Salmos
Takiqkunata yachachiqpaq. Davidpa takisqan.
140 Jehova Dioslláy, mana allin runakunamantayá libraykullaway,
maqakuqllaña runakunamantayá harkaykullaway,+
2 sunqunkupi mana allinllata tantiaqkunamantayá harkaykullaway,+
chisyay maqanakuyllapi kaqkunamantayá harkaykullaway.
3 Culebrapa qallunta hinam qallunkutapas ñawchiyachinku,+
rimasqankupas kachukuq culebrapa hinam venenoyuq kachkan.+ (Samarinapaq).
4 Jehova Dioslláy, mana allin ruwaqkunamantayá pakaykullaway,+
maqakuq runakunamantayá harkaykullaway,
wichichiwanankupaq hatariqkunamantayá harkaykullaway.
5 Hatuntukuqkunaqa tuqllatam churaruwan,
purinay ñanpa waqtankunapim waskawan tuqllata churaruwan,+
hapiruwanankupaqmi tuqllata churarunku.+ (Samarinapaq).
6 Jehova Diostam nini: “Qanmi Diosniyqa kanki,
Jehova Dioslláy, yanapaykuwanaykipaq qayakamusqaytayá uyariykullaway”,+ nispay.
7 Llapallan kamachiq Jehova Dioslláy, atiywan waqaychaqnilláy,
qanmi umallayta harkaykuwarqanki wañuchinakuy punchawpi.+
8 Jehova Dioslláy, mana allin ruwaqkunapa imapas munasqankutaqa amayá quychu.
Ima tantiasqankupas yanqapaqyá kachun, manachayqa llumpa-llumpaytam hatuntukuyta qallaykunmanku.+ (Samarinapaq).
9 Muyuriruwaqniy runakunapa umanqa
kikinkupa mana allin rimasqallankuwanyá pampasqa kachun.+
10 Nina parayá paykunapa hawanman chayamuchun.+
Ninaman wischusqayá kachunku, uku-uku uchkuman+ wischusqayá kachunku,
amayá haykapipas hatarimuchunkuchu.
11 Runamasinta yanqamanta tumpaq runaqa amayá kay pachapiqa tarichunchu maypi yachanantapas*.+
Maqakuq runakunaqa llumpayta ñakarispayá wañuchunku.
12 Ñuqaqa yachanim Jehova Diosqa wakchakunata yanapananta,
payqa wakchakunapaqmi allin kaqta ruwanqa.+
13 Allin ruwaq runakunaqa paypa sutintam hatunchanqaku,
allin ruwaq runakunaqa paypa qayllanpim kawsakunqaku.+