Eclesiastes

6 Kay pachapiqa rikurqanitaqmi llapallan runakunapa huk ñakariynintapas. 2 Diosqa wakin runamanmi qun quri-qullqita, kapuqninkunata hinaspa ancha riqsisqa kayta, chaynapi imanpas mana pisinanpaq. Chaywanpas Diosqa manam saqinchu chaykunawan kusikunankutaqa, huk runam ichaqa chaykunawan kusikun. Chaypas yanqam, manchakuypaq ñakariymi. 3 Runaqa 100 churiyuq kaspanpas, achka watakuna kawsaspanpas chaynataq yuyaqyanankama kawsaspanpas wañukunankama allin kaqkunawan mana kusirikuptinqa yanqam, chay runamantaqa wañusqa naceq wawam aswan allinqa.+ 4 Chay wawaqariki yanqam nacemunpas, tutayaypim chinkarunpas, sutinpas tutayaypi hinam qiparun. 5 Manam intitapas rikurqachu, manataqmi imatapas yacharqachu, chayna kaptinpas chay runamantaqa chay wawam aswan allinqa.+ 6 ¿Imapaqtaq allin kanman iskay kutikama 1.000 wata kawsaspayki mana kusisqa kaptikiqa? ¿Manachu hina kaqllaman llapallanchik rinchik?+

7 Runaqa mikunallanpaqmi anchata llamkan,+ chaywanpas hinallam imatapas munan. 8 ¿Imapitaq yachayniyuq runaqa aswan allin mana yuyayniyuq runamantaqa?+ ¿Imatataq wakcha runaqa tarinman hinalla kawsakunanpaq kallpanchakuspan? 9 Aswan allinqa rikusqanchik kaqkunawan kusikuymi mana rikusqanchik kaqkunata kaypi-chaypi maskaymantaqa. Chaypas wayrata qatikachay hina yanqallam.

10 Imapas kaqkunaqa sutiyuqñam, runapa imayna kasqanpas yachasqañam. Payqa manam atipanakunmanchu paymanta aswan atiyniyuqwanqa. 11 Rimaysapallaña* kaypas yanqam. ¿Imatataq runaqa chaskin tukuy ima rimasqanwan? 12 ¿Pitaq yachan runapa allinnintaqa? Runapa vidanqa llantuy hina pisillam.+ ¿Pitaq runamanqa willanman wañukusqan qipata kay pachapi ima pasasqanmanta?