2 Corintios

13 Kaywanqa kimsa kutitañam qamkunaman hamuchkani. “Iskay utaq kimsa testigokunapa rimasqanwanmi ima sasachakuypas allichasqa kanqa”.+ 2 Qamkunamanta kunan karupi kaptiypas, iskay kutipi hamuspay qamkunawan kachkaymanpas hinayá rimasqaykunata uyariykuwaychik. Huchallikuruqkunatawan wakiqnikichiktam kunanmanta nikichik: Kaqmanta hamuspayqa mana allin ruwaqkunataqa manam harkakusaqchu corregisqa kanankumantaqa. 3 Chayta ruwaspaymi qawachisaq rimachiwaqniyqa Cristo* kasqanta, qamkunapiqa Cristoqa kachkan manam pisi kallpayuqchu, aswanqa atiyniyuqmi. 4 Mana ima ruwaytapas atiq runa hina qirupi* warkusqa kaspanpas payqa Diospa atiyninwanmi kawsachkan.+ Chiqaptapunim ñuqaykupas pisi kallpayuq kachkaniku, imaynam paypas ñawpaqta pisi kallpayuq kasqanman hina, chaywanpas Diospa atiynin qamkunapi kasqanraykum+ paywan kuska kawsasaqku.+

5 Hinallayá qawakuychik iñiynikichikpi allin utaq mana allin kasqaykichikta yachanaykichikpaq. Hinallataqyá qawakuychik imayna runa kasqaykichiktapas.+ Icha, ¿manachu yachankichik qamkunawan Jesucristo huklla kasqanta? Diospa mana chaskisqan kaspallachá hukllaqa mana kawaqchikchu. 6 Ñuqaykuqa chiqaptapunim munaniku Diospa chaskisqan kasqaykumanta yachanaykichikta.

7 Ñuqaykuqa Diostam mañakuchkaniku imapas mana allin kaqkunata mana ruwanaykichikpaq, chaytaqa ruwachkaniku manam Diospa chaskisqan runakunata hina hukkuna qawawanankupaqchu, aswanqa qamkuna allin kaqta ruwanaykichikpaqmi Diospa mana chaskisqanta hina hukkuna qawawaptinkupas. 8 Chiqap kaqpa contranpiqa manam imatapas ruwaymankuchu, aswanqa chiqap kaqpa allinninpaq kaqkunallatam. 9 Ñuqaykuqa mana kallpayuq kaspaykum kusikuniku, kusikunikutaqmi qamkuna kallpayuq kaptikichikpas. Chaymantapas Diostam mañakuchkaniku imayna piensasqaykichikta hinalla musuqyachinaykichikpaq*. 10 Manaraq qamkunaman hamuspaymi kaykunata qillqamuchkaykichik, chaynapi chayamuspay señorninchikpa quwasqan atiywan qamkunata ama qaqchaparunaypaq,+ señorqa kamachiwarqa qamkunata kallpanchanaypaqmi, manam hukmanyachinaypaqchu.

11 Chaynaqa wawqi-panillaykuna, hinallayá kusikuychik, piensasqaykichiktapas hinalla musuqyachiychik*, kallpanchanakuychik,+ hukllata piensaychik+ hinaspa hawkalla kawsakuychik,+ chayna kaptikichikqa kuyakuq hinaspa hawkayay qukuq Diosmi+ qamkunawan kanqa. 12 Llapaykichikyá wawqi-panintin hina muchaykanakuspa rimaykanakuychik. 13 Diospa llapallan runankunam saludamusunkichik.

14 Chaynaqa, llapallaykichikwanyá kachun señor Jesucristopa ancha kuyakuynin* hinaspa Diospa kuyakuynin, llapallaykichikwantaqyá kachun llapallanchikpa chaskisqanchik Diospa atiyninpa* yanapakuyninpas.