1 Corintios
5 Uyarirunim qamkunawan huchapakuq*+ runa kasqanta, chayna pinqaypaq huchapakuyqa manam kanchu Diospi mana iñiq* runakunapipas, hukkaqnikichikmi taytanpa warmillanwan kakuchkan.+ 2 ¿Chaykuna kachkaptinchu qamkunaqa alabakuchkankichikraq? ¿Manachu llakisqa kawaqchik?+ ¿Manachu chayta ruwaq runaqa qamkuna ukumanta qarqusqa kanan?+ 3 Ñuqaqa qamkunawan kuska mana kaspaypas sunquypim* qamkunawan kuska kachkani, hinaspaymi chay huchapakuq runataqa qamkunawan kachkaymanpas hina juzgaruniña. 4 Señorninchik Jesuspa sutinpi huñunakuptikichik hinaspa ñuqapas señorpa atiyninwan sunquypi qamkunawan kuska kaptiymi 5 qamkunaqa chay runata satanasman+ entreganaykichik, chaynapi aychapa munasqan ruway chinkachisqa kananpaq, hinaptin señorninchikpa punchawninpi iñiqkunapa imayna piensasqanku allinlla kananpaq.+
6 Manam allinchu alabakusqaykichikqa, ¿manachu yachankichik aslla levadurapas tanta ruwanapaq llapallan masata puquchisqanta?+ 7 Chay levadurayuq ñawpaq kaq masata wischuychik, chaynapi pitusqa musuq masa kanaykichikpaq, chaynaqa kankichik mana levadurayuq kaspaykichikmi. Chiqaptapuniqa pascuapi+ malta carneronchik Cristoqa* ñam wañuchisqaña.+ 8 Chayraykuyá pascua punchawman qatiq yuyarina punchawkunataqa ama yuyarisunchu+ ñawpaq levadurawanqa, amataqyá ruwasunchu hucha ruwachiq hinaspa mana allin ruwachiq levadurawanqa, aswanqa mana levadurawan ruwasqa tantatayá mikusun, chayqa chuya sunqu kaymi hinaspa chiqap kaymi.
9 Cartaypim qillqamurqaykichik huchapakuqkunawan amaña hukllawakunaykichikpaq*. 10 Kaywanqa nichkaykichik manam kay pachapi huchapakuq runakunawan hinaspa imatapas llumpayta munapayaq runakunawan mana hukllawakunaykichiktachu,+ nitaq hukkunapa imanpas qichuqkunawan chaynataq taytacha-mamacha yupaychaqkunawan mana hukllawakunaykichiktachu. Chayna kaptinqa kay pachapi runakunawanqa manañach kuskachu kawaqchik.+ 11 Kunanqa qillqamuchkaykichik “iñiqmasikim kani” nichkaspa huchapakuqkunawan amapuni hukllawakunaykichikpaqmi,+ amayá hukllawakuychikchu “iñiqmasikim kani” nichkaspa imatapas llumpayta munapayaqkunawanqa,+ taytacha-mamacha yupaychaqkunawanqa, runamasinta kamiqkunawanqa*, sinkakuqkunawanqa+ nitaq hukkunapa imanpas qichuqkunawanqa,+ chayna runakunawanqa amayá mikuyllapas-mikuychikchu. 12 Ñuqaqa manam hawapi runakunata juzganaypaqchu kachkani. ¿Manachu iñiqkunataqa qamkuna juzganaykichik? 13 ¿Manachu hawapi kaq runakunataqa Dios juzganan?+ “Chay mana allin runatayá qamkuna ukumanta qarquychik”.+