Apocalipsis
18 Chaymantam rikurqani hanaq pachamanta uraykamuchkaq ancha atiyniyuq angelta, chay angelpa kanchayninwanmi kay pacha kancharirqa. 2 Paymi kallpawan qayakuspan nirqa: “¡Vencerachikunñam, vencerachikunñam hatun Babilonia llaqtaqa!+ Chay llaqtaqa demoniokunapa yachananñam* rikurirun chaynataq millakuypaq hinaspa chiqnisqa alton pawaqkunapawan demoniokunapa* pakakunanñam rikurirun.+ 3 Chay llaqtam vinota llapallan nacionkunaman tomarachirqa, chay vinoqa llumpay huchapakuy* munasqanmi,+ kay pachapi kamachiqkunapas chay llaqtawanmi huchapakurqaku.+ Kay pachapi negociantekunapas apuyarurqakum chay llaqtapa tukuy imankunawan, chay llaqtaqa manam pinqakurqachu tukuy imayuq kasqanmantaqa”, nispa.
4 Chaymantapas uyarirqanim hanaq pachamanta kayna qayakuyta: “Runallaykuna, chay llaqtamantayá lluqsiychik+ paypa huchallikuqmasinkuna kayta mana munaspaykichikqa hinaspa pay hina castigasqa kayta mana munaspaykichikqa.+ 5 Paypa huchanqa hanaq pachaman chayanankamam muntukurun,+ hinaptinmi Diosqa yuyarirun paypa tukuy mana allinkuna ruwasqanta.+ 6 Hukkunata mana allin ruwasqanmantayá mana allinwan kutichiychik,+ hinaspayá huk chaynatawanraq pagapuychik,+ hukkuna tomananpaq qusqan vasopiyá+ iskay chaynata payman quychik.+ 7 Payqa kikillanmi alabakun hinaspapas tukuy imayuqmi, manam chaymantaqa pinqakunchu, chayman hinam paypas ñakarinan hinaspa waqanan. Payqa sunqunpim nichkan: ‘Kamachiq hinam tiyachkani, ñuqaqa manam viudachu kani, manataqmi haykapipas waqasaqchu’, nispa.+ 8 Chaymi huk punchawllapi paymanqa castigokuna chayaramunqa wañunanpaq, waqananpaq hinaspa yarqaypi kananpaq. Chaymantapas ninawan qalaypaq kañasqam kanqa,+ payta castigaruq Jehova* Diosqa atiyniyuqmi.+
9 Kay pachapi paywan huchapakuq* kamachiqkunam chay llaqtamanta waqanqaku hinaspam qasqunkutapas takakunqaku kañasqa kasqanpa qusnisqanta qawaspanku, chay kamachiqkunaqa mana pinqakuspankum tukuy kapuqniyuq paywan yacharqaku. 10 Kamachiqkunaqa karullamantam qawanqaku pay hina ñakarichisqa kayta manchakuspanku, paykunam ninqaku: ‘¡Imay sunqulla! ¡Imay sunqulla, kay hatun hinaspa atiyniyuq Babilonia llaqta,+ huk horallapim qamqa castigasqa rikurirunki!’, nispa.
11 Kay pachapi negociantekunapas chay llaqtamantam waqaspanku llakikuchkanku, tukuy ima negocionkuta manaña pipas rantiptin. 12 Manañam pipas rantinchu: Llapa qurinkunata, qullqinkunata, alaqa ruminkunata, perlasninkunata, pukay-pukay telankunata, morado telankunata, linomantawan sedamanta telankunata, miski asnaq maderamanta tukuy ima ruwasqankunata, marfilmanta* ruwasqankunata, suma-sumaq tablamanta ruwasqankunata, broncemanta ruwasqankunata, fierromanta ruwasqankunata, marmolmanta ruwasqankunata, 13 canelankunata, India nacionmanta miski asnaq qurankunata, inciensonkunata*, miski asnaq aceitenkunata, yuraq inciensonkunata, vinonkunata, aceitunasmanta hurqusqa aceitenkunata, harinankunata, trigonkunata, vacankunata, ovejankunata, caballonkunata, carretankunata, sirvientenkunata nitaq runankunatapas. 14 Tukuy ima suma-sumaqllaña kaqkunata munapayasqaykim qampaqqa manaña kanñachu, miskillaña mikusqaykikunapas manañam kanñachu, sumaqllaña tukuy imaykipas chinkarunñam, chaykunaqa manañam haykapipas kanqañachu.
15 Tukuy chaykunawan negocio ruwaqkunam apuyarurqaku chay llaqtaman rantikusqankuwan*, ichaqa chay negocio ruwaqkunam karullapi kanqaku chay llaqta hina ñakarichisqa kayta manchakuspanku, paykunaqa waqaspankum llumpa-llumpayta llakikunqaku, 16 hinaspam ninqaku: ‘¡Imay sunqulla! ¡Imay sunqulla hatun llaqta! Qamqa karqanki sumaq linomanta pachawan, morado pachawan hinaspa pukay-pukay pachawan pachasqam chaynataq quriwan, alaqa rumikunawan hinaspa perlaskunawan sumaqllaña adornasqam,+ 17 huk horallapim chaynaña tukuy imaykikuna chinkarun’, nispa.
Botekunata manejaqkunapas, botepi riqkunapas, botepi llamkaqkunapas hinaspa lamar quchapi llapallan llamkaqkunapas karullapim sayarqaku, 18 hinaspam llaqta kañakuptin qusnisqanta qawaspanku kallpawan nirqaku: ‘¿Ima llaqtataq kanman kay hatun llaqta hinaqa?’, nispanku. 19 Paykunaqa ñutu allpatapas umankumanmi maqchikurqaku, hinaspam waqaspanku chaynataq llumpayta llakikuspanku qayakurqaku: ‘¡Imay sunqulla! ¡Imay sunqulla hatun llaqta! ¡Lamar quchapi llapallan boteyuqkunapas chay llaqtapa quri-qullqinwanmi apuyarun! ¡Chay llaqtaqa huk horallapim chinkarun!’, nispanku.+
20 Kusikuychikyá hanaq pachapi kaqkuna,+ kusikuychikyá Diospa runankunapas,+ kusikuychiktaqyá apostolkunawan Diosmanta willakuqkunapas*. Paytaqa Diosmi castigarun qamkunata tukuy ima ruwasusqaykichikmanta”, nispa.+
21 Chaymantam huk kallpasapa angel hatun molino rumiman rikchakuq rumita huqarirurqa, hinaspam lamar quchaman wischuykuspan nirqa: “Hatun Babilonia llaqtaqa kayna apurawman wischusqam kanqa, manañam haykapipas kanqañachu, chinkanqañam.+ 22 Chay llaqtapiqa manañam haykapipas uyarikunqañachu arpata tocaspanku takiqkunapa takisqankuqa, quenata* tocasqankuqa, cornetillata tocasqankuqa nitaq ima takipas. Manañam tukuy imapi llamkaqkunapas chaypiqa llamkanqañachu nitaq molinopi kutasqankupas uyarikunqañachu. 23 Qampiqa manañam haykapipas ima achkipas achkinqañachu, manañataqmi haykapipas casarakuq warmipa utaq qaripa qayakusqanpas uyarikunqañachu, qanwan negocio ruwaqkunaqa kay pachapi ancha riqsisqa runakunam karqaku, chaymantapas layqa ruwasqaykiwanmi llapallan nacionkuna engañasqa karqaku.+ 24 Chay llaqtapiqa Diosmi tarirurqa paymanta willakuqninkunapa hinaspa runankunapa yawarninta,+ tarirurqataqmi kay pachapi llapallan wañuchisqakunapa yawarnintapas”, nispa.+