1 Tesalonicenses
Kayqa Tesalonica llaqtapi iñiqkunaman punta kaq cartam.
1 Ñuqa Pablom, Silvanowan*+ hinaspa Timoteowan+ Tesalonica llaqtapi huñunakuq iñiqkunaman qillqamuykiku, qamkunaqa Dios taytawan hinaspa señor Jesucristowanmi huklla kachkankichik:
Qamkunapaqyá kachun hawkayaypas chaynataq Diospa ancha kuyakuyninpas*.
2 Diosta mañakuspaykum llapallaykichikmanta tukuy tiempo agradecekuniku,+ 3 Dios taytanchikqa yachanmi ñuqaykuqa iñisqaykichikman hina chaynataq kuyakuq kasqaykichikman hina llamkasqaykichiktaqa mana qunqasqaykuta, manataqmi qunqanikuchu Jesucristorayku allin kaqkunata chaskinaykichikta yachaspa tukuy ima aguantasqaykichiktapas.+ 4 Diospa kuyasqan wawqi-panillaykuna, ñuqaykuqa yachanikum Diospa akllasqan kasqaykichikta. 5 Qamkunaqa sumaq willakuy willasqaykutaqa uyarirqankichik manam rimasqallaykuwanchu, aswanqa Diospa atiyninpa* yanapakuyninwanmi, ñuqaykuqa manapunim iskayrayarqanikuchu qamkunaman willasqayku chiqap kasqanmantaqa, chaymantapas willasqaykuqa anchatam yanapasurqankichik. Qamkunaqa yachankichikmi allinnikichikpaq imayna runaña kasqaykutapas. 6 Qamkunaqa ñuqaykuta hinaspa señorninchiktam+ qatipakuchkankichik,+ qamkunaqa Diospa atiyninwanmi* kusikuywan Diospa palabranta chaskikurqankichik llumpay sasachakuykunaña kachkaptinpas,+ 7 chaynapim qamkunaqa Macedonia lawpi hinaspa Acaya lawpi llapallan iñiqkunapa qatipakunanpaq hina karqankichik.
8 Qamkunaraykum Jehova* Diospa palabranmanta enteron Macedonia lawpi hinaspa Acaya lawpi uyarichkanku. Chaymantapas Diospi iñisqaykichikmantam tukuy lawpi yacharunku,+ chaymi ñuqaykuqa manaña imatapas ninaykuñachu. 9 Paykunam willakuchkanku qamkunaman ñawpaqpi chayamusqaykumanta hinaspa taytacha-mamachakunata qipancharuspa+ Diosman kutirikuspaykichik paytaña* sirviente hina servisqaykichikmanta, 10 paykunaqa willakuchkankutaqmi Diospa churin hanaq pachamanta hamunanta suyasqaykichikmantapas,+ paytam Diosqa wañusqakunapa kasqanmanta kawsarichirqa, payqa Diospa chayamunan piñakuyninmanta librawaqninchik Jesusmi.+