Jeremias

36 Josiaspa churin Jeoyakim+ tawa wata Juda nacionta kamachichkaptinmi Jehova Diosqa Jeremiasta rimapayaspan nirqa: 2 “Israelpa, Judapa+ hinaspa llapallan nacionkunapa+ imayna kananmanta nisqaytayá wankukuq qillqapi qillqay, Josiaspa kamachisqan watamanta kunankama imakuna nisqaytayá qillqay.+ 3 Ñakariy kacharimunaymanta uyarispanku ichapas Judapa mirayninkunaqa mana allin ruwasqankuta saqinmanku, chaynapi mana allin ruwasqankutawan huchankuta pampachanaypaq”, nispa.+

4 Jeremiasmi Neriaspa churin Baructa+ qayachirqa, hinaspam Jehova Diospa lliw nisqankunata wankukuq qillqapi qillqananpaq nirqa.+ 5 Chaymantam Jeremiasqa Baructa nirqa: “Ñuqaqa manam Jehova Diospa wasinmanqa yaykuymanchu, 6 qamyá yaykuspayki Jehova Diospa niwasqankunata wankukuq qillqamanta leemuy, ayunasqanku punchawyá Jehova Diospa wasinpi llapallan runakuna uyarinankupaq hina leemuy. Juda nacionpi llaqtakunamanta hamuq llapallan runakunapaqmi leepunki. 7 Icharaqpas Jehova Diosqa ruegakusqankuta uyariykamunman, icharaqpas mana allin ruwasqankuta saqinmanku, Jehova Diosqa llumpa-llumpay piñasqam kachkan kay runakunapaqqa”, nispa.

8 Chaymi Neriaspa churin Barucqa Diosmanta willakuq* Jeremiaspa kamachisqanman hina ruwarqa, Barucqa Jehova Diospa wasinpim lliw runakuna uyarinankupaq hina wankukuq qillqapi Jehova Diospa nisqankunata leerqa.+

9 Josiaspa churin Jeoyakim+ pichqa wata Juda nacionta kamachichkaptinmi, isqun kaq killapi Jerusalenpi llapallan runakunawan Juda nacionpi llaqtachakunamanta Jerusalenman hamuq runakuna Jehova Diospaq ayunanankupaq kamachisqa karqaku.+ 10 Hinaptinmi Barucqa Jeremiaspa qillqachisqanta wankukuq qillqamanta Jehova Diospa wasinpi llapallan runakuna uyarinankupaq hina leerqa, leerqaqa Safanpa churin Guemariaspa+ mikunan cuartomantam. Safanqa+ karqa qillqaqmi. Chay cuartoqa karqa hanay law patiopim Jehova Diospa wasinman yaykuna musuq punkupi.+

11 Guemariaspa churin Micayam wankukuq qillqapi Jehova Diospa nisqankunata uyarirurqa, Guemariasqa karqa Safanpa churinmi. 12 Chaymantam kamachiqpa wasinpi qillqaqpa cuartonman rirqa, chaypim kamachiqpa llapallan yanapaqninkuna tiyachkasqa, paykunam karqa: Secretario Elisama,+ Semayapa churin Delaya, Acborpa+ churin Elnatan,+ Safanpa churin Guemarias, Hananiaspa churin Sedequias chaynataq kamachiqpa wakin yanapaqninkunapas. 13 Micayañataqmi wankukuq qillqamanta llapallan runakunapaq Barucpa leepusqanta paykunaman willarqa.

14 Hinaptinmi kamachiqpa yanapaqninkunaqa Netaniaspa churin Jeudita kacharqaku Baructa nimunanpaq: “Llapallan runakunapaq leepusqayki wankukuq qillqatayá apamuy”, nispa. Netaniasqa karqa Selemiaspa churinmi, Selemiasñataqmi karqa Cusipa churin. Chaymi Neriaspa churin Barucqa wankukuq qillqata paykunaman aparqa. 15 Paykunam Baructa nirqaku: “Tiyaykuspayá leeykapullawayku”, nispa. Hinaptinmi Barucqa leeykapurqa.

16 Leesqanta uyariruspankum mancharisqallaña qawanakuspanku Baructa nirqaku: “Kaykunataqa kamachiqmi yachanan”, nispa. 17 Baructaqa nirqakutaqmi: “Ama hina kaspayá niykuwayku imaynata kaykuna qillqasqaykita, ¿Jeremiaspa nisusqaykikunatachu qillqarqanki?”, nispa. 18 Barucñataqmi nirqa: “Arí, paymi kaykunata qillqanaypaqqa niwarqa, chaymi ñuqaqa kay wankukuq qillqapi tintawan qillqarqani”, nispa. 19 Hinaptinmi kamachiqpa yanapaqninkuna Baructa nirqaku: “Jeremiaswan rispaykichikyá pakakamuychik, amayá pipas yachachunchu maypi kasqaykichiktaqa”, nispa.+

20 Chaymantam patioman rirqaku kamachiq Jeoyakinwan rimaq. Chay wankukuq qillqatam churaykurqaku secretario Elisamapa cuartonman, hinaspam kamachiqman willaykurqaku lliw uyarisqankuta.

21 Kamachiqñataqmi Jeudita+ nirqa wankukuq qillqata apamunanpaq, secretario Elisamapa cuartonmantam Jeudiqa chay wankukuq qillqata apamurqa, hinaspam kamachiqpaqwan yanapaqninkunapaq leepurqa. 22 Isqun kaq killapim* kamachiqqa chirinan tiempopaq ruwachisqan wasipi tiyachkarqa, tiyachkarqaqa nina sansapa ñawpaqninpim. 23 Kimsa utaq tawa rayata Jeudi leeyta tukuruptillanmi kamachiqqa secretariopa cuchillonwan kuchuq, hinaspam nina sansaman wischuq lliw wankukuq qillqa kañakunankama. 24 Chay leesqanta uyarispankuqa manam kamachiqpas nitaq runankunapas manchakurqakuchu nitaq pachankutapas llikchikurqakuchu. 25 Elnatanpas,+ Delayapas+ chaynataq Guemariaspas+ kamachiqtaqa nirqakum wankukuq qillqata ama kañananpaq, payñataqmi mana kasukurqachu. 26 Chayta ruwaspanpas kamachiqqa churin Jerameltam, Azrielpa churin Serayatam hinaspa Abdeelpa churin Selemiastam kamachirqa secretario Baructawan Diosmanta willakuq Jeremiasta presochamunankupaq. Ichaqa Jehova Diosmi paykunataqa pakaykurqa.+

27 Jeremiaspa Barucwan qillqachisqan wankukuq qillqata kamachiq kañaruptinmi Jehova Diosqa Jeremiasta kaqmanta rimapayaspan nirqa:+ 28 “Huk wankukuq qillqata apamuspayá Juda nacionta kamachiq Jeoyakimpa kañaykusqan wankukuq qillqapi nisqaykunata kaqmanta qillqay.+ 29 Juda nacionta kamachiq Jeoyakimtam ninki: ‘Jehova Diosmi nisunki: “Qanmi kay wankukuq qillqata kañaykuspayki nirqanki: ‘¿Imaynanpimá qillqarqanki Babiloniata kamachiqmi hamuspan kay nacionta munaychakunqa, hinaspam mana runayuqtawan mana animalniyuqta saqinqa nispayki?’, nispa.+ 30 Juda nacionta kamachiq Jeoyakimtam Jehova Dios nin: ‘Davidpa rantinpiqa manañam Jeoyakimpa mirayninmantaqa pipas kamachinqañachu,+ ayanpas punchawmi rupaypi wischurayanqa, tutanpas chiripim wischurayanqa.+ 31 Mana allin ruwasqanmantam kamachiqta, mirayninkunata hinaspa runankunata castigasaq. Paykunaman hinam Jerusalenpi runakunamanpas Judapi runakunamanpas nisqayman hina ñakariyta kacharimusaq,+ paykunaqa willachisqaytaqa manam uyariyta munarqakuchu’”’”, nispa.+

32 Neriaspa churin secretario Barucmanmi Jeremiasqa wankukuq huk qillqata quykurqa,+ hinaptinmi Barucqa Jeremiaspa nisqankunata qillqarqa, qillqarqaqa Judata kamachiq Jeoyakimpa kañasqan wankukuq qillqapi kaqkunatam.+ Chaykunata hinam hukkunatapas achkata yaparqa.