Jeremias
38 Matanpa churin Sefatiasmi, Pasjurpa churin Guedaliasmi, Selemiaspa churin Jucalmi+ chaynataq Malkiyapa churin Pasjurmi+ lliw runakunaman Jeremiaspa nisqanta uyarirqaku, Jeremiasmi nirqa: 2 “Jehova Diosmi nin: ‘Pipas kay llaqtapi qipaqqa espadawanmi, yarqaymantam hinaspa unquywanmi wañunqa.+ Caldea runakunaman hukllawakuqmi ichaqa mana wañunqachu, wañuymanta librakuspanmi kawsayllapas-kawsanqaraq’, nispa.+ 3 Jehova Diosmi nin: ‘Babiloniata kamachiqpa soldadonkunapa makinmanmi kay llaqtataqa churaykusaq, paymi kay llaqtataqa munaychakunqa’”, nispa.+
4 Soldadokunata kamachiqkunam reyta nirqaku: “Kay runata wañuchinankupaqyá niy.+ Kay llaqtapi puchuq soldadokunatawan llapallan runakunatam imapas nisqanwan hukmanyachichkan, kay runaqa manam kay llaqtapa allinnintachu munan, payqa sasachakuyllapi kananchiktam munan”, nispa. 5 Kamachiq Sedequiasñataqmi nirqa: “Qamkunapa makikichikpim kachkan, ñuqaqa manam qamkunataqa harkakusqaykichikchu”, nispa.
6 Chaymi Jeremiasta hapiruspanku kamachiqpa churin Malkiyapa pozonman wischuykurqaku, chay pozoqa karqa Guardia sutiyuq patiopim.+ Chay pozomanmi waskakunawan uraykachirqaku, chay pozoqa mana yakuyuq kaspanpas mitullañam karqa, chaymi Jeremiasqa mitupi sinigarurqa.
7 Etiopia llaqtayuq Ebed-melecmi+ Jeremiasta pozoman hinarusqankuta yacharurqa, Ebed-melecqa kamachiqpa wasinpi nanachikuqmi karqa. Kamachiqñataqmi Benjamin sutiyuq punkupi tiyachkarqa.+ 8 Ebed-melecqa kamachiqpa wasinmanta lluqsispanmi payta nimurqa: 9 “¡Kamachiqlláy, Diosmanta willakuq* Jeremiasta chay runakunapa ruwasqankuqa pasaypaq mana allinmi! Pozomanmi hinarunku, chaypiqa yarqaymantam wañurunqa, tantapas llaqtapiqa tukurunñam”, nispa.+
10 Hinaptinmi kamachiqqa Ebed-melecta nirqa: “30 runakunata pusarikuspayki Diosmanta willakuq Jeremiasta manaraq wañuruchkaptin pozomanta hurquramuy”, nispa. 11 Chaymi Ebed-melecqa runakunata pusarikuspan kamachiqpa wasinman rirqaku, rirqakuqa quri-qullqita waqaychananku cuartopa uray lawninmanmi,+ chaymantam mawka latapakunata apaspanku Jeremiaspa kasqan uchkuman waskawan uraykachirqaku. 12 Chaymantam Ebed-melecqa Jeremiasta nirqa: “Ama hina kaspayá chay latapakunata waskantinta wallwaykiman hinakuy”, nispa. Jeremiasqa chaytamá ruwarqa. 13 Hinaspam waskakunawan chutaspanku uchkumanta hurqururqaku, chaymi Jeremiasqa Guardia sutiyuq patiopi qipakurqa.+
14 Kamachiq Sedequiasmi Diosmanta willakuq Jeremiasta kimsa kaq punkuman pusachimurqa, chay punkuqa Jehova Diospa wasinpim kachkan, chaypim kamachiqqa Jeremiasta nirqa: “Tapunaymi kachkan, ama pakaykuspam imam kaqta willawanki”, nispa. 15 Jeremiasñataqmi Sedequiasta nirqa: “Willaykuptiyqa wañurachiwankich, rimapayaptiypas manach uyariwankimanchu”, nispa. 16 Chaymi Sedequiasqa mana pipa yachasqallanta Jeremiasta nirqa: “Kawsakuy quwaqninchik Jehova Diospa sutinpim niki, ñuqaqa manam wañuchisqaykichu, manataqmi wañuchiy munasuqniki runakunamanpas qusqaykichu”, nispa.
17 Chaymi Jeremiasqa Sedequiasta nirqa: “Angelkunata kamachiq Jehova Diosmi nin, Israelpa Diosninmi nin: ‘Babiloniata kamachiqpa yanapaqninkunapa makinman churakuspaykiqa hinallam kawsanki, manataqmi kay llaqtapas kañasqachu kanqa. Qanwan aylluykikunapas manam wañunkichikchu.+ 18 Babiloniata kamachiqpa yanapaqninkunapa makinman mana churakuptikim ichaqa, Caldea runakuna kay llaqtaman yaykuramuspanku kañaykunqaku.+ Paykunapa makinmantaqa manam qampas lluptinkichu’”, nispa.+
19 Kamachiq Sedequiasñataqmi Jeremiasta nirqa: “Caldea runakunaman hukllawakuruq judiokunatam manchakuni. Paykunapa makinman chayaruptiyqa, ichapas paykunaqa ñakarichiwanqa”, nispa. 20 Jeremiasmi ichaqa nirqa: “Manam paykunapa makinmanqa chayankichu, ama hina kaspayá Jehova Diospa nisusqaykikunata kasukuspa nisqayta uyariykuy. Nisqaykunata kasukuspaykiqa allinmi kanki, hinaspapas unaymi kawsakunki. 21 Mana kasukuptiki ima pasasunaykimantam ichaqa Jehova Dios niwarqa: 22 Juda nacionta kamachiqpa wasinpi puchuq warmikunatam llapallanta pusakunqaku, hinaspam Babiloniata kamachiqpa+ yanapaqninkunaman quykamunqaku. Kaynata nistinmi rinqaku:
‘Confianzapaq hapisqan runakunallam qipancharun, hinaspam chiqniqnin runakunaman quykun.+
Paytaqa mitupi sinigananpaqmi saqirurqaku.
Kunanqa paytam paqwaypaq saqirunku’, nispa.
23 Llapallan warmikikunatawan churikikunatam Caldea runakunaman quykunqaku, qamqa manam makinmantaqa lluptinkichu. Babiloniata+ kamachiqmi presocharususpayki qampa huchaykipi kay llaqtata kañaykunqa”, nispa.+
24 Sedequiasñataqmi Jeremiasta nirqa: “Amam kaytaqa pimanpas willankichu manachayqa wañuruwaqmi. 25 Sichu kamachiypi yanapawaqniykuna qanwan rimasqayta yacharuspa nisunkiman ‘ama hina kaspaykiyá kamachiqman ima nisqaykita willaykuwayku, ama pakaykuspayá willaykuwayku manam wañuchisqaykikuchu.+ Kamachiqqa ¿imatamá nisurqanki?’ nispa nisuptikiqa 26 ninkim: ‘Kamachiqtam ruegakuchkarqani Jeonatanpa wasinman ama kutichiwananpaq. Chaynapi mana wañurunaypaq’”, nispa.+
27 Chaymanta qipatam kamachiqpa yanapaqninkunaqa llapallanku hamuruspanku Jeremiasta tapurqaku. Jeremiasñataqmi kamachiqpa nisqanman hinalla willarqa. Parlasqankuta mana uyarisqankuraykum manaña imatapas tapurqakuñachu. 28 Jeremiasqa Guardia sutiyuq patiopim+ karqa Jerusalenman yaykumunanku punchawkama. Chaypimá karqa Jerusalenman yaykumuptinkupas.+