyarisaqchá sumaq willakuyta chiqap kasqanpaq hapispaykichik huk sunqulla llamkaspa allin takyasqaykichikmanta, huk umalla kasqaykichikmanta hinaspa huk runa hinalla+ kasqaykichikmanta, 28 amayá contraykichikpi kaqkunataqa manchakuychikchu. Tukuy chaykunam qawachin paykuna chinkachisqa kanankuta,+ qamkunañataq salvasqa kanaykichikta,+ chayqa Diosmantam hamun. 29 Qamkunaqa manam Cristopi iñinallaykichikpaqchu yanapasqaqa karqankichik, aswanqa payrayku ñakarinaykichikpaqwanmi.+ 30 Qamkunaqa ñuqapa sasachakusqay kaqkunallawanmi sasachakuypi kachkankichik,+ yachasqaykichikpi hinapas ñuqaqa hinallam chayna sasachakuykunapi kachkani.