2 Cronicas
28 Acazqa+ 20 watanpim kamachiyta qallaykurqa. Jerusalen llaqtamantam 16 wata kamachirqa. Payqa manam ñawpaq abuelon David hinachu Jehova Diospa munasqanman hina allin kaqkunata ruwarqa.+ 2 Aswanqa Israel nacionta kamachiqkuna hinam mana allinkunata ruwarqa.+ Hinaspapas fierromantam ruwarqa Baal taytachakunata.+ 3 Acazqa Hinon wayqupim* qusnichirqa, hinaspam churinkunatapas kañarqa,+ chaytaqa ruwarqa Israel runakunapa qayllanmanta Jehova Diospa qarqusqan runakuna hinam.+ 4 Chaymantapas yupaychana patakunapi,+ kallmasapa sachakunapa sikinpi+ hinaspa muqukunapim kañaspan qusnichiq.
5 Chaymi Jehova Diosqa Siria nacionta kamachiqpa makinman+ Juda runakunata churaykurqa, hinaptinmi presocharuspa achka runakunata Damasco llaqtaman pusakurqaku.+ Diosqa churaykurqataqmi Israel nacionta kamachiq Pekapa makinmanpas, chaymi achkata wañurachirqaku. 6 Juda runakunaqa ñawpaq abuelonkupa yupaychasqan Jehova Diostam qipancharurqaku,+ chaymi Remaliaspa churin Peka+ huk punchawllapi 120.000 runakunata wañurachirqa. 7 Chaymantapas, Efrain ayllumanta Zicri sutiyuq soldadom kamachiqpa churin Maaseyata wañurachirqa, wañurachirqataqmi kamachiqpa wasinmanta nanachikuq Azrikamtapas chaynataq kamachiypi yanapaqnin Elcanatapas. 8 Israel runakunaqa Samaria llaqtamanmi pusakurqaku 200.000 Juda runakunata warmintinta hinaspa churi-wawantinta. Apakurqakutaqmi tukuy imankutapas.+
9 Samaria llaqtaman chayaykuchkaptinkum Jehova Diosmanta willakuq* Oded taripaykuspan paykunata nirqa: “Jehova Diosqa Juda runakunawan piñasqa kasqanraykum makikichikman churaykurqa,+ hinaptinmi qamkunaqa achka-achkata wañurachirqankichik. 10 ¿Manachu qamkunapas Jehova Diospaq huchallikurunkichik? Chaywanpas munachkankichikmi Jerusalen llaqtapi runakunawan Juda nacionpi kaq wakin llaqtakunapi runakuna serviqnikichik kananta.+ 11 Uyariwaychikyá, Jehova Diosmi qamkunawan llumpay piñasqa kachkan. Chaynaqa, preso pusamusqaykichik aylluykichikkunatayá kutichiychik”, nispa.
12 Chaynata niptinmi Efrain ayllupi wakin kamachiqkunaqa peleasqankumanta kutimuq soldadokunata sayarachirqaku. Chay kamachiqkunam karqa Jeoananpa churin Azarias, Mesilemotpa churin Berekias, Salumpa churin Jeizkias hinaspa Hadlaipa churin Amasa. 13 Paykunam nirqaku: “Chay presokunataqa ama kaymanqa pusamuychikchu, huchayuq kasqanchikmantapas aswan huchayuqraqmi Jehova Diospaqqa rikurirusun. Diosqa ñuqanchikpaqmi llumpay piñasqa kachkan”, nispa. 14 Hinaptinmi soldadokunaqa pusamusqanku runakunatawan tukuy ima apakamusqankuta+ qurqaku kamachiypi yanapakuqkunaman hinaspa huñunasqa runakunaman. 15 Hinaptinmi wakin akllasqa runakuna soldadokunapa apakamusqanku pachakunawan mana pachayuq presokunata pachachirqaku hinaspa usutachirqaku. Quykurqakutaqmi mikuytapas, yakutapas chaynataq hampikunankupaq aceitetapas. Mana kallpayuq kaqkunatañataqmi asnoman sillaykachispanku palmerakunapa kanan Jerico llaqtaman pusarqaku, chaymantam Samaria llaqtaman kutikamurqaku.
16 Chay punchawkunapim kamachiq Acazqa Asiria nacionpi kamachiqkunata yanapananpaq mañakurqa.+ 17 Edom runakunapas yaykuruspam Juda runakunata presocharuspa pusakurqaku. 18 Filistea runakunapas+ munaychakururqakum Juda nacionpi Sefela muqukunapiwan+ Negueb qichwapi llaqtakunata. Munaychakururqakum Bet-semes llaqtata,+ Ayalon llaqtata,+ Guederot llaqtata. Munaychakururqakutaqmi Soco llaqtatapas, Timnat llaqtatapas,+ Guimzo llaqtatapas sapakama llaqtachantinkunata, hinaspam chaypi yacharqaku*. 19 Jehova Diosmi Juda runakunata pinqayman churarurqa Israel runakunata kamachiq Acazpa huchanrayku. Acazmi munasqankuman hina kawsanankupaq Juda runakunata saqirqa, chaymi Jehova Diosta mana kasukuspanku mana allinllataña ruwarqaku.
20 Asiria nacionpi kamachiq Tilgat-pilnesermi+ Acazta yanapananmantaqa ñakarichirqa.+ 21 Acazqa Jehova Diospa wasinmantam, kikinpa wasinmantam+ hinaspa kamachiypi yanapaqkunapa wasinmantam quri-qullqita hurquruspan Asiria nacionta kamachiqman quykurqa. Chaywanpas manam yanaparqachu. 22 Sasachakuypi kachkaspanpas kamachiq Acazqa Jehova Diospa chiqnisqan kaqkunatam astawan ruwarqa. 23 Payqa munaychakuqnin+ Damasco llaqtapa taytachankunata yupaychaspanmi+ nirqa: “Siria nacionta kamachiqkunapa taytachankunam yanapachkan, ñuqapas animalkunatayá kañapusaq yanapawananpaq”, nispa.+ Ichaqa yanapasqa kanankumantaqa Acazwan Israel runakunaqa sasachakuypim karqaku. 24 Acazqa Diospa wasinpi serviciokunata huñuruspanmi ñutuparurqa.+ Jehova Diospa wasinpa punkunkunatapas wichqarurqam.+ Hinaspapas Jerusalen llaqtapim tukuy hinastinpi altarkunata ruwakururqa. 25 Chaymantapas, Acazqa Juda nacionpa llapallan llaqtankunapim yupaychana patakunata ruwarurqa, chaynapi taytachakunapaq kañapuspan qusnichinanpaq.+ Chayta ruwaspanmi ñawpaq abuelonkunapa yupaychasqan Jehova Diosta piñachirqa.
26 Acazpa imayna kawsakusqanmantaqa hinaspa imakunata ruwasqanmantaqa Juda nacionta chaynataq Israel nacionta kamachiqkunamanta willakuq libropim qillqasqa kachkan.+ 27 Acaz wañukuptinmi pamparurqaku Jerusalen llaqtapi, ichaqa manam Israel runakunata kamachiqkunapa pampakusqanpichu.+ Hinaptinmi churin Ezequiasña kamachirqa.