Jeremias
40 Jehova Diosmi Jeremiasta rimapayarqa soldadokunapa kamachiqnin Nebuzaradan+ Rama+ llaqtamanta kachaykusqan qipaman. Chaymanqa pusarqaku makinta wataruspankum, chaymantapas Jeremiasqa Babiloniamanmi pusasqa karqa Jerusalen runakunawan hinaspa Juda runakunawan kuska. 2 Hinaptinmi Nebuzaradanqa Jeremiasta sapaqman pusaruspan nirqa: “Jehova Diosnikim kay llaqtapi ñakariy kananmanta nirqaña. 3 Nisqanman hinam Jehova Diosqa ñakariyta kachaykamun. Qamkunaqa Jehova Diospa contranpim huchallikurqankichik. Nisqankunataqa manam kasukurqankichikchu, chayraykum tukuy kaykunaqa pasasuchkankichik.+ 4 Kunanmi makikipi cadenaykikunata paskasqayki. Babiloniaman riyta munaptikiqa hakuyá. Wakpiqa ñuqam yanapasqayki, Babiloniaman ñuqawan mana riyta munaspaqa qipakuwaqmi. Kay nacionqa makikipim kachkan, maypipas munasqaykipim yachakamuwaq*”, nispa.+
5 Nebuzaradanqa Jeremiastam nirqa: “Aicampa+ churin Guedaliaspa+ kasqanmanyá kutiy. Aicamqa Safanpa+ churinmi. Babiloniata kamachiqmi Guedaliastaqa Juda allpapi llaqtachakunata kamachinanpaq churaykun. Paywanpas yachakamuwaqmi utaq maypipas munasqaykipim yachakamuwaq”, nispa.
Chaynata niptinqa Jeremiasqa manaraqmi ripukurqachu, chaymantam Nebuzaradanqa imachakunatapas quykuspan aviaykurqa. 6 Chaymi Jeremiasqa Mizpapi+ kaq Aicampa churin Guedaliaspaman pasakurqa. Paywanmi chay nacionpi puchuq runakunawan kuska yacharqa.
7 Tiempopa risqanman hinam soldadokunapa kamachiqninkunaqa runankunapiwan chakrapi kachkaspanku yacharurqaku Aicampa churin Guedaliasta chay nacionpi kamachiq kananpaq Babiloniata kamachiq churarusqanmanta. Guedaliasqa nanachikurqataqmi Babiloniaman mana pusasqa wakcha qarikunamantapas, warmikunamantapas chaynataq warmachakunamantapas.+ 8 Chaymi Mizpa+ llaqtapi yachaq Guedaliasta qawaq rirqaku, rirqakuqa: Netaniaspa churin Ismael,+ Careapa churin Joananwan+ Jonatan, Tanumetpa churin Seraya, Netofa llaqtayuq Efaipa churinkuna hinaspa Maacat llaqtayuq runapa churin Jezanias.+ Paykunawantaqmi rirqa runankupas. 9 Aicampa churin Guedaliasmi paykunatawan runankunata nirqa: “Amayá manchakuychikchu Caldea runakunapa makinpi kaytaqa. Hina kay nacionpi yachaspaykichikyá Nabucodonosorpaq llamkaychik, hinaspaqa allinmi kankichik.+ 10 Ñuqaqa hina kay Mizpa llaqtapim yachasaq, Caldea runakuna hamuptin qamkunarayku rimarinaypaq. Qamkunam ichaqa vinotawan aceiteta ruwankichik hinaspa usyay tiempopi ruruq frutakunata huñunkichik. Kaykunata imamanpas huñuspaykichikmi yachasqaykichik llaqtallapi yachakunkichik”, nispa.+
11 Judapi qipaq runakunata kamachinanpaq Aicampa churin Guedaliasta Babiloniata kamachiq churarusqantaqa yacharurqataqmi Moabpi, Ammonpi hinaspa Edompi yachaq judiokunapas chaynataq wakin llaqtapi yachaq runakunapas. Aicamqa karqa Safanpa churinmi. 12 Chaymantam judiokunaqa chiqisqa kasqankumanta kutimuyta qallaykurqaku, kutimurqakuqa Juda allpapi Mizpa llaqtapi Guedaliaspa kasqanmanmi, hinaspam achkallaña vinota ruwarqaku chaynataq usyaypi frutakunatapas achkallataña huñurqaku.
13 Careapa churin Joananwan chakrapi kaq soldadokunapa kamachiqninkunam Mizpapi yachaq Guedaliasta qawaq hamurqaku. 14 Paykunam Guedaliasta nirqaku: “¿Manachu yachanki Ammon runakunapa kamachiqnin+ Baalisqa Netaniaspa churin Ismaelta wañuchisunaykipaq kachamusqanta?”, nispa.+ Aicampa churin Guedaliasmi ichaqa mana kaqpaqpas hapirqachu.
15 Hinaptinmi Careapa churin Joananqa Mizpapi yachaq Guedaliasta mana pipa uyarisqallanta nirqa: “Netaniaspa churin Ismaelta wañurachimusaq, manam pipas yachanqachu. ¿Imaynanpimá payqa wañuchisunkiman? Amayá saqisunchu qampa kasqaykiman huñunakamuq Juda runakuna chiqinantaqa, amayá saqisunchu puchuq Juda runakuna chinkanantaqa”, nispa. 16 Aicampa churin Guedaliasmi+ ichaqa Careapa churin Joananta nirqa: “Amayá wañuchimuychu, Ismaelmanta nisqaykikunaqa yanqam”, nispa.