Josuey
2 Chaymantam Nunpa churin Josueyqa iskay runakunata kamachirqa mana pipa yachasqallanta watiqaq rinankupaq. Sitinmanta+ kachaspanmi paykunata nirqa: “Canaan allpata qawamuqyá riruychik, astawanraqyá Jerico llaqtataqa qawamuychik”, nispa. Hinaptinmi paykunaqa rispanku Rahab sutiyuq warmipa wasinman chayarurqaku, hinaspam chaypi samapakurqaku. Rahabqa karqa chuchumika* warmim.+ 2 Runakunañataqmi Jerico llaqtata kamachiqman willaykurqaku: “Israelpa mirayninkunam allpanchikta qawaq hamurusqaku”, nispa. 3 Chaymi Jerico llaqtata kamachiqñataq chayta uyariruspan runankunata kamachirqa Rahabta nimunankupaq: “Kay wasikiman hamuq runakunatayá hurqumuy, chay runakunaqa lliw allpanchikta qawaqmi hamurunku”, nispa.
4 Rahabmi ichaqa chay iskay runakunata pakarurqa. Hinaspam maskaqkunata nirqa: “Arí, runakunaqa hamurqam, ichaqa manam yacharqanichu maymanta kasqankutaqa. 5 Paykunaqa tutaykuqtam llaqtapa punkunta manaraq wichqachkaptinku pasakurqaku. Maymanchá pasakunkupas. Kunallan qatispaykichikqa hayparunkichikmi”, nispa. 6 Ichaqa wasin hawamanmi Rahabqa qispirachirqa, hinaspam pakarurqa munturayaq linazapa tullun ukupi. 7 Chaynapim maskaq runakunaqa Jordan mayuta chimpananku lawkunaman maskaq rirqaku,+ paykuna lluqsiruptillankum llaqtapa punkunta wichqarurqaku.
8 Rahabñataqmi wasinpi kaq watiqaqkuna manaraq puñuchkaptinku paykunapa kasqanman qispirurqa, 9 hinaspam nirqa: “Ñuqaqa yachanim Jehova Dios kay allpata qusunaykichikta,+ ñuqaykuqa hamusqaykichikraykum manchakuyllawanña kachkaniku.+ Kaypi runakunaqa llapallaykum manchakuywan ima ruwaytapas manaña atinikuchu.+ 10 Ñuqaykuqa uyarirqanikum Egipto nacionmanta lluqsimuptikichik Puka lamar quchata Jehova Dios chakirachispan pusamususqaykichikta.+ Uyarirqanikutaqmi Amorreo runakunapa kamachiqninku Seonta+ hinaspa Ogta+ wañuchisqaykichiktapas, paykunaqa Jordan mayupa inti qispimunan lawpim yacharqaku*. 11 Chaykunata uyariruspaykum llumpay hukmanyasqa kachkaniku, hinaspam qamkunata manchakuykiku. Qamkunapa Jehova Diosnikichikqa hanaq pachapipas kay pachapipas Diosmi.+ 12 Kunanyá Jehova Diospa qayllanpi niykullawaychik, qamkunata kuyasqayman* hina ñuqatawan aylluyta imaña kaptinpas kuyawanaykichikpaq. Hinaspayá chayna kananmanta mana iskayrayanaypaq imallatapas niykullawaychik. 13 Amamá wañuchinkichikchu tayta-mamaytaqa, turi-ñañaykunataqa nitaq paykunapa wasinpi kaqkunatapas. Wañuymantamá harkaykullawankiku”, nispa.+
14 Hinaptinmi chay watiqaqkunaqa nirqaku: “Arí, chaynatam ruwasaqku, manachayqa wañuchisqamá kasaqku. Kayman hamusqaykumanta pimanpas mana willakuptikiqa Jehova Dios kay allpata quwaptinkum imaña kaptinpas hinalla kuyasqaykiku, hinaspam niwasqaykikuman hina ruwasaqku”, nispa. 15 Chaymantam Rahabqa llaqtapa murallanman tupaqpi yachasqanrayku wasinpa ventananta waskawan paykunata uraykachirqa.+ 16 Hinaspam watiqaqkunata nirqa: “Urqukunapa kasqanman rispayá kimsa punchaw chaypi pakakamuychik maskasuqnikichik runakuna mana tarisunaykichikpaq. Maskasuqnikichik kutiramuptinkuñam maymi rinaykichikman pasakunkichik”, nispa.
17 Chay watiqaqkunañataqmi nirqaku: “Kay rimasqanchikman hinam ruwasaqku,+ 18 ichaqa kay allpaman yaykumuptiykum kay uraykachiwanaykiku puka waskata ventanaykipi warkunayki. Kay wasiki ukupim tayta-mamaykiwan, turi-ñañaykikunawan hinaspa paykunapa wasinpi kaqkunawan huñunakunayki.+ 19 Ichaqa pipas kay wasikipa punkunmanta lluqsiruspanqa kikinpa huchanraykum wañunqa, chayqa manañam huchaykuñachu kanqa. Wasiki ukupi kachkaspa wañuruptinmi ichaqa ñuqayku huchayuq kasaqku. 20 Sichu hamusqaykumanta pimanpas willakuruptikiqa+ manañam rimasqanchikman hinañachu kanqa”, nispa. 21 Chaymi Rahabqa nirqa: “Nisqaykichikman hinayá kachun”, nispa.
Hinaspam aviaruptin pasakurqaku. Chaymantam Rahabqa puka waskata ventananpi warkururqa. 22 Chay watiqaq runakunañataqmi urqukunapa kasqanman pasakurqaku, hinaspam chaypi kimsa punchaw karqaku maskaqninku runakuna llaqtaman kutiykunankukama. Chay maskaqninku runakunaqa tukuy lawpi maskaspankupas manam tarimurqakuchu. 23 Chaymantam watiqaq iskay runakunaqa urqukunapa kasqanmanta uraykuspanku mayuta chimparqaku, hinaspam Josueyman rispanku tukuy chaykunamanta willarqaku. 24 Chaymantapas nirqakum: “Jehova Diosmi chay allpata quykuwanchik.+ Chaypi yachaq runakunaqa ñuqanchikmanta manchakuspankum hukmanyasqallaña kachkanku”, nispa.+